தென்னிந்திய இசை உலகில் சமீப காலங்களில் பெரிதும் பேசப்படும் ராப் பாடகர்களில் முக்கியமானவர் அறிவு. சமூக அக்கறை கொண்ட பாடல்களால் தனித்துவமான இடத்தைப் பெற்றுள்ள அவர், ரசிகர்களிடையே “தெருக்குரல் அறிவு” என்ற பெயரால் பரவலாக அறியப்படுகிறார். சமூக அநீதிகள், இடஒதுக்கீடு, சாதி அடிப்படையிலான வேறுபாடுகள், தொழிலாளர்கள் மற்றும் விவசாயிகளின் பிரச்சினைகள் போன்ற பல்வேறு சமூகக் கேள்விகளை தனது பாடல்களின் மூலம் வெளிப்படுத்தி வருவது அவரது இசை பயணத்தின் முக்கிய அம்சமாகும்.

வடசென்னை பகுதிகளில் வளர்ந்த அறிவு, அங்குள்ள தெரு கலாசாரத்தை பிரதிபலிக்கும் வகையில் தனது ராப் பாடல்களை உருவாக்கி வந்தார். வாரந்தோறும் வடசென்னையின் பல்வேறு பகுதிகளில் உள்ள இளம் ராப் கலைஞர்களை ஒன்றிணைத்து “தெருக்குரல்” என்ற இசை முயற்சியின் மூலம் அவர்களுக்கு ஒரு மேடை உருவாக்கியவர் என்பதும் குறிப்பிடத்தக்கது. அந்த முயற்சியின் மூலம் பல புதிய குரல்கள் வெளிச்சத்துக்கு வந்துள்ளன.

அறிவு தனது பாடல்களில் சாதாரணமாக காதல் அல்லது பொழுதுபோக்கு கருப்பொருட்களை மட்டும் தேர்வு செய்யாமல், சமூக அநீதிகளை வெளிப்படுத்தும் கருத்துக்களை மிகத் தைரியமாக முன்வைப்பவர். துப்புரவு தொழிலாளர்களின் வாழ்க்கை சிக்கல்கள், விவசாயிகளின் துயரம், நகர்ப்புற ஏழைகளின் பிரச்சினைகள், சாதி அடிப்படையிலான ஒடுக்குமுறைகள் போன்ற பல்வேறு விஷயங்களை அவர் பாடல்களில் வெளிப்படுத்தி வருகிறார்.

இதையும் படிங்க: சினிமாவில் எனக்கு எண்டே கிடையாது.. கமா மட்டுமே..! நடிகர் மம்முட்டி உருக்கமான பேச்சு..!

திரைப்பட உலகில் அறிவுக்கு பெரிய கவனம் கிடைத்தது காலா திரைப்படத்தின் மூலம். இயக்குநர் பா.ரஞ்சித் இயக்கத்தில், நடிகர் ரஜினிகாந்த் நடித்த அந்தப் படத்தில் இடம்பெற்ற “உரிமை மீட்போம்” என்ற பாடல் மூலம் அறிவு திரைப்பட ரசிகர்களிடையே பரவலாக அறிமுகமானார். அந்தப் பாடல் சமூக நீதி மற்றும் மக்கள் உரிமைகளை வலியுறுத்தும் வகையில் உருவாகி பெரும் வரவேற்பை பெற்றது.

அதனைத் தொடர்ந்து பல்வேறு திரைப்படங்களிலும் அவரது பாடல்கள் இடம்பெற்றன. குறிப்பாக சூரரை போற்று திரைப்படத்தில் இடம்பெற்ற “பருந்தாகுது ஊர் குருவி” பாடல் ரசிகர்களிடையே பெரும் வரவேற்பை பெற்றது. அந்தப் பாடலை நடிகர் சூர்யா நடித்த கதாபாத்திரத்தின் உணர்வுகளுடன் இணைத்து ரசிகர்களிடம் கொண்டு சேர்த்ததில் அறிவின் பங்களிப்பு குறிப்பிடத்தக்கது.

இதற்கிடையில் உலகளவில் பெரும் கவனம் பெற்ற பாடல்களில் ஒன்று “என்ஜாய் எஞ்சாமி”. இந்தப் பாடலை இசையமைப்பாளர் சந்தோஷ் நாராயணன் தயாரிப்பில் அறிவும் பாடகி 'தீ'யும் இணைந்து பாடினர். 2021 ஆம் ஆண்டு வெளியான இந்த பாடல் சமூக வலைதளங்களில் பெரும் வரவேற்பைப் பெற்று யூடியூப் உள்ளிட்ட தளங்களில் கோடிக்கணக்கான பார்வைகளை பெற்றது.

