தமிழக வெற்றிக் கழகம் விஜய் தலைமையில் செயல்படும் அரசியல் கட்சி. வரும் 2026 சட்டமன்றத் தேர்தலில் முழுமையான தயாரிப்புகளை மேற்கொண்டு வருகிறது. இந்தத் தேர்தலில் கட்சி சார்பில் போட்டியிட விரும்பும் கட்சி உறுப்பினர்கள் மற்றும் ஆதரவாளர்களுக்காக விருப்ப மனு விநியோகம் இன்று முதல் தொடங்கியுள்ளது.
இது கட்சியின் தேர்தல் பணிகளை மேலும் தீவிரப்படுத்தும் முக்கியமான அறிவிப்பாகும். தமிழகத்தின் அனைத்து 234 சட்டமன்றத் தொகுதிகளிலும் தவெக சார்பில் வேட்பாளராகப் போட்டியிட விரும்புவோர் இந்த விருப்ப மனுக்களைப் பெற்று சமர்ப்பிக்கலாம் என கூறப்பட்டுள்ளது.
விருப்ப மனுக்கள் பனையூரில் உள்ள கட்சியின் தலைமை நிலையச் செயலகத்தில் வழங்கப்படுகின்றன. இன்று நண்பகல் 12 மணி முதல் விநியோகம் தொடங்குகிறது. அதைத் தொடர்ந்து பிப்ரவரி 7 முதல் 14ஆம் தேதி சனிக்கிழமை வரை தினசரி காலை 10 மணி முதல் மாலை 6 மணி வரை விருப்ப மனுக்களைப் பெறலாம். விருப்பமுள்ளவர்கள் மனுவைப் பெற்ற பிறகு, அதில் கேட்கப்பட்டுள்ள அனைத்து தகவல்களையும் முழுமையாகப் பூர்த்தி செய்து, தேவையான ஆவணங்களுடன் தலைமை அலுவலகத்தில் சமர்ப்பிக்க வேண்டும் என தெரிவிக்கப்பட்டு உள்ளது.
இதையும் படிங்க: “NO COMMENTS” … எடப்பாடிக்கு தோல்வி பயம்..! செங்கோட்டையன் பதிலடி..!
இந்த விருப்ப மனு செயல்முறை மூலம் கட்சி தனது வேட்பாளர்களைத் தேர்ந்தெடுக்கும் பணியைத் தொடங்குகிறது. குறிப்பாக, தவெக தலைவர் விஜய் தானே தனிப்பட்ட முறையில் பல வேட்பாளர்களை நேர்காணல் செய்து தேர்வு செய்ய உள்ளதாகவும் தகவல்கள் வெளியாகியுள்ளன. இது கட்சியின் வேட்பாளர் தேர்வு செயல்முறையில் வெளிப்படைத்தன்மை மற்றும் தரத்தை உறுதி செய்யும் நோக்கத்தில் அமைந்துள்ளது.
இதையும் படிங்க: ரிப்போட்டர் மீது தாக்குதல்... பதைப்பதைக்கும் தமிழ்நாடு..! தவெக தலைவர் விஜய் கண்டனம்..!