தமிழக சட்டப்பேரவையில் முதலமைச்சர் விஜய் செய்த உடல்மொழி சைகையை ஒத்த வகையில் தயாரிக்கப்பட்ட விநாயகர் சிலையை பொது இடத்தில் வைக்க தடை விதிக்கப்பட்டுள்ளதாக தகவல்கள் வெளியாகியுள்ளன. 

விநாயகர் சதுர்த்தி விழா நெருங்கி வரும் வேளையில், மாநிலம் முழுவதும் பல்வேறு வடிவங்களிலும் அளவுகளிலும் விநாயகர் சிலைகள் தயாரிக்கப்பட்டு வருகின்றன. இந்நிலையில், சென்னை கொடுங்கையூர் அகஸ்தியர் தெருவில் பிரம்மாண்டமான விநாயகர் சிலை ஒன்று, சட்டசபையில் விஜய் தாடையை நோக்கி கைகாட்டிய சைகையை பிரதிபலிக்கும் வகையில் உருவாக்கப்பட்டதாக கூறப்படுகிறது.

இந்த சிலையை பொது இடத்தில் நிறுத்தி வழிபாடு நடத்த ஏற்பாடுகள் தீவிரமாக நடைபெற்று வந்தன. ஆனால், பாரத் இந்து முன்னணி மாநில இளைஞர் அணி துணைச் செயலாளரும் சமூக ஆர்வலருமான ஆர்.டி.ஐ. செல்வம், கொடுங்கையூர் காவல் நிலையத்தில் புகார் மனு அளித்தார். அதில், கிருஷ்ணமூர்த்தி நகர் அகத்தியர் தெருவில் முதலமைச்சர் விஜய்யின் சைகையைப் போல விநாயகர் சிலைகள் தயாரிக்கப்பட்டுள்ளதாகவும், இது இந்து மக்களின் உணர்வுகளைப் புண்படுத்துவதாகவும் தெரிவித்து, அதைத் தடை செய்யுமாறு கோரியிருந்தார். 

இதையும் படிங்க: சட்டசபையில் திமுக - தவெக கேம் விளையாடுகிறார்கள்.. மாட்டிக்கிட்டது மக்கள்: காங். எம்பி கிறிஸ்டோபர் திலக்!

அதேபோல், மிசா சட்டம் தொடர்பான நிகழ்வுகளை கேலி செய்யும் வகையிலான மற்றொரு விநாயகர் சிலை, கொருக்குப்பேட்டை கருமாரியம்மன் நகரில் தவெக வடசென்னை மாவட்டத் தலைவர் சுறா வேலு தலைமையில் வைக்க ஆர்டர் கொடுக்கப்பட்டுள்ளதாகவும் தகவல் பரவியது. இந்துக்களின் மனதைப் புண்படுத்தும் இத்தகைய சிலைகளை வைக்கக் கூடாது என்றும், மீறி வைத்தால் பாரத் இந்து முன்னணி சார்பில் போராட்டம் நடத்தப்படும் என்றும் எச்சரிக்கை விடுக்கப்பட்டது. 

இதையடுத்து, அதிகாரிகள் தலையிட்டு அந்த சிலையைப் பொது இடத்தில் வைக்கத் தடை விதித்துள்ளதாக செய்திகள் வெளியாகியுள்ளன. இதனால் சிலை தயாரித்தவர்களும் விழா ஏற்பாட்டாளர்களும் அதிர்ச்சியடைந்துள்ளனர். இந்த சர்ச்சைக்கு பின்னணியில், கடந்த திங்கட்கிழமை சட்டப்பேரவையில் போலீஸ் மற்றும் தீயணைப்புத் துறைகள் மீதான மானியக் கோரிக்கை விவாதம் நடைபெற்றது. அப்போது விஜய் சுமார் ஒரு மணி நேரம் ஆவேசமாகப் பேசினார்.

மிசா சட்டம் குறித்து பேசும்போது, சிறையில் ஸ்டாலின் மீது போலீசார் தாக்குதல் நடத்தி தாடை உடைந்தது போன்ற சைகையைக் காட்டினார். இது திமுகவினருக்கு மட்டுமல்ல, தவெகவுக்கு ஆதரவு தெரிவிக்கும் கூட்டணிக் கட்சியினருக்கே அதிருப்தியை ஏற்படுத்தியது. பின்னர் விஜய், யாரையும் கிண்டல் செய்யும் நோக்கில் அந்த உடல்மொழியைப் பயன்படுத்தவில்லை என விளக்கம் அளித்தார். இந்த நிகழ்வுகளின் தொடர்ச்சியாகவே சிலை சர்ச்சை வெடித்துள்ளது.

இதையும் படிங்க: கூட்டணிக்கு என்ன பெயர்.? பெரும் எதிர்பார்ப்பு..! தவெக தோழமை கட்சிகள் கூட்டம் நிறைவு..!