2026 ஆசிய விளையாட்டுப் போட்டியில் இந்தியாவுக்கு மற்றுமொரு வரலாற்றுச் சாதனை கிடைத்துள்ளது. வில்வித்தையின் மகளிர் ரீகர்வ் அணிகள் பிரிவில் இந்திய அணி தங்கப் பதக்கத்தை வென்று அசத்தியுள்ளது.

நகோயாவில் உள்ள ஒகசாகி மைதானத்தில் நடைபெற்ற இறுதிப்போட்டியில், இந்தியாவின் கும்கும், அங்கிதா மற்றும் கீர்த்தி ஆகியோர் அடங்கிய அணி, வில்வித்தையில் பலம் வாய்ந்த தென் கொரிய அணியை எதிர்கொண்டது. இதில் யுன்ஜி லீ, சேயங் காங் மற்றும் யேஜின் ஓ ஆகியோர் தென் கொரிய அணிக்காக களமிறங்கினர்.

போட்டியின் ஆரம்பம் முதலே இரு அணிகளுக்கும் இடையே கடுமையான போட்டி நிலவியது. முதல் செட்டில் இந்தியா மற்றும் தென் கொரியா தலா 54 புள்ளிகளைப் பெற்றதால் 1-1 என சமநிலை ஏற்பட்டது.

இதையும் படிங்க: 45 ரன்னில் சுருண்ட இலங்கை! இந்தியாவின் அசத்தல் வெற்றி! பாகிஸ்தானுடன் இறுதிப்போட்டியில் மோதல்!

இதையடுத்து நடைபெற்ற இரண்டாவது செட்டில் தென் கொரிய அணி 56 புள்ளிகளைப் பெற்றது. இந்திய அணியின் கும்கும் கடைசி நேரத்தில் அடுத்தடுத்து இரண்டு முறை 10 புள்ளிகளை எய்தி, இந்திய அணியை 56-56 என்ற சமநிலைக்கு கொண்டு வந்தார். இதனால் செட் கணக்கு 2-2 ஆனது.

மூன்றாவது செட்டில் இந்திய வீராங்கனைகள் தங்களது அம்புகளை மிகவும் துல்லியமாக இலக்கை நோக்கி செலுத்தினர். இதன் மூலம் 55-51 என்ற புள்ளிகள் கணக்கில் அந்த செட்டை இந்திய அணி கைப்பற்றியது. இதனால் இந்தியா 4-2 என்ற முன்னிலை பெற்றது.

தங்கப் பதக்கத்தை தீர்மானிக்கும் வகையில் அமைந்த நான்காவது செட்டிலும் பரபரப்பு நீடித்தது. தென் கொரியா 54 புள்ளிகளைப் பெற்ற நிலையில், இந்திய அணிக்காக கீர்த்தி மற்றும் அங்கிதா தலா 9 புள்ளிகளைப் பெற்றனர்.

கடைசி அம்பை எய்யும் பொறுப்பு கும்குமிடம் வந்தபோது இந்திய அணிக்கு மிகுந்த அழுத்தம் ஏற்பட்டது. ஆனால் அந்தச் சூழலையும் சிறப்பாகக் கையாண்ட கும்கும், தனது கடைசி அம்பை 10 புள்ளிகள் கிடைக்கும் வகையில் துல்லியமாக இலக்கில் செலுத்தினார். இதனால் அந்த செட்டும் 54-54 என சமநிலையில் முடிந்தது.

இதன் மூலம் செட் கணக்கில் 5-3 என்ற முன்னிலையுடன் தென் கொரியாவை இந்திய மகளிர் அணி வீழ்த்தி தங்கப் பதக்கத்தை கைப்பற்றியது.

இந்த வெற்றியின் மூலம் ஆசிய விளையாட்டுப் போட்டியில் தென் கொரியாவின் நீண்டகால ஆதிக்கத்துக்கும் இந்திய வீராங்கனைகள் முற்றுப்புள்ளி வைத்துள்ளனர்.

1978ஆம் ஆண்டு முதல் ஆசிய விளையாட்டுப் போட்டியில் மகளிர் ரீகர்வ் அணிகள் பிரிவு இடம்பெற்று வருகிறது. அந்தப் பிரிவு அறிமுகமானது முதல் இதுவரை நடைபெற்ற அனைத்து ஆசிய விளையாட்டுப் போட்டிகளிலும் தென் கொரிய அணியே தங்கப் பதக்கத்தை வென்று வந்தது.

மேலும், அந்த அணியால் இதுவரை எந்த இறுதிப்போட்டியிலும் தோல்வியை சந்திக்காமல் இருந்த நிலையில், இந்திய மகளிர் அணி அந்த சாதனைப் பயணத்தையும் முடிவுக்கு கொண்டு வந்துள்ளது.

ஆசிய விளையாட்டுப் போட்டி வரலாற்றில் முதல்முறையாக மகளிர் ரீகர்வ் அணிகள் பிரிவு இறுதிப்போட்டிக்கு முன்னேறிய இந்திய அணி, முதல் வாய்ப்பிலேயே தங்கப் பதக்கத்தை வென்று சாதனை படைத்துள்ளது.

கும்கும், அங்கிதா மற்றும் கீர்த்தி ஆகியோரின் இந்த வரலாற்று வெற்றிக்கு நாடு முழுவதும் பாராட்டுகள் குவிந்து வருகின்றன.

இதையும் படிங்க: போர்ச்சுகல் அணியில் இருந்து ரொனால்டோ விலகல்.. ரசிகர்கள் ஷாக்..!! பின்னணி என்ன?