ஸ்பாட்டிஃபை (Spotify) உலகின் மிகவும் பிரபலமான இசை ஸ்ட்ரீமிங் தளங்களில் ஒன்றாக விளங்குகிறது. 2008ஆம் ஆண்டு ஸ்வீடனில் தொடங்கப்பட்ட இந்த சேவை, தற்போது 180க்கும் மேற்பட்ட நாடுகளில் 600 மில்லியனுக்கும் அதிகமான பயனர்களைக் கொண்டுள்ளது. இதில் 236 மில்லியன் பயனர்கள் பிரீமியம் சந்தாதாரர்களாக உள்ளனர். 

ஸ்பாட்டிஃபை, இசை, podcasts, audio books-களை ஒரே இடத்தில் வழங்கி, பயனர்களுக்கு தனிப்பயனாக்கப்பட்ட அனுபவத்தை அளிக்கிறது. ஸ்பாட்டிஃபையின் முக்கிய அம்சங்களில் ஒன்று, அதன் செயற்கை நுண்ணறிவு அடிப்படையிலான பரிந்துரை அல்காரிதம் ஆகும். இது பயனர்களின் இசை விருப்பங்களை பகுப்பாய்வு செய்து, புதிய பாடல்கள் மற்றும் கலைஞர்களை அறிமுகப்படுத்துகிறது. 

“டிஸ்கவர் வீக்லி” மற்றும் “ரிலீஸ் ரேடார்” போன்ற பிளேலிஸ்ட்கள் இதற்கு சிறந்த உதாரணங்கள். மேலும், இந்த தளம் பல்வேறு மொழிகளில் உள்ள பாடல்களை வழங்குவதால், தமிழ் உள்ளிட்ட உள்ளூர் இசையும் பயனர்களுக்கு எளிதாகக் கிடைக்கிறது. இந்தியாவில் ஸ்பாட்டிஃபை 2019இல் அறிமுகமானது மற்றும் உள்ளூர் கலைஞர்களையும் பாட்காஸ்ட்களையும் மேம்படுத்துவதில் கவனம் செலுத்துகிறது. தமிழ், தெலுங்கு, இந்தி போன்ற மொழிகளில் உள்ள இசை மற்றும் “ரசிகன்” போன்ற பாட்காஸ்ட்கள் இந்திய பயனர்களிடையே பிரபலமாக உள்ளன. பிரீமியம் திட்டங்கள் மூலம் விளம்பரமில்லா இசை, ஆஃப்லைன் பதிவிறக்கம் மற்றும் உயர் ஒலித்தரம் ஆகியவற்றை ஸ்பாட்டிஃபை வழங்குகிறது.

சமீபத்தில், ஸ்பாட்டிஃபை AI-இயங்குதளமான “AI Playlist” அம்சத்தை அறிமுகப்படுத்தியது, இது பயனர்களின் உரை உள்ளீடுகளின் அடிப்படையில் பிளேலிஸ்ட்களை உருவாக்குகிறது. மேலும், கலைஞர்களுக்கு நியாயமான ஊதியம் வழங்குவது குறித்த விவாதங்களில் ஸ்பாட்டிஃபை தொடர்ந்து மையமாக உள்ளது. இதன் மூலம், இசைத் துறையில் புதுமைகளை அறிமுகப்படுத்தி, பயனர்களுக்கு தரமான அனுபவத்தை வழங்குவதில் ஸ்பாட்டிஃபை முன்னணியில் உள்ளது.

இந்நிலையில் ஸ்பாட்டிஃபை, பயனர்களுக்கு புதிய அனுபவத்தை வழங்கும் வகையில், பாடல், பாட்காஸ்ட் மற்றும் ஆடியோபுக் கேட்கும்போது நேரடியாக குறுஞ்செய்திகள் அனுப்பும் வசதியை அறிமுகப்படுத்தியுள்ளது. இந்த புதிய அம்சமான "மெசேஜஸ்" (Messages) மூலம், பயனர்கள் ஸ்பாட்டிஃபை ஆப்பில் இருந்து வெளியேறாமல், தங்களுக்கு பிடித்த இசை அல்லது ஒலி உள்ளடக்கங்களை நண்பர்கள் மற்றும் குடும்பத்தினருடன் பகிர்ந்து, உரையாட முடியும். இந்த வசதி 16 வயதுக்கு மேற்பட்ட பயனர்களுக்கு, தேர்ந்தெடுக்கப்பட்ட சந்தைகளில் மொபைல் சாதனங்களில் இந்த வாரம் முதல் கிடைக்கத் தொடங்கியுள்ளது. 

இந்த அம்சத்தைப் பயன்படுத்த, "நவ் பிளேயிங்" (Now Playing) திரையில் இசை அல்லது பாட்காஸ்ட் கேட்கும்போது, பகிர் (Share) ஐகானைத் தட்டி, நண்பரைத் தேர்ந்தெடுத்து அனுப்பலாம். பயனர்கள் ஏற்கனவே ஸ்பாட்டிஃபையில் ஜாம்ஸ், பிளெண்ட்ஸ் அல்லது கூட்டு பிளேலிஸ்ட்கள் மூலம் தொடர்பு கொண்டவர்களுடன் மட்டுமே உரையாட முடியும். மெசேஜ் கோரிக்கைகளை ஏற்கவோ, நிராகரிக்கவோ, தடுக்கவோ முடியும். இந்த உரையாடல்கள் தனிப்பட்ட முறையில் ஒருவருக்கு ஒருவர் மட்டுமே நடைபெறும். 

பயனர் பாதுகாப்பு மற்றும் தனியுரிமையை உறுதிப்படுத்த, செய்திகள் இன்டஸ்ட்ரி-ஸ்டாண்டர்ட் என்க்ரிப்ஷனுடன் பாதுகாக்கப்படுகின்றன, மேலும் தீங்கு விளைவிக்கும் உள்ளடக்கங்களை கண்காணிக்க ஸ்பாட்டிஃபை தொழில்நுட்பத்தைப் பயன்படுத்துகிறது.

இந்த அம்சம், இன்ஸ்டாகிராம், வாட்ஸ்அப், டிக்டாக் போன்ற வெளிப்புற தளங்களில் பகிர்வதற்கு மாற்றாக இல்லாமல், அவற்றை நிரப்புவதாக உருவாக்கப்பட்டுள்ளது. இதன் மூலம், பயனர்கள் இசையைப் பகிர்ந்து, உரையாடி, புதிய ரசிகர்களை உருவாக்குவதற்கு உதவுவதாக ஸ்பாட்டிஃபை தெரிவித்துள்ளது. இந்த புதிய முயற்சி, ஸ்பாட்டிஃபையை வெறும் இசை தளத்திலிருந்து சமூக ஊடக அனுபவமாகவும் மாற்றுவதற்கு முக்கிய படியாக அமைகிறது.