ஸ்மார்ட்போன்களில் பேட்டரி விரைவாக காலியாவது பலருக்கும் தொடர்ந்து வரும் பிரச்சினையாக உள்ளது. பலர் இதற்காக பவர் பேங்கை எப்போதும் கையில் வைத்திருப்பதை நாம் அடிக்கடி காண்கிறோம். ஸ்மார்ட்போன்களில் சில செயலிகள் (ஆப்ஸ்) பின்னணியில் அதிக அளவில் மின்சாரத்தை பயன்படுத்துவதால் இந்தப் பிரச்சினை ஏற்படுகிறது.

ஆண்ட்ராய்டு இயங்குதளத்தில், ஸ்கிரீன் ஆஃப் செய்யப்பட்ட நிலையிலும், ஆடியோ இசைப்பது, லொகேஷன் டிராக்கிங் போன்ற சில அவசியமான செயல்பாடுகளுக்காக சிபியு (CPU) தொடர்ந்து இயங்க வைக்க 'பார்ஷியல் வேக் லாக்' (Partial Wake Lock) என்ற தொழில்நுட்பம் உள்ளது. இது சில சமயங்களில் பயனருக்கு உதவியாக இருந்தாலும், சில செயலிகள் இதை தவறாகப் பயன்படுத்துகின்றன.

பயனர் அந்த செயலியை திறக்காமல் வைத்திருந்தாலும், பின்னணியில் தொடர்ந்து CPU-வை விழித்திருக்கச் செய்து பேட்டரியை விரைவாக காலி செய்கின்றன. இதனால் போனின் பேட்டரி ஆயுள் கணிசமாக குறைந்து விடுகிறது. இந்தப் பிரச்சினையை தீர்க்கும் வகையில் கூகுள் முக்கியமான மாற்றத்தை கொண்டு வருகிறது. கூகுள் பிளே ஸ்டோரில் இனி பேட்டரியை அதிகம் பயன்படுத்தும் செயலிகளை முன்கூட்டியே அடையாளம் காட்டும் வசதி அறிமுகப்படுத்தப்பட உள்ளது.

இதையும் படிங்க: அடடே..!! பட்ஜெட் விலையில் அட்டகாச அம்சங்கள்..!! போக்கோ ஸ்மார்ட்போனின் நியூ மாடல் இதுதான்..!!

குறிப்பாக, 'எக்ஸெஸிவ் பார்ஷியல் வேக் லாக்' (Excessive Partial Wake Lock) என்ற அளவுகோலை மீறும் செயலிகளுக்கு தெளிவான எச்சரிக்கை அறிவிப்பு காட்டப்படும். இந்த எச்சரிக்கை பின்வருமாறு இருக்கும்: “இந்த செயலி அதிக பின்னணி செயல்பாடு காரணமாக எதிர்பார்த்ததை விட அதிக பேட்டரியை பயன்படுத்தலாம்” (This app may use more battery than expected due to high background activity) என்று சிவப்பு நிறத்தில் தெளிவாகக் காட்டப்படும். இது செயலியின் ஸ்டார் ரேட்டிங் பகுதிக்கு கீழே தோன்றும்.

மேலும், கடந்த 28 நாட்களில் 5 சதவீதத்திற்கும் அதிகமான பயனர் அமர்வுகளில் (user sessions) ஒரு செயலி ஸ்கிரீன் ஆஃப் நிலையில் சராசரியாக குறைந்தபட்சம் 2 மணி நேரத்திற்கு மேல் non-exempted partial wake lock-ஐ வைத்திருந்தால், அது இந்த 'Excessive' பிரிவில் சேர்க்கப்படும். இத்தகைய செயலிகள் பிளே ஸ்டோரின் பரிந்துரை பட்டியல்கள், டிஸ்கவரி பிரிவுகள் போன்றவற்றில் காட்டப்படாமல் தவிர்க்கப்படும். இதனால் அவற்றின் பதிவிறக்க எண்ணிக்கை குறைய வாய்ப்புள்ளது.

இந்த மாற்றம் கடந்த ஆண்டு அறிவிக்கப்பட்டு, 2026 மார்ச் 1 முதல் படிப்படியாக அமல்படுத்தப்பட்டு வருகிறது. இதன் மூலம் பயனர்கள் செயலியை டவுன்லோடு செய்வதற்கு முன்பே பேட்டரி பிரச்சினை குறித்து தெரிந்து கொள்ள முடியும். மேலும், டெவலப்பர்கள் தங்கள் செயலிகளை பேட்டரி-சார்ந்து மேம்படுத்த வேண்டிய அழுத்தம் அதிகரிக்கும். இந்த நடவடிக்கை ஆண்ட்ராய்டு பயனர்களுக்கு பேட்டரி ஆயுளை நீட்டிக்க உதவும் ஒரு முக்கியமான படியாக அமையும். இனி பவர் பேங்க் இல்லாமல் நீண்ட நேரம் போனை பயன்படுத்த முடியும் என்ற நம்பிக்கை பயனர்களுக்கு ஏற்படும்.

இதையும் படிங்க: மார்கெட்டிற்கு புதுசு..!! அறிமுக சலுகைகளுடன் விற்பனை START..!! என்ன மாடல்.. என்ன விலை தெரியுமா..??