உலகப் புகழ்பெற்ற மதுரை மீனாட்சி சுந்தரேசுவரர் திருக்கோயில் மகா கும்பாபிஷேகப் பெருவிழாவில், சென்னை உயர் நீதிமன்றத் தலைமை நீதிபதி அவர்களுக்கு உரிய நெறிமுறை மரபுகளின்படி (Protocol) முன்னுரிமை அளிக்காமல் காத்திருக்க வைத்ததுடன், அதுகுறித்து அதிகாரிகள் கவனத்திற்குக் கொண்டு சென்றபோது "தலைமை நீதிபதியாக இருந்தால் என்ன?" என்று தமிழ்நாடு அரசின் அமைச்சர் ஜெகதீஸ்வரி மிக அலட்சியமாகவும் திமிராகவும் பேசியதாக வெளியாகியுள்ள திடுக்கிடும் தகவல் நீதித்துறை மற்றும் பொதுமக்கள் மத்தியில் பெரும் அதிர்ச்சியையும் கடுமையான கொந்தளிப்பையும் ஏற்படுத்தியுள்ளது.

மதுரை மீனாட்சி அம்மன் