தமிழ்நாட்டில் 1993-94 காலகட்டத்தில் மறைந்த முதல்வர் ஜெயலலிதாவால் நேரு விளையாட்டரங்கம் கட்டப்பட்டதற்குப் பிறகு, கடந்த 30 ஆண்டுகளாக எவ்வித உருப்படியான விளையாட்டு உட்கட்டமைப்புகளும் உருவாக்கப்படவில்லை என்றும், தமிழ்நாட்டு அரசியல்வாதிகள் குஜராத் சென்று அங்குள்ள உலகத்தரம் வாய்ந்த விளையாட்டு உள்கட்டமைப்புகளைப் பார்த்துத் தெரிந்துகொள்ள வேண்டும் என்றும் பொதுப்பணி மற்றும் விளையாட்டு மேம்பாட்டுத்துறை அமைச்சர் ஆதவ் அர்ஜுனா மிகக் காட்டமாகத் தெரிவித்துள்ளார்.
சென்னை பெரியமேட்டில் அமைந்துள்ள ஜவஹர்லால் நேரு விளையாட்டரங்கில் நடைபெற்ற மந்தைவெளி செயின்ட் ஜான்ஸ் சீனியர் செகண்டரி பள்ளியின் 58-வது ஆண்டு விளையாட்டு விழாவில் சிறப்பு விருந்தினராகப் பங்கேற்று, வெற்றி பெற்ற மாணவ-மாணவிகளுக்குப் பரிசுகளை வழங்கிய பின்னர் அமைச்சர் ஆதவ் அர்ஜுனா செய்தியாளர்களைச் சந்தித்தார். அப்போது விளையாட்டுத்துறை வளர்ச்சி குறித்துப் பேசிய அவர், விளையாட்டு உட்கட்டமைப்பில் தமிழ்நாடு சுமார் 30 ஆண்டுகள் பின்னோக்கிச் சென்றுள்ளது. 1993-94-ல் ஜெயலலிதாவால் நேரு அரங்கம் புதுப்பிக்கப்பட்டதற்குப் பிறகு, இங்கு உருப்படியாக ஒரு மைதானமும் அமையவில்லை.
மோட்டார் ரேஸ் உள்ளிட்ட விளையாட்டுகளுக்குச் சென்னையில் முறையான மைதானங்கள் இல்லாததால்தான், இளைஞர்கள் ஈசிஆர் மற்றும் ஓஎம்ஆர் சாலைகளில் அதிவேகமாகப் பைக் ஓட்டி விபத்துகளில் சிக்குகின்றனர்; முறையான ரேஸ் டிராக்குகளை உருவாக்க வேண்டிய கட்டாயம் உள்ளது. இளைஞர்கள் விளையாட்டில் மகத்தான சாதனைகளைப் படைக்க வேண்டும் என்ற ஒற்றை நோக்கத்தில்தான் முதலமைச்சர் விஜய்யும், திரைப்பட நடிகர் அஜித்குமாரும் களத்தில் முழுமூச்சாக இயங்கி வருகின்றனர் என்று தெரிவித்தார்.
இதையும் படிங்க: தமிழக மக்களுக்கு குட் நியூஸ்.. அடுத்த மாதம் பவர்கட் பிரச்சனைக்கு தீர்வு!! அதிகாரிகள் தகவல்!!
தொடர்ந்து புதிய தலைமைச் செயலகம் மற்றும் அரசியல் விவகாரங்கள் குறித்துப் பேசிய அவர், எதிர்க்கட்சிகளின் விமர்சனங்களை அடியோடு நிராகரித்தார். புதிய தலைமைச் செயலக விவகாரத்தில் கம்யூனிஸ்ட் தோழர்களுக்கும் எங்களுக்கும் எந்தக் கொள்கை முரண்பாடும் கிடையாது; மண் பரிசோதனை மற்றும் பொதுமக்களுடனான ஆலோசனைகள் எனப் பல்வேறு கட்டப் பணிகள் விரிவாக மேற்கொள்ளப்பட்டு வருகின்றன.
கலைஞர் உருவாக்கிய ஓமந்தூரார் வளாகத்தைப் புதிய தலைமைச் செயலகமாக மாற்ற வேண்டும் என்று இப்போது பேசும் ஸ்டாலின், கடந்த ஐந்து ஆண்டுகள் முதலமைச்சராக ஆட்சியில் இருந்தபோது அதை ஏன் செய்யவில்லை? தற்போது ஏற்பட்டுள்ள மின்வெட்டுப் பிரச்னைகளுக்குக் கூட, முந்தைய திமுக ஆட்சியில் அந்தத் துறையில் போதிய பராமரிப்புப் பணிகளோ உட்கட்டமைப்பு மேம்பாடுகளோ செய்யப்படாததே முழுமுதல் காரணம் என்று அடுக்கடுக்கான குற்றச்சாட்டுகளை முன்வைத்தார்.
இதையும் படிங்க: பேருந்து கட்டணத்தை உயர்த்த கோரிய வழக்கு! 4 வாரங்களில் அறிக்கை தர தமிழக அரசுக்கு உயர்நீதிமன்றம் உத்தரவு!