ஜப்பானில் நடைபெற்று வரும் 2026 ஆசிய விளையாட்டுப் போட்டியில் இந்தியாவுக்கு மேலும் ஒரு தங்கப்பதக்கம் கிடைத்துள்ளது. மகளிருக்கான தனிநபர் கோல்ஃப் இறுதிப்போட்டியில் இந்திய வீராங்கனை பிரணவி சரத் தங்கப்பதக்கம் வென்று வரலாற்றுச் சாதனை படைத்துள்ளார். 23 வயதான பிரணவி, ஆசிய விளையாட்டில் மகளிர் தனிநபர் கோல்ஃப் பிரிவில் இந்தியாவுக்கு முதல்முறையாக தங்கம் பெற்றுத் தந்துள்ளார்.

அய்ச்சி-நகோயா பகுதியில் நடைபெற்று வரும் ஆசிய விளையாட்டில் மகளிர் கோல்ஃப் போட்டி மிகுந்த எதிர்பார்ப்பை ஏற்படுத்தியிருந்தது. இறுதிச்சுற்றில் சிறப்பாக விளையாடிய பிரணவி சரத், நான்கு சுற்றுகளிலும் மொத்தம் 265 ஸ்ட்ரோக்குகளை பதிவு செய்தார். அவரது சுற்று வாரியான ஸ்கோர் 66, 63, 66, 70 ஆக அமைந்தது. குறைந்த எண்ணிக்கையிலான ஸ்ட்ரோக்குகளில் போட்டியை நிறைவு செய்ததன் மூலம் அவர் முதலிடத்தை பிடித்து தங்கப்பதக்கத்தை கைப்பற்றினார்.

பிரணவிக்கு கடும் போட்டி அளித்த சீன வீராங்கனை 266 ஸ்ட்ரோக்குகளுடன் வெள்ளிப்பதக்கம் வென்றார். சிங்கப்பூர் வீராங்கனையும் 266 ஸ்ட்ரோக்குகளை பதிவு செய்து வெண்கலப்பதக்கத்தை பெற்றார். வெறும் ஒரு ஸ்ட்ரோக் வித்தியாசத்தில் முன்னிலை பெற்ற பிரணவி சரத், தங்கத்தை தன்வசப்படுத்தி இந்திய ரசிகர்களுக்கு மகிழ்ச்சியை ஏற்படுத்தியுள்ளார்.

இதையும் படிங்க: பாகிஸ்தானை பந்தாடிய இந்தியா! ஆசிய விளையாட்டில் மீண்டும் தங்க வேட்டை! அபிஷேக் அதிரடி... திலக் மிரட்டல்!

ஆசிய விளையாட்டில் மகளிர் கோல்ஃப் பிரிவில் இந்தியா தங்கம் வெல்வது இதுவே முதல் முறையாகும். இதற்கு முன்பு 2002-ம் ஆண்டு ஆடவர் தனிநபர் கோல்ஃப் பிரிவில் ஷிவ் கபூர் இந்தியாவுக்காக தங்கம் வென்றிருந்தார். தற்போது பிரணவி சரத் மகளிர் பிரிவில் அந்த சாதனைப் பட்டியலில் புதிய வரலாற்றை எழுதியுள்ளார்.

23 வயதிலேயே ஆசிய அளவிலான மிகப்பெரிய விளையாட்டு அரங்கில் தங்கம் வென்றிருப்பது பிரணவியின் விளையாட்டு வாழ்க்கையில் முக்கிய மைல்கல்லாக பார்க்கப்படுகிறது. அவரது வெற்றிக்கு இந்திய விளையாட்டு ரசிகர்கள் மற்றும் சக வீரர்கள் வாழ்த்து தெரிவித்து வருகின்றனர்.

இந்த தங்கத்தின் மூலம் இந்தியாவின் ஆசிய விளையாட்டு பதக்க எண்ணிக்கையும் மேலும் உயர்ந்துள்ளது. இதுவரை இந்தியா 18 தங்கம், 25 வெள்ளி, 35 வெண்கலம் என மொத்தம் 78 பதக்கங்களை கைப்பற்றி பதக்கப் பட்டியலில் 5-வது இடத்தில் நீடித்து வருகிறது. கோல்ஃப் மைதானத்தில் பிரணவி சரத் நிகழ்த்திய இந்த வரலாற்று சாதனை, இந்தியாவின் பதக்க வேட்டையில் மற்றொரு முக்கிய வெற்றியாக அமைந்துள்ளது.

இதையும் படிங்க: 45 ரன்னில் சுருண்ட இலங்கை! இந்தியாவின் அசத்தல் வெற்றி! பாகிஸ்தானுடன் இறுதிப்போட்டியில் மோதல்!