இந்தப் பாடல் வெளியான சில நாட்களிலேயே இந்தியா மட்டுமின்றி வெளிநாடுகளிலும் பரவலாக பேசப்பட்டது. பாடலின் இசை மட்டுமல்லாமல் அதன் வரிகளில் இடம்பெற்றிருந்த சமூக மற்றும் கலாசார அடையாளங்களும் பலரின் கவனத்தை ஈர்த்தன. இந்நிலையில், இந்தப் பாடல் வெளியானது கிட்டத்தட்ட ஐந்து ஆண்டுகள் கடந்த நிலையில், அந்த பாடல் தொடர்பாக தனது ஆதங்கத்தை அறிவு வெளிப்படுத்தியுள்ளார். சமூக வலைதளமான “எக்ஸ்” தளத்தில் அவர் வெளியிட்ட பதிவில், “என்ஜாய் எஞ்சாமி” பாடலுக்கான அங்கீகாரம் மற்றும் உரிமை குறித்து தனது கருத்துகளை பகிர்ந்துள்ளார்.

அந்த பதிவில் அறிவு கூறுகையில், “இந்தப் பாடலுக்கான மெட்டு முதலில் எனக்கு அனுப்பப்பட்டது. அதன் அடிப்படையில் என் வாழ்க்கை அனுபவங்கள் மற்றும் கலாசார வரலாற்றை வைத்து பாடல் வரிகளை எழுதி, பாடி, முதன்மை மெட்டையும் அமைத்து நடித்தேன். இது ஒரு கூட்டு முயற்சியாக உருவான பாடல் என்பதால் அதற்கான அங்கீகாரமும், ஊதியமும் சமமாக பகிர்ந்து வழங்கப்பட வேண்டும்,” என்று தெரிவித்துள்ளார்.

மேலும் அவர் கூறுகையில், “இந்தப் பாடல் என் நிலம், என் மக்கள் மற்றும் அவர்களின் வரலாறு ஆகியவற்றை அடிப்படையாக கொண்டு உருவாக்கப்பட்டது. ஆனால் பாடல் வெளியானபோது என்னை ‘featuring artist’ என மட்டும் குறிப்பிடப்பட்டது. அந்த நேரத்தில் அதன் அர்த்தம் முழுமையாக எனக்கு புரியவில்லை,” என்று குறிப்பிட்டுள்ளார்.

அவர் மேலும், “இந்தப் பாடலுக்காக பணியாற்றிய பலர் இன்று அதன் மூலம் ராயல்டி மற்றும் உரிமைகளை பெற்று வருகின்றனர். ஆனால் என் உழைப்புக்கான உரிமை அல்லது ஊதியம் எனக்கு கிடைக்கவில்லை. இது கருணை கேட்டு சொல்லப்படுவது அல்ல; இது உரிமை மற்றும் கலைஞர்களின் கண்ணியத்தைப் பற்றிய கேள்வி,” என்று தனது பதிவில் தெரிவித்துள்ளார்.

இந்த விவகாரத்திற்கு பதிலளித்த இசையமைப்பாளர் சந்தோஷ் நாராயணனும் சமூக வலைதளத்தில் கருத்து தெரிவித்துள்ளார். அவர் கூறுகையில், “நீங்கள் கூறுவது உங்கள் தனிப்பட்ட கருத்தாக இருக்கலாம். ஆனால் நீங்கள் கோரும் தொழில்நுட்ப அங்கீகாரம் மற்றும் சட்ட உரிமைகள் உண்மைக்கு புறம்பானவை,” என்று குறிப்பிட்டார்.

மேலும் அவர், “நீங்கள் விரும்பும் எந்த ஊடகத்திலும் ஆதாரங்களுடன் நேரடியாக விவாதிக்க நான் தயாராக இருக்கிறேன். நீங்கள் என்னை பல தளங்களில் தடை செய்துள்ளதால் இங்கே பதிலளிக்கிறேன்,” என்றும் தெரிவித்துள்ளார். இந்த விவகாரம் தற்போது இசை உலகிலும் சமூக வலைதளங்களிலும் பெரும் விவாதமாக மாறியுள்ளது. பலர் அறிவுக்கு ஆதரவாக கருத்து தெரிவிக்கின்றனர். அதே நேரத்தில் சிலர் சந்தோஷ் நாராயணனின் கருத்துக்கும் ஆதரவு தெரிவித்து வருகின்றனர்.

மொத்தத்தில் “என்ஜாய் எஞ்சாமி” பாடல் மூலம் உருவான இந்த உரிமை விவகாரம், இந்திய இசைத் துறையில் கலைஞர்களின் உரிமைகள், ஒப்பந்தங்கள் மற்றும் ராயல்டி பற்றிய பெரிய விவாதத்தை மீண்டும் எழுப்பியுள்ளது. இதன் முடிவு எவ்வாறு அமையும் என்பது குறித்து இசை ரசிகர்கள் மற்றும் கலைஞர்கள் அனைவரும் கவனமாகக் காத்திருக்கின்றனர்.

இதையும் படிங்க: சினிமாவில் நடக்கும் அரசியல் உங்களுக்கு தெரியாது..! காது கேட்காத தவளையாகவே இருக்கிறேன் - நடிகர் விக்ரம் பிரபு..!