வணிக ரீதியான எல்பிஜி (எரிபொருள் வாயு) சிலிண்டர்கள் வழங்கல் நேற்று முதல் திடீரென நிறுத்தப்பட்டதால், நகரின் ஓட்டல் உரிமையாளர்களும் ஆட்டோ ஓட்டுநர்களும் பெரும் சிரமத்திற்கு ஆளாகியுள்ளனர். இந்தத் தட்டுப்பாடு இரண்டாவது நாளாகத் தொடர்வதால் பிரச்சினை மேலும் தீவிரமடைந்துள்ளது.

சென்னையில் சுமார் 30,000-க்கும் மேற்பட்ட ஆட்டோக்கள் எல்பிஜி கியாஸ் மூலம் இயங்கி வருகின்றன. இவை பெரும்பாலும் அன்றாட வாழ்வாதாரத்திற்காகப் பயன்படுத்தப்படும் முக்கிய போக்குவரத்து வாகனங்கள். ஆனால், கியாஸ் நிரப்பும் நிலையங்களில் போதிய அளவு ஸ்டாக் இல்லாததால், பல மையங்கள் மூடப்பட்டுள்ளன. மீதமுள்ள சில இடங்களிலும் நீண்ட வரிசைகள் நீடிப்பதால், ஆட்டோ ஓட்டுநர்கள் மணிக்கணக்கில் காத்திருக்க வேண்டிய நிலை ஏற்பட்டுள்ளது. இதனால், பெரும்பாலான எல்பிஜி ஆட்டோக்கள் இயங்க முடியாமல் ஆங்காங்கே நிறுத்தப்பட்டுள்ளன.

பள்ளி மாணவர்கள், அலுவலக ஊழியர்கள், பொது மக்கள் உள்ளிட்டோர் பயண சிரமத்திற்கு ஆளாகியுள்ளனர். குறிப்பாக காலை மற்றும் மாலை நேரங்களில் ஆட்டோக்கள் கிடைக்காமல் பலர் தவித்து வருகின்றனர். இதனால் போக்குவரத்து செலவு அதிகரிப்பதோடு, நேர விரயமும் ஏற்படுகிறது. ஆட்டோ தொழிற்சங்க தலைவரும் ஓட்டுநருமான பாலசுப்பிரமணியன் இது குறித்து கூறுகையில், "சென்னையில் எல்பிஜி கியாஸில் இயங்கும் ஆட்டோக்கள் கணிசமான எண்ணிக்கையில் உள்ளன. ஆனால், போதுமான நிரப்பு மையங்கள் இல்லாத நிலை உருவாகியுள்ளது.

இதையும் படிங்க: எரிவாயு தட்டுப்பாடு - பாக்.-ல் 2 வாரம் ஸ்கூல் லீவு..!! அரசு ஊழியர்களுக்கு வாரம் 4 நாள் தான் வேலை..!!

தற்போதைய தட்டுப்பாடு காரணமாக கியாஸ் நிரப்ப முடியாமல் ஆட்டோக்கள் முழுமையாக ஓட முடியாத நிலை ஏற்பட்டுள்ளது. பல மையங்கள் மூடப்பட்டு விட்டன. சில இடங்களில் நீண்ட நேரம் வரிசையில் காத்திருந்தாலும் கியாஸ் கிடைப்பது சந்தேகமே. இதனால் எங்களது தினசரி வருமானம் பெரிதும் பாதிக்கப்பட்டுள்ளது. அன்றாட உழைப்பாளர்களின் வாழ்வாதாரம் கேள்விக்குறியாகியுள்ளது" என்று வேதனை தெரிவித்தார்.

இதேபோல், ஓட்டல் உரிமையாளர்களும் கடும் நெருக்கடியில் உள்ளனர். வணிக சிலிண்டர்கள் வழங்கல் நிறுத்தப்பட்டதால், சமையல் செய்ய முடியாமல் பல உணவகங்கள் மெனு குறைத்துள்ளன. சில இடங்களில் செயல்பாடுகள் முழுமையாக பாதிக்கப்பட்டுள்ளன. இது உணவு விநியோகம், மாணவர்கள், அலுவலக ஊழியர்கள், மருத்துவமனைகளுக்கு உணவு அளிப்போர் உள்ளிட்ட பல தரப்பினரை பாதிக்கும் என்ற அச்சம் நிலவுகிறது. இந்தத் தட்டுப்பாடு மத்திய கிழக்கு பிராந்தியத்தில் ஏற்பட்டுள்ள பதற்றம் காரணமாக உலக அளவில் எல்பிஜி விநியோக சங்கிலி பாதிக்கப்பட்டதால் ஏற்பட்டுள்ளதாகத் தகவல்கள் தெரிவிக்கின்றன.

அரசு உடனடியாக தலையிட்டு வணிகப் பயன்பாட்டிற்கான எல்பிஜி விநியோகத்தை மீட்டெடுக்க வேண்டும் என்ற கோரிக்கை வலுத்து வருகிறது. இந்நிலையில், பொதுமக்கள் மாற்று ஏற்பாடுகளைத் தேட வேண்டிய கட்டாயம் ஏற்பட்டுள்ளது. ஆட்டோ ஓட்டுநர்களும் ஓட்டல் உரிமையாளர்களும் நிவாரணம் கோரி அரசுக்கு மனு அனுப்பியுள்ளனர். விரைவில் தீர்வு காணப்படாவிட்டால், இந்தப் பிரச்சினை மேலும் விரிவடையும் அபாயம் உள்ளது.

இதையும் படிங்க: தலைவலி கொடுக்கும் காஸ் சிலிண்டர் தட்டுப்பாடு? களத்தில் இறங்கிய மத்திய அரசு!! பறக்கும் உத்தரவு!