விடுதலை சிறுத்தைகள் கட்சி தலைவர் திருமாவளவன், காவல்துறை மானிய விவாதத்தின் போது முதலமைச்சர் ஆற்றிய பதிலுரையில் வெளிப்பட்ட உடல்மொழியைக் கடுமையாக விமர்சித்துள்ளார். திமுக தலைவரும் முன்னாள் முதலமைச்சருமான மு.க.ஸ்டாலினை கேலி செய்யும் வகையில் அந்த உடல்மொழி அமைந்திருந்ததாக எழுந்துள்ள விமர்சனங்களை சுட்டிக்காட்டிய அவர், முதல்வர் தரப்பில் ‘உள்நோக்கம் கொண்டதல்ல’ என்று விளக்கம் அளிக்கப்பட்டிருப்பதை ஏற்றுக்கொண்டாலும், இதுபோன்ற உடல்மொழிகள் கண்ணியமான அணுகுமுறை அல்ல என்றும் மனித மாண்புகளுக்கு எதிரானது என்றும் வலியுறுத்தியுள்ளார்.

எந்தச் சூழலிலும் ஒருவரின் தன்மதிப்பைக் குறைத்து மதிப்பிடுவதோ, காயப்படுத்துவதோ நாகரிகமான செயலாகாது என்று திருமாவளவன் தெரிவித்துள்ளார். அரசியல் விமர்சனங்கள் தனிப்பட்ட தன்மதிப்பைப் புண்படுத்தும் விமர்சனங்களிலிருந்து வேறுபட்டவை என்பதை அவர் வலியுறுத்தினார். கல்வி, பொருளாதாரம் அல்லது அதிகாரம் போன்ற வலிமை இல்லாத எளிய மக்களையும் கூட காயப்படுத்தும் அணுகுமுறை ஒருபோதும் ஏற்புடையது அல்ல என்றும் குறிப்பிட்டார்.

அகவையில் மூத்தோரை மதிப்பது மனித மாண்புகளில் உயர்ந்த ஒன்று என்பதால், மாண்புமிகு பொறுப்பில் உள்ள முதலமைச்சர் இனிவரும் காலங்களில் தனது உடல்மொழியில் மிகுந்த கவனம் செலுத்துவது நலன் பயக்கும் என்று அவர் கோரிக்கை விடுத்தார்.மேலும், முதல்வரின் பதிலுரையை அடுத்து திமுக தரப்பில் அவரது உரையின் சில பகுதிகளை அவைக் குறிப்பிலிருந்து நீக்க வேண்டும் என கோரிக்கை வைக்கப்பட்டது.

இதையும் படிங்க: கொங்கு மண்டலத்தையே கைப்பிடியில் வைத்திருக்கும் செந்தில் பாலாஜிக்கு இப்படியொரு நிலையா?... மு.க.ஸ்டாலின் எடுத்த அதிரடி முடிவு...!

அந்த விவாதத்தின் போது சட்டத்துறை அமைச்சர் இடைமறித்து கூறிய கருத்து வரலாற்றுப் பிழையாகும் என்று திருமாவளவன் சுட்டிக்காட்டியுள்ளார். மிசா காலத்து அரசப் பயங்கரவாதம் எத்தகையது என்பது நாடறிந்த உண்மை. அந்தக் கொடிய ஒடுக்குமுறைக்கு உள்ளான திமுக தலைவர் குறித்து முற்றிலும் தவறான கருத்தைப் பதிவு செய்தது கண்டனத்துக்குரியது என்று அவர் தெரிவித்தார். அந்தக் கருத்தை சட்டத்துறை அமைச்சர் திரும்பப் பெற வேண்டும் என வலியுறுத்தியுள்ளார்.

இதையும் படிங்க: புயலைக் கிளப்பிய மிசா விவகாரம்... "முதல்வருக்கு ஆணவப் பேச்சு"..! திமுக ஆர்ப்பாட்டம் அறிவிப்பு..!!