தலைமைத் தேர்தல் ஆணையர் ஞானேஷ் குமார் பதவி விலகக் கோரி 'இந்தியா' (இண்டி) கூட்டணிக் கட்சிகள் குடியரசுத் தலைவரிடம் அளித்த கூட்டு மனுவில், கூட்டணியில் அங்கம் வகிப்பதாகக் கூறப்படும் தமிழக முதல்வர் விஜய்யின் பெயர் இடம்பெறாதது ஏன் என்று மத்திய சென்னை திமுக நாடாளுமன்ற உறுப்பினர் தயாநிதி மாறன் காங்கிரஸ் கட்சிக்குச் சரமாரியாகக் கேள்வி எழுப்பியுள்ளார்.

தலைமைத் தேர்தல் ஆணையர் பதவி விலகக் கோரி டெல்லியில் எதிர்க்கட்சிகள் தீவிரப் போராட்டம் நடத்தி வருவதுடன், குடியரசுத் தலைவரிடமும் முக்கியக் கோரிக்கை மனுவை அளித்துள்ளன. இந்த விவகாரத்தில் திமுக போராட்டங்களில் பங்கேற்கவில்லை என்று தமிழ்நாடு காங்கிரஸ் கமிட்டித் தலைவர் மாணிக்கம் தாகூர் விமர்சித்திருந்த சூழலில், காங்கிரஸ் கட்சியின் இரட்டை நிலைப்பாட்டையும் தமிழக வெற்றிக் கழகத் தலைவர் முதல்வர் விஜய்யின் மவுனத்தையும் தோலுரிக்கும் வகையில் தயாநிதி மாறன் எம்பி தனது எக்ஸ் (ட்விட்டர்) தளத்தில் கடுமையான கேள்விகளை முன்வைத்துள்ளார்.

காங்கிரஸ் கட்சியை நோக்கிக் கேள்வி எழுப்பியுள்ள தயாநிதி மாறன், தலைமைத் தேர்தல் ஆணையர் விவகாரத்தில் இண்டி கூட்டணி அளித்த மனுவில் தமிழக முதல்வர் விஜய் பெயர் எங்கே? பாசிசம், பாயாசம் என மேடைகளில் அனல் பறக்கப் பஞ்ச் பேசும் நடிகர் பெயர் இதிலும் காணவில்லையே? என்ன ஆச்சு அவருக்கு? எனக் கிண்டலடித்துள்ளார்.

இதையும் படிங்க: "அதிமுகவில் இருந்து வருவார்கள் 15 எம்எல்ஏக்கள் வருவார்கள் என சொல்லவில்லை” - அந்தர் பல்டி அடித்த செங்கோட்டையன்...!

மேலும் காங்கிரஸ் தலைவர்களை விமர்சித்த அவர், பழக்க வழக்கமெல்லாம் பனையூருக்கு வந்து காபி சாப்பிடுவதோடு நிறுத்திக் கொள்ள வேண்டும்; பாசிச எதிர்ப்பு, பாஜக எதிர்ப்புப் போராட்டங்களுக்கெல்லாம் என்னைக் கூப்பிடாதீர்கள் என செவிட்டில் விசிலடித்து அனுப்பிவிட்டாரா உங்கள் முதல்வர்? அல்லது, நீங்கள் தமிழ்நாட்டில் எந்த வாக்குவங்கியும் இல்லாத டம்மி பீஸ்கள் தான் எனும் 'கம்பெனி சீக்ரெட்' இந்த டம்மி முதலமைச்சருக்கே தெரிந்துவிட்டதோ? என்று மிகக் காட்டமாகச் சாடியுள்ளார்.

திமுக ஏற்கனவே 'இந்தியா' கூட்டணியில் இருந்து வெளியேறிவிட்டதாக அறிவித்துவிட்ட நிலையில், தற்போது காங்கிரஸுடன் இணக்கமாக உள்ள தவெகவின் தலைவர் விஜய் பாஜக எதிர்ப்புப் போராட்டங்களில் துணிச்சலுடன் பங்கேற்காதது ஏன் என்று திமுக முன்னணியினர் தொடர்ச்சியாகக் கேள்வி எழுப்பி வருவது, தமிழக அரசியல் களத்தில் திமுக - காங்கிரஸ் - தவெக இடையேயான வார்த்தைப் போரை உச்சக்கட்டத்திற்குக் கொண்டு சென்றுள்ளது.

இதையும் படிங்க: அதிமுகவில் ஓரணியில் திரளும் அதிருப்தி ’தலைகள்’... 13 தோல்வி பழனிசாமிக்கு எதிராக ’மூவர் அணி’ அதிரடி மூவ்...!