தமிழக அரசியல் களம் 2026 சட்டமன்றத் தேர்தலை நோக்கி சூடுபிடித்துள்ள நிலையில், நடிகர் விஜய்யின் தமிழக வெற்றிக் கழகம் மற்றும் அதிமுகவின் தற்போதைய நிலை குறித்துச் சிவகங்கை தொகுதி காங்கிரஸ் எம்.பி. கார்த்தி சிதம்பரம் தஞ்சாவூரில் காரசாரமான விமர்சனங்களை முன்வைத்துள்ளார்.

நடிகர் விஜய்யின் தமிழக வெற்றிக் கழகம் இன்னும் ஒரு முழுமையான அரசியல் கட்சியாக மாறவில்லை; அது ரசிகர் மன்றம் போலவே செயல்படுகிறது. ஒரு கட்சிக்குத் தேவையான 'கட்டளை மற்றும் கட்டுப்பாட்டு' அமைப்பு அங்கு இல்லை. விஜய்க்குப் பெரிய ரசிகர் கூட்டம் இருக்கலாம், அது ஆதரவாகவும், வாக்குகளாகவும் மாறலாம். ஆனால், அந்த வாக்குகள் சட்டமன்றத் தொகுதிகளாக மாறுமா என்பது பெரிய கேள்விக்குறிதான் எனத் தெரிவித்தார். மேலும், மின்சாரக் கம்பத்தில் ஏறாமல் பத்திரமாக வீட்டுக்குச் செல்லுங்கள்" என விஜய் தொண்டர்களைக் கையெடுத்துக் கும்பிட்டுக் கிண்டலாகக் கேட்டுக்கொண்டார்.

அதிமுக ஒரு பெரிய கட்சி என்பதை நான் குறைத்து மதிப்பிடவில்லை. ஆனால், முன்பு இருந்த ஆளுமை இப்போது அந்த கட்சியிடம் இல்லை. ஒரு காலத்தில் கூட்டணி கட்சிகள் அதிமுகவை நாடிச் சென்றன. ஆனால் இன்று, சிறு பஞ்சாயத்து என்றாலும் டெல்லிக்குச் சென்று பாஜகவைச் சந்திக்க வேண்டிய நிலையில் அவர்கள் உள்ளனர். அவர்களால் சுயமாக முடிவெடுக்க முடியவில்லை என எடப்பாடி பழனிசாமியின் டெல்லி பயணத்தை விமர்சித்தார்.

இதையும் படிங்க: அமெரிக்காவை எதிர்க்க யாருக்கும் தெம்பில்லை... காரைக்குடியில் கார்த்தி சிதம்பரம் எம்.பி பரபரப்பு பேட்டி!

முன்னாள் முதல்வர் ஓ. பன்னீர்செல்வத்தைத் திமுக அணியில் இணைத்தது முதலமைச்சர் மு.க. ஸ்டாலினின் சாதுரியம் எனப் புகழ்ந்த அவர், சசிகலாவால் தமிழக அரசியலில் இனி எந்தத் தாக்கமும் ஏற்படாது, அவர்களது காலம் முடிந்துவிட்டது எனவும் குறிப்பிட்டார்.

எந்தக் கட்சிக்கு எவ்வளவு இடங்கள் என்பதைத் தீர்மானிக்கும் இடத்தில் திமுக உள்ளது. காங்கிரஸ் - திமுக கூட்டணி தொடர வேண்டும் என்ற எண்ணத்தில்தான் இரு கட்சிகளும் செயல்படுகின்றன. பரஸ்பரப் புரிதலோடு தொகுதிப் பங்கீடு சுமூகமாக முடியும் என நம்பிக்கை தெரிவித்தார்.

இந்தச் செய்தியாளர் சந்திப்பின் போது காங்கிரஸ் மாநகர மாவட்டத் தலைவர் மகேந்திரன் உள்ளிட்ட நிர்வாகிகள் உடனிருந்தனர். விஜய்யின் அரசியல் நகர்வுகளைக் கார்த்தி சிதம்பரம் இவ்வளவு வெளிப்படையாக விமர்சித்துள்ளது அரசியல் வட்டாரத்தில் பெரும் விவாதத்தைக் கிளப்பியுள்ளது.

இதையும் படிங்க: பாஜகவால் அதிமுகவின் வாக்கு வங்கி சிதையும்! காஞ்சிபுரத்தில் கார்த்தி சிதம்பரம் எம்.பி பேட்டி!