டில்லி உயர் நீதிமன்ற நீதிபதியாக இருந்த யஷ்வந்த் வர்மாவின் வீட்டில் கடந்த மார்ச் 14, 2025 அன்று நள்ளிரவில் தீ விபத்து ஏற்பட்டது. தீயணைப்பு வீரர்கள் தீயை அணைக்கச் சென்றபோது, அவரது அதிகாரப்பூர்வ இல்லத்தில் ஒரு அறையில் பாதி எரிந்த நிலையில் மூட்டை மூட்டையாக 500 ரூபாய் நோட்டுகள் கிடைத்தன. இந்த சம்பவம் நாடு முழுவதும் பெரும் பரபரப்பை ஏற்படுத்தியது. 

இதையடுத்து, உச்ச நீதிமன்ற தலைமை நீதிபதி சஞ்சீவ் கண்ணாவின் உத்தரவின் பேரில், மூன்று நீதிபதிகள் கொண்ட குழு அமைக்கப்பட்டு, இந்த விவகாரம் குறித்து விசாரணை தொடங்கியது. இந்தக் குழுவில் பஞ்சாப் மற்றும் ஹரியானா உயர் நீதிமன்ற தலைமை நீதிபதி ஷீல் நாகு, இமாச்சலப் பிரதேச உயர் நீதிமன்ற தலைமை நீதிபதி ஜி.எஸ். சந்தவாலியா, மற்றும் கர்நாடக உயர் நீதிமன்ற நீதிபதி அனு சிவராமன் ஆகியோர் இடம்பெற்றனர்.

 இந்த விசாரணையில், நீதிபதி வர்மாவும் அவரது குடும்பத்தினரும் அந்த அறையை மறைமுகமாகவோ அல்லது நேரடியாகவோ கட்டுப்படுத்தியதாக குழு கண்டறிந்தது. இதனைத் தொடர்ந்து, அவரை பதவி நீக்கம் செய்ய பரிந்துரை செய்யப்பட்டு, அறிக்கை மே மாதம் ஜனாதிபதி திரௌபதி முர்மு மற்றும் பிரதமர் நரேந்திர மோடிக்கு அனுப்பப்பட்டது. 

இதையும் படிங்க: முடிச்சு வுட்டீங்க போங்க!! நீதிபதி சீட்டு கிழியுறது கன்பார்ம்! சபாநாயகரிடம் எம்.பிக்கள் லெட்டர்..!

ஆனால், இந்த உள் விசாரணையின் சட்டப்பூர்வத்தன்மையை எதிர்த்து, நீதிபதி யஷ்வந்த் வர்மா உச்ச நீதிமன்றத்தில் மனு தாக்கல் செய்தார். இந்த வழக்கு ஜூலை 30, 2025 அன்று நீதிபதிகள் தீபங்கர் தத்தா மற்றும் ஏ.ஜி. மாசி அமர்வு முன்பு விசாரணைக்கு வந்தது. வர்மாவின் வழக்கறிஞரான மூத்த வழக்கறிஞர் கபில் சிபல், உள் விசாரணைக் குழுவின் பரிந்துரை அரசியலமைப்பிற்கு எதிரானது என்று வாதிட்டார். 

அரசியலமைப்பின் 124 மற்றும் 218-வது பிரிவுகளின்படி, நீதிபதிகளை பதவி நீக்கம் செய்யும் அதிகாரம் பாராளுமன்றத்திற்கு மட்டுமே உள்ளது என்றும், உள் விசாரணை இந்த அதிகாரத்தை பறிக்கிறது என்றும் அவர் கூறினார். மேலும், விசாரணையில் நியாயமான வாய்ப்பு வழங்கப்படவில்லை, முக்கிய ஆதாரங்களை ஆராயவோ, சாட்சிகளை விசாரிக்கவோ அனுமதிக்கப்படவில்லை என்றும் சிபல் வாதிட்டார். 

நீதிபதிகள், வர்மாவின் நடத்தை குறித்து கடுமையான கவலை தெரிவித்தனர். "நீங்க ஏன் விசாரணைக் குழு முன்னாடி ஆஜராகி உங்க பக்கத்தை உடனே விளக்கல? ஏன் இவ்வளவு காலம் காத்திருந்து இப்போ உச்ச நீதிமன்றத்துக்கு வந்தீங்க?" எனக் கேள்வி எழுப்பினர். மேலும், விசாரணைக் குழுவின் அறிக்கையை எதிர்த்து முன்னரே நீதிமன்றத்தை அணுகியிருக்க வேண்டும் என்றும் கூறினர். 

"உங்க நடத்தை நம்பிக்கையை ஏற்படுத்தல. இந்த விவகாரத்துல உங்களோட பதில் திருப்திகரமா இல்லை," என நீதிபதிகள் தெரிவித்தனர். நீதிபதி வர்மா, தனது மனுவில், அந்த அறையில் பணம் வைக்கப்பட்டதற்கு தனக்கோ அல்லது குடும்பத்தினருக்கோ எந்தத் தொடர்பும் இல்லை என்றும், இது ஒரு சதி என்றும் வாதிட்டார். 

ஆனால், விசாரணைக் குழு, அந்த அறைக்கு அவரது கட்டுப்பாடு இருந்ததாகவும், பணத்தின் மூலம் குறித்து திருப்திகரமான விளக்கம் அளிக்கப்படவில்லை என்றும் கூறியது. இதனால், இந்த வழக்கு நீதித்துறையின் ஒருமைப்பாடு மற்றும் பொறுப்புக்கூறல் குறித்து பெரும் விவாதத்தை எழுப்பியுள்ளது. 

நீதிபதிகள் இறுதியாக, "இந்த விவகாரத்துல இன்னும் ஆழமா ஆராய வேண்டியிருக்கு. உங்க வாதங்களை கவனமா பரிசீலிக்கணும்," எனக் கூறி, தீர்ப்பை தேதி குறிப்பிடாமல் தள்ளிவைத்தனர். இந்த வழக்கு, இந்திய நீதித்துறையில் ஒரு முக்கியமான தருணமாக பார்க்கப்படுகிறது, ஏனெனில் ஒரு உயர் நீதிமன்ற நீதிபதிக்கு எதிரான முதல் முறையான பதவி நீக்க நடவடிக்கை இதுவாக இருக்கலாம்.

இதையும் படிங்க: பதவி நீக்கமா? வேணாமே! கட்டுக்கட்டாய் சிக்கிய பணம்! பதறிப்போன நீதிபதி!