தமிழ்நாடு சட்டமன்றத் தேர்தல் 2026 வரலாற்றில் ஒரு முக்கிய திருப்புமுனையைப் பதிவு செய்துள்ளது. கொளத்தூர் தொகுதியில் தமிழக வெற்றிக் கழக வேட்பாளர் வி.எஸ். பாபு, முதலமைச்சர் மு.க. ஸ்டாலினை சுமார் 9,000 வாக்குகள் வித்தியாசத்தில் தோற்கடித்து பெரும் அதிர்ச்சியை ஏற்படுத்தியுள்ளார். இந்த வெற்றிக்குப் பின்னர் அளித்த பேட்டியில், தனது பழைய உறவு மற்றும் புதிய அரசியல் பயணத்தைப் பற்றி பாபு உணர்ச்சி பொங்க பேசியுள்ளார். அவரது வார்த்தைகள் “என்னை வைத்துதான் ஸ்டாலின் ஜெயிச்சாரு.. இப்போ ஸ்டாலினை வைத்தே நான் ஜெயிச்சுட்டேன்” என்றார்.

வி.எஸ். பாபு, 75 வயதான அரசியல் அனுபவசாலி. ஒரு காலத்தில் தி.மு.க.வின் வட சென்னை மாவட்ட செயலாளராக இருந்தவர். 2006 சட்டமன்றத் தேர்தலில் புரசைவாக்கம் தொகுதியில் இருந்து வெற்றி பெற்றவர். பின்னர் தொகுதி மறுசீரமைப்புக்குப் பிறகு கொளத்தூர் உருவானபோது, 2011 தேர்தலில் ஸ்டாலின் போட்டியிட்டபோது அவருக்கு தேர்தல் பொறுப்பாளராக இருந்து களத்தில் குதிரையாக உழைத்தவர்.

அந்தத் தேர்தலில் ஸ்டாலின் குறுகிய வித்தியாசத்தில் வென்றாலும், கட்சித் தலைமை பாபுவின் மீது அதிருப்தி கொண்டதாகக் கூறப்படுகிறது. பின்னர் தி.மு.க.வை விட்டு வெளியேறினார். அ.தி.மு.க.வுக்குச் சென்று, அங்கும் சில காலம் இருந்துவிட்டு, பின்னர் தவெக தலைவர் விஜயைச் சந்தித்து அக்கட்சியில் இணைந்தார்.

இதையும் படிங்க: தோற்றாலும் துவளாத திமுக தலைவர்..! நன்றி சொல்ல கொளத்தூருக்கு செல்லும் ஸ்டாலின்..!

கொளத்தூர் தொகுதி ஸ்டாலினின் கோட்டையாகக் கருதப்பட்டது. 2011 முதல் தொடர்ந்து வென்று வந்த இடம். 2021-ல் 70,000 வாக்குகள் வித்தியாசத்தில் வென்ற ஸ்டாலின், இந்த முறை தோல்வியைத் தழுவினார். பாபு 82,997 வாக்குகளும், ஸ்டாலின் 74,202 வாக்குகளும் பெற்றனர். இந்த வெற்றி தவெகவுக்கு மட்டுமல்ல, தமிழ்நாடு அரசியலுக்கே பெரும் அதிர்வலைகளை ஏற்படுத்தியுள்ளது. தவெக தனித்துப் போட்டியிட்டும் பெரும்பான்மைக்கு அருகில் சென்றுள்ள சூழலில், இந்த வெற்றி விஜய்யின் செல்வாக்கை மீண்டும் உறுதிப்படுத்தியது. 

இந்த நிலையில் தன்னுடைய வெற்றி குறித்து செய்தியாளர்களிடம் பேசிய MLA வி.எஸ். பாபு, 2006 முதல் 2011 வரை தான் எம்எல்ஏவாக இருந்ததாகவும் 2011 ஆம் ஆண்டு தன்னுடைய இடத்தை ஸ்டாலின் பெற்றதாகவும் தெரிவித்தார். இப்போது 2026 தேர்தலில் ஸ்டாலினின் இடத்தை தான் பெற்றதாக கூறியுள்ளார். விஜய் மிகுந்த மகிழ்ச்சியில் இருப்பதாகவும் இந்த புகழ் அனைத்தும் விஜய்க்கு தான் என்றும் கூறியுள்ளார்.

இதையும் படிங்க: தவெக அமைச்சரவையில் இடம்பெற போவது யார்..? விஜய் முக்கிய ஆலோசனை..!!