அமெரிக்காவில் இருந்து 116 சட்டவிரோத குடியேறிகளை ஏற்றிச் சென்ற விமானம் சனிக்கிழமை இரவு அமிர்தசரஸ் சர்வதேச விமான நிலையத்தில் தரையிறங்கியது. சட்டவிரோத குடியேற்றத்தை ஒடுக்குவதற்கான வாக்குறுதியின் ஒரு பகுதியாக, அமெரிக்க அதிபர் டொனால்ட் டிரம்ப் நிர்வாகத்தால் நாடு கடத்தப்படும் இரண்டாவது தொகுதி இந்தியர்கள் இதுவாகும். விமானம் எதிர்பார்க்கப்பட்ட இரவு 10 மணிக்குப் பதிலாக இரவு 11:30 மணிக்கு விமான நிலையத்தில் தரையிறங்கியது.

நாடுகடத்தப்பட்டவர்கள் விலங்குகளை அணிந்திருந்தார்களா என்பது உடனடியாகத் தெரியவில்லை. பிப்ரவரி 5 ஆம் தேதி முதல் தொகுதி சட்டவிரோத குடியேறிகள் நாடு கடத்தப்பட்ட பிறகு, பஞ்சாபிலிருந்து நாடுகடத்தப்பட்டவர்களில் பெரும்பாலோர் தங்கள் குடும்பங்களுக்கு சிறந்த வாழ்க்கைக்காக அமெரிக்கா செல்ல விரும்புவதாகக் கூறியிருந்தனர்.

இருப்பினும், அவர்கள் அமெரிக்க எல்லையில் பிடிக்கப்பட்டு, கை விலங்கு மாட்டப்பட்டு திருப்பி அனுப்பப்பட்டபோது அவர்களது கனவுகள் சிதைந்தன. விமானத்தில் 119 புலம்பெயர்ந்தோர் இருப்பார்கள் என்று தகவல்கள் வந்ததாகவும், ஆனால் இப்போது பயணிகள் பட்டியலின்படி, இரண்டாவது தொகுதியில் நாடு கடத்தப்பட வேண்டியவர்களின் எண்ணிக்கை 116 மட்டுமே இருந்ததாக கூறப்படுகிறது.

இதையும் படிங்க: அமெரிக்காவிலிருந்து இன்று நாடு கடத்தப்படும் 119 இந்தியர்கள்… விமானத்தை தரையிறக்க முதல்வர் கடும் எதிர்ப்பு..!

நாடு கடத்தப்பட்டவர்களில் பஞ்சாபிலிருந்து 65 பேர், ஹரியானாவிலிருந்து 33 பேர், குஜராத்திலிருந்து எட்டு பேர், உத்தரபிரதேசம், கோவா, மகாராஷ்டிரா, ராஜஸ்தானிலிருந்து தலா இரண்டு பேர், இமாச்சலப் பிரதேசம் மற்றும் ஜம்மு-காஷ்மீரிலிருந்து தலா ஒருவர் அடங்குவர். நாடுகடத்தப்பட்டவர்களில் பெரும்பாலோர் 18 முதல் 30 வயதுக்குட்பட்டவர்கள் என்றும் கூறப்படுகிறது. குடும்பத்தினர் அவர்களை வரவேற்க விமான நிலையத்திற்கு வந்தனர்.

157 நாடுகடத்தப்பட்டவர்களை ஏற்றிச் செல்லும் மூன்றாவது விமானம் இன்று அதாவது பிப்ரவரி 16 ஆம் தேதி இந்தியாவை வந்தடையும் என்று அதிகாரப்பூர்வ வட்டாரங்கள் தெரிவித்தன. பிப்ரவரி 5 ஆம் தேதி, 104 சட்டவிரோத இந்திய குடியேறிகளை ஏற்றிச் சென்ற அமெரிக்க இராணுவ விமானம் அமிர்தசரஸ் விமான நிலையத்தில் தரையிறங்கியது. இவர்களில் தலா 33 பேர் ஹரியானா மற்றும் குஜராத்தைச் சேர்ந்தவர்கள், 30 பேர் பஞ்சாபைச் சேர்ந்தவர்கள்.

நாடுகடத்தப்பட்டவர்களின் உறவினர்கள், விவசாய நிலங்களையும் கால்நடைகளையும் அடமானம் வைத்து பணம் திரட்டியதாகவும், இதனால் அவர்களை பிரகாசமான எதிர்காலத்திற்காக வெளிநாடுகளுக்கு அனுப்பி வைத்ததாகவும் கூறுகின்றனர். தாண்டா பகுதியில் உள்ள குராலா கலான் கிராமத்தில் வசிக்கும் தல்ஜித் சிங்கின் குடும்பத்தினர், ஒரு ஏஜெண்ட் தங்களை ஏமாற்றியதாகக் கூறினர்.தல்ஜித்தின் மனைவி கமல்ப்ரீத் கவுர், தனது கணவரை ஏஜெணட் ஏமாற்றி,அமெரிக்காவிற்கு நேரடி விமானம் மூலம் அழைத்துச் செல்வதாக உறுதியளித்து, சட்டவிரோத வழிகளில் அழைத்துச் சென்றதாகக் குற்றம் சாட்டினார்.

இதையும் படிங்க: அம்ரித்சர் வந்த நாடு கடத்தப்பட்ட இந்தியர்கள்.. அமெரிக்க ராணுவ விமானத்தில் பயணம்