திரைத்துறையின் மிக உயரிய கௌரவமாக உலகம் முழுவதும் மதிக்கப்படுவது ஆஸ்கார் விருது. சினிமா கலைஞர்களின் கனவு மேடையாகவும், ஒரு படத்தின் உலகளாவிய அங்கீகாரமாகவும் ஆஸ்கார் விருதுகள் பார்க்கப்படுகின்றன. ஒவ்வொரு ஆண்டும் அமெரிக்காவின் கலிபோர்னியா மாகாணத்தில் உள்ள லாஸ் ஏஞ்சல்ஸ் நகரில், அமெரிக்க திரைப்படக் கலை மற்றும் அறிவியல் அகாடமி சார்பில் இந்த விருது விழா பிரம்மாண்டமாக நடத்தப்படுகிறது. நடிகர்கள், இயக்குநர்கள், தொழில்நுட்பக் கலைஞர்கள் என திரைத்துறையைச் சேர்ந்த முக்கிய பிரமுகர்கள் இந்த விழாவில் பங்கேற்று, உலகத் திரையுலகின் கவனத்தை ஒரே இடத்தில் குவிப்பது வழக்கம்.

அந்த வகையில், 2026-ஆம் ஆண்டிற்கான 98-வது ஆஸ்கார் விருது பரிந்துரைப் பட்டியல் சமீபத்தில் வெளியிடப்பட்டு, சர்வதேச சினிமா வட்டாரங்களில் பெரும் விவாதத்தை கிளப்பியுள்ளது. இந்த ஆண்டு வெளியான பல முன்னணி ஹாலிவுட் படங்கள் பரிந்துரைப் பட்டியலில் இடம்பிடித்துள்ள நிலையில், சில முக்கியமான சாதனைகளும், சில ஏமாற்றங்களும் ரசிகர்களிடையே பேசுபொருளாக மாறியுள்ளன.

அதில் குறிப்பிடத்தக்கதாக, பிரபல இயக்குநர் ரயான் கூக்லர் இயக்கத்தில் கடந்த ஆண்டு வெளியான ‘சின்னர்ஸ்’ திரைப்படம், மொத்தம் 16 பிரிவுகளில் பரிந்துரைக்கப்பட்டு இந்த ஆண்டின் அதிக பரிந்துரைகள் பெற்ற படமாக சாதனை படைத்துள்ளது. சிறந்த படம், சிறந்த இயக்குநர், சிறந்த நடிகர், சிறந்த நடிகை, தொழில்நுட்ப பிரிவுகள் உள்ளிட்ட பல முக்கிய பிரிவுகளில் இந்த படம் பரிந்துரைக்கப்பட்டிருப்பது, திரைப்படத்தின் தரத்தையும், அதன் உலகளாவிய தாக்கத்தையும் உறுதிப்படுத்துவதாக விமர்சகர்கள் தெரிவிக்கின்றனர். ரயான் கூக்லர் ஏற்கனவே ‘பிளாக் பாந்தர்’ போன்ற படங்களின் மூலம் தனக்கென தனி அடையாளத்தை உருவாக்கியவர் என்பதால், அவரது இந்த புதிய படம் ஆஸ்கார் அரங்கில் பெரும் எதிர்பார்ப்பை ஏற்படுத்தியுள்ளது.

இதையும் படிங்க: 77வது குடியரசுத் தினத்தை முன்னிட்டு 'பத்ம விருதுகள்' அறிவிப்பு..! மத்திய உள்துறை அமைச்சகம் பட்டியலில் நடிகர்கள்..!

இதனிடையே, இந்திய ரசிகர்களுக்கு ஏமாற்றம் அளிக்கும் செய்தியாக, இந்தியா சார்பில் ஆஸ்காருக்கு அனுப்பப்பட்ட ‘ஹோம்பவுண்ட்’ திரைப்படம், இந்த ஆண்டு பரிந்துரைப் பட்டியலில் இடம் பெறவில்லை. இந்திய சினிமா உலக அளவில் தொடர்ந்து கவனம் பெறும் நிலையில், இந்த படம் தேர்வாகாதது சமூக ஊடகங்களில் விவாதமாக மாறியது. பலர், இந்திய திரைப்படங்கள் சர்வதேச விருது அரசியலால் புறக்கணிக்கப்படுவதாகவும், சிலர் படம் போதிய பிரச்சாரத்தை பெறவில்லை என்றும் கருத்து தெரிவித்தனர். இது இந்திய சினிமாவுக்கும் ஆஸ்கார் அகாடமிக்கும் இடையிலான உறவை மீண்டும் ஒரு முறை விவாதத்திற்கு கொண்டு வந்துள்ளது.

இந்த பரபரப்பான சூழ்நிலையில், ஹாலிவுட் நடிகையும், இயக்குநருமான நடாலி போர்ட்மேன், ஆஸ்கார் கமிட்டி மீது கடுமையான விமர்சனங்களை முன்வைத்துள்ளார். குறிப்பாக, பெண் இயக்குநர்களின் படங்கள் திட்டமிட்டு புறக்கணிக்கப்படுகின்றன என்ற குற்றச்சாட்டை அவர் வெளிப்படையாக முன்வைத்தது, சர்வதேச ஊடகங்களில் பெரும் கவனத்தை பெற்றுள்ளது. குழந்தை நட்சத்திரமாக திரையுலகில் அறிமுகமாகி, பின்னர் உலகளாவிய புகழ் பெற்ற நடிகையாக உயர்ந்தவர் நடாலி போர்ட்மேன்.

‘ஸ்டார் வார்ஸ்’ தொடர், ‘தோர்’, ‘பிளாக் ஸ்வான்’ போன்ற வெற்றிப் படங்களில் நடித்ததன் மூலம், நடிகை என்ற மட்டுமல்லாமல், ஒரு திறமையான கலைஞராகவும் அவர் தன்னை நிரூபித்துள்ளார். இதன் தொடர்ச்சியாக, ‘நியூயார்க், ஐ லவ் யூ’, ‘ஈவ்’ போன்ற படங்களை இயக்கி, இயக்குநராகவும் தனது திறமையை வெளிப்படுத்தியுள்ளார். சமீபத்தில், அமெரிக்காவில் நடைபெற்ற சன்டேன்ஸ் திரைப்பட விழாவில், நடாலி போர்ட்மேன் நடித்த ‘தி கேலரிஸ்ட்’ திரைப்படம் திரையிடப்பட்டது. இந்த விழாவின் போது செய்தியாளர்களை சந்தித்த அவர், ஆஸ்கார் பரிந்துரைப் பட்டியலை மையமாகக் கொண்டு, திரைத்துறையில் நிலவும் பாலின பாகுபாடு குறித்து விரிவாக பேசினார்.

அப்போது அவர் கூறுகையில், “கடந்த வருடம் நான் பார்த்த சிறந்த திரைப்படங்களில் பல பெண் இயக்குநர்களால் உருவாக்கப்பட்டவை. ‘சாரி பேபி’, ‘லெப்ட்-ஹேண்டட் கேர்ள்’, ‘ஹெட்டா’, ‘தி டெஸ்டமென்ட் ஆப் ஆன் லீ’ போன்ற படங்கள் ரசிகர்களிடையே நல்ல வரவேற்பைப் பெற்றன. விமர்சகர்களாலும் பாராட்டப்பட்டன. ஆனால், விருது வழங்கும் கமிட்டியால் இந்த படங்கள் பெரும்பாலும் புறக்கணிக்கப்படுகின்றன” என்று தெரிவித்துள்ளார்.

மேலும் அவர், “ஒவ்வொரு மட்டத்திலும் பெண்களுக்கு பல தடைகள் உள்ளன. கதைகள் சொல்லும் வாய்ப்பிலிருந்து, நிதி பெறுவது வரை, விருது அங்கீகாரம் பெறுவது வரை, பெண்கள் தொடர்ந்து போராட வேண்டிய சூழல் உள்ளது. பெண் இயக்குநர்களின் படங்களுக்கு தகுந்த பாராட்டும், அங்கீகாரமும் கிடைப்பதில்லை” என்று கூறியுள்ளார். அவரது இந்த கருத்துகள், திரைத்துறையில் நீண்ட காலமாக பேசப்பட்டு வரும் பாலின சமத்துவ விவாதத்தை மீண்டும் தீவிரமாக்கியுள்ளது.

நடாலி போர்ட்மேனின் இந்த குற்றச்சாட்டுக்கு ஆதரவாக பல ஹாலிவுட் நடிகைகள், இயக்குநர்கள் மற்றும் திரைக்கலைஞர்கள் சமூக ஊடகங்களில் கருத்து தெரிவித்து வருகின்றனர். “ஆஸ்கார் பரிந்துரைகளில் பெண்களின் பங்களிப்பு குறைவாக இருப்பது ஒரு அமைப்பு சார்ந்த பிரச்சினை” என்றும், “திறமைக்கு பதிலாக அதிகாரமும் அரசியலும் அதிகமாக செயல்படுகின்றன” என்றும் சிலர் விமர்சித்துள்ளனர். மறுபுறம், ஆஸ்கார் அகாடமி தரப்பில் இருந்து இதற்கு இதுவரை அதிகாரப்பூர்வ பதில் எதுவும் வெளியாகவில்லை.

மொத்தத்தில், 98-வது ஆஸ்கார் விருது பரிந்துரைப் பட்டியல், சாதனைகள், ஏமாற்றங்கள் மற்றும் சர்ச்சைகள் என பல அம்சங்களை ஒருங்கே கொண்டு வந்துள்ளது. ‘சின்னர்ஸ்’ திரைப்படத்தின் சாதனை, இந்திய திரைப்படத்தின் புறக்கணிப்பு, பெண் இயக்குநர்கள் குறித்த நடாலி போர்ட்மேனின் குற்றச்சாட்டு ஆகியவை, இந்த ஆண்டின் ஆஸ்கார் விழாவை இன்னும் அதிக எதிர்பார்ப்புடனும், விவாதங்களுடனும் நோக்க வைக்கின்றன. வரவிருக்கும் விருது வழங்கும் விழாவில், இந்த விவாதங்கள் எவ்வாறு பிரதிபலிக்கும் என்பதையும், ஆஸ்கார் அகாடமி எந்த மாற்றங்களை மேற்கொள்ளும் என்பதையும் உலகத் திரையுலகம் ஆவலுடன் காத்திருக்கிறது.

இதையும் படிங்க: பொதுச்செயலாளர் பதவியால் ஹாப்பியில் தாடி பாலாஜி..! லட்சிய ஜனநாயக கட்சியினர் ராக்.. தவெக தொண்டர்கள் ஷாக்..!