மதுராந்தகம் சட்டமன்றத் தொகுதி இடைத்தேர்தலில் மதச்சார்பற்ற சமூகநீதி வெற்றிக் கூட்டணியின் சார்பில் போட்டியிடும் வேட்பாளர் மரகதம் குமரவேலை ஆதரித்து, கூட்டணிக் கட்சிகளின் தலைவர்கள் பங்கேற்கும் மாபெரும் தேர்தல் பரப்புரைப் பொதுக்கூட்டம் வரும் அக்டோபர் 1-ஆம் தேதி மதுராந்தகத்தில் நடைபெறவுள்ளதாகத் தமிழக வெற்றிக் கழகத் தலைமை நிலையச் செயலகம் அதிகாரப்பூர்வமாக அறிவித்துள்ளது.
செங்கல்பட்டு மாவட்டம் மதுராந்தகம் சட்டமன்றத் தொகுதிக்கு நடைபெறவுள்ள இடைத்தேர்தல் களம் நாளுக்கு நாள் அனல் பறந்து வரும் சூழலில், ஆளுங்கட்சியான தவெக தனது கூட்டணிக் கட்சிகளுடன் இணைந்து தேர்தல் களப் பணிகளை உச்சக்கட்டத்திற்கு முடுக்கிவிட்டுள்ளது.
இது தொடர்பாகத் தமிழக வெற்றிக் கழகத்தின் தலைமை நிலையச் செயலகம் வெளியிட்டுள்ள அதிகாரப்பூர்வ அறிக்கையில், தமிழ்நாட்டின் மதச்சார்பற்ற தன்மையையும், தனித்துவமான சமூகநீதியையும் போற்றிப் பாதுகாத்து, ஊழலற்ற, நேர்மையான, திறன் மிகுந்த ஆட்சியைத் தமிழகத்திற்கு வழங்கிக் கொண்டிருக்கிறார் தமிழ்நாடு முதலமைச்சரும் தமிழக வெற்றிக் கழகத் தலைவருமான விஜய் அவர்கள் என்று குறிப்பிடப்பட்டுள்ளது.
இதையும் படிங்க: இடைத்தேர்தலுக்கு காரணமே திமுக - அதிமுக தான்! துரை வைகோ பரபரப்பு குற்றச்சாட்டு!
மேலும், அந்த நல்லாட்சி தொடரவும், ஜனநாயக மாண்புகள் தொடர்ந்து காக்கப்படவும் அமைந்த கொள்கைக் கூட்டணியே 'மதச்சார்பற்ற சமூகநீதி வெற்றிக் கூட்டணி'. தமிழக வெற்றிக் கழகத்தின் ஒருங்கிணைப்பில் உருவான இந்தக் கூட்டணியில் இந்திய தேசிய காங்கிரஸ் கட்சி, விடுதலைச் சிறுத்தைகள் கட்சி, இந்திய யூனியன் முஸ்லிம் லீக், மறுமலர்ச்சி திராவிட முன்னேற்றக் கழகம் உள்ளிட்ட பல்வேறு அரசியல் கட்சிகள் அங்கம் வகிக்கின்றன எனத் தெரிவிக்கப்பட்டுள்ளது.
இக்கூட்டணியின் சார்பில் மதுராந்தகம் தொகுதியில் களம் காணும் அதிகாரப்பூர்வ வேட்பாளர் மரகதம் குமரவேலுக்கு ஆதரவாகப் பொதுமக்களிடம் வாக்கு சேகரிக்கும் வகையில், வரும் அக்டோபர் 1-ஆம் தேதி வியாழக்கிழமை மாலை 4 மணியளவில் மதுராந்தகம் ஹோட்டல் ஹைவே இன் அருகில் மாபெரும் தேர்தல் பிரச்சாரப் பொதுக்கூட்டம் பிரம்மாண்டமாக நடைபெற ஏற்பாடுகள் செய்யப்பட்டுள்ளன.
இக்கூட்டத்தில் தமிழக வெற்றிக் கழகத்தின் மாநில நிர்வாகிகள், மதச்சார்பற்ற சமூகநீதி வெற்றிக் கூட்டணிக் கட்சிகளின் தலைவர்கள், முன்னணித் தலைவர்கள், தமிழ்நாடு அமைச்சரவையின் அமைச்சர்கள், நாடாளுமன்ற மற்றும் சட்டமன்ற உறுப்பினர்கள் பெருந்திரளாகக் கலந்துகொண்டு சிறப்புரையாற்றித் தீவிர வாக்கு சேகரிப்பில் ஈடுபடவுள்ளதாகத் தலைமை நிலையச் செயலகம் தெரிவித்துள்ளது.
இதையும் படிங்க: "மிக்சர் முதல்வர்"..! இரண்டே நாளில் 9 கொலைகள்..! உதயநிதி கண்டனம்..!!