தமிழகத்தின் புதிய முதலமைச்சராகப் பதவியேற்க உள்ள தமிழக வெற்றிக் கழகத் தலைவர் விஜய், சற்று நேரத்திற்கு முன்னால் தனது நீலாங்கரை இல்லத்திலிருந்து பிரம்மாண்ட வாகன அணிவகுப்புடன் விழா நடைபெறும் நேரு உள்விளையாட்டு அரங்கம் நோக்கிப் புறப்பட்டார்.

இன்று காலை தனது இல்லத்தில் எளிய முறையில் வழிபாடு செய்த விஜய், சரியாகத் தனது இல்லத்திலிருந்து கான்வாய் பாதுகாப்பு வாகனங்கள் புடைசூழப் புறப்பட்டார்.நீலாங்கரை முதல் நேரு விளையாட்டரங்கம் வரையிலான கிழக்குக் கடற்கரைச் சாலை (ECR) முழுவதும் பல்லாயிரக்கணக்கான பொதுமக்கள் மற்றும் தொண்டர்கள் திரண்டு நின்று அவருக்கு வாழ்த்துகளைத் தெரிவித்து வருகின்றனர். விஜய்யின் கார் செல்லும் பாதையெங்கும் மலர்களைத் தூவியும், தமிழகத்தின் முதல்வரே என முழக்கமிட்டும் மக்கள் அவரை உற்சாகப்படுத்தி வருகின்றனர்.

விஜய்யின் பயணத்தை முன்னிட்டு நீலாங்கரை முதல் பெரியமேடு வரை பலத்த போலீஸ் பாதுகாப்பு போடப்பட்டுள்ளது. முக்கியச் சாலைகளில் போக்குவரத்துச் சீரமைக்கப்பட்டு, முதல்வரின் வாகன அணிவகுப்பு தடையின்றிச் செல்ல வழிவகை செய்யப்பட்டுள்ளது. இன்னும் சில நிமிடங்களில் விஜய் பதவியேற்பு விழா நடைபெறும் ஜவஹர்லால் நேரு உள்விளையாட்டு அரங்கத்தை வந்தடைவார் என எதிர்பார்க்கப்படுகிறது.

இதையும் படிங்க: விஜய் பதவியேற்பு விழா நேரலை! மெரினா முதல் கோயம்பேடு வரை 20 இடங்களில் எல்.இ.டி திரைகள்!

ராகுல் காந்தி உள்ளிட்ட தேசிய மற்றும் மாநிலத் தலைவர்கள் ஏற்கனவே அரங்கிற்கு வரத் தொடங்கியுள்ள நிலையில், விஜய்யின் வருகைக்காக லட்சக்கணக்கான ரசிகர்கள் ஆவலோடு காத்திருக்கின்றனர். சரியாக காலை 10:00 மணிக்கு ஆளுநர் அர்லேகர் முன்னிலையில் விஜய் தமிழகத்தின் முதலமைச்சராகப் பொறுப்பேற்க உள்ளார்.

தமிழகத்தின் அரசியல் வரலாற்றில் ஒரு புதிய அத்தியாயம் இன்னும் சில நிமிடங்களில் தொடங்கவுள்ளது.

இதையும் படிங்க: இன்று தமிழக முதல்வராக பதவியேற்கிறார் விஜய்! நேரு விளையாட்டரங்கில் காலை 10 மணிக்கு பிரம்மாண்ட விழா!