விழுப்புரம் மாவட்டம் திண்டிவனத்தில் நடைபெற்ற அதிமுக செயல்வீரர்கள் கூட்டத்தில் அக்கட்சியின் முன்னாள் அமைச்சரும், மாவட்டச் செயலாளருமான சி.வி. சண்முகம் கலந்துகொண்டு உரையாற்றினார். 2026 சட்டமன்றத் தேர்தலை முன்னிட்டு அதிமுக-வின் கூட்டணி மற்றும் புதிய அரசியல் சக்திகளின் வருகை குறித்து அவர் ஆற்றியப் பேச்சு தொண்டர்களிடையே உற்சாகத்தை ஏற்படுத்தியது.

அதிமுக-வுடன் கூட்டணி அமைக்க யாரும் முன்வரவில்லை என்று கேலி செய்தார்கள். ஆனால், இன்று எடப்பாடி பழனிசாமி தலைமையில் பாஜக, பாமக, அமமுக, புரட்சி பாரதம் என ஒரு பிரம்மாண்டமானத் தேசிய ஜனநாயகக் கூட்டணியை (NDA) அதிமுக அமைத்துள்ளது. மோடி முன்னிலையில் நாங்கள் நடத்தியப் பொதுக்கூட்டமே எங்களின் வலிமைக்குச் சாட்சி. ஆனால், அசைக்க முடியாதக் கூட்டணி என்று மார்தட்டிய திமுக கூட்டணி இன்று கலகலத்துப் போயுள்ளது. தொகுதிகள் ஒதுக்கீட்டில் இழுபறி நீடிப்பதால், திமுக கூட்டணி சிதறி வருகிறது" எனத் தெரிவித்தார்.

இதையும் படிங்க: சுடுகாட்டில் வடிவேலு புலம்புவது போல முதல்வர் புலம்புகிறார்: மதுரையில் செல்லூர் ராஜு கிண்டல்!

தமிழக வெற்றிக் கழகத் தலைவர் விஜய்யை மறைமுகமாகச் சாடிய அவர், "சினிமா தியேட்டரில் விசில் அடிக்கலாம்; பேருந்தை நிறுத்த விசில் அடிக்கலாம். ஆனால், அதிமுக-விற்கு மக்கள் வாக்களிப்பதை எந்தக் கொம்பனாலும் நிறுத்த முடியாது. தமிழ்நாட்டில் ஒவ்வொரு 10 ஆண்டுகளுக்கும் ஒரு புதியக் கட்சி முளைக்கும்; அதைப் பற்றி எங்களுக்குக் கவலையில்லை. அன்று வைகோ, மூப்பனார் முதல் இன்று திமுக-விடம் பிச்சை எடுத்துக் கொண்டிருக்கும் கமல்ஹாசன் வரை எல்லாரையும் மக்கள் பார்த்துவிட்டார்கள். நாளை சிலம்பரசன் கூட வரலாம்; ஆனால் அதிமுக-வை யாராலும் அசைக்க முடியாது" என ஆவேசமாகப் பேசினார்.

யார் வந்தாலும், யார் போனாலும் அதிமுக-வின் நிரந்தர எதிரி திமுக தான். கடந்த இரண்டு மாதங்களில் அரசியல் களம் அதிமுக-விற்குச் சாதகமாக மாறியுள்ளது. வரும் தேர்தலில் அதிமுக தலைமையிலானக் கூட்டணி அமோக வெற்றி பெற்று, எடப்பாடி பழனிசாமி மீண்டும் முதலமைச்சராகப் பொறுப்பேற்பது காலத்தின் கட்டாயம் என சி.வி. சண்முகம் முழங்கினார். இக்கூட்டத்தில் திண்டிவனம் மற்றும் சுற்றுவட்டாரப் பகுதிகளைச் சேர்ந்த ஆயிரக்கணக்கான அதிமுக நிர்வாகிகள் கலந்துகொண்டனர்.

இதையும் படிங்க: விசில் ஊத தடை! சிவகங்கை திமுக கவுன்சிலரின் செயலால் தூய்மை பணியாளர்கள் அதிர்ச்சி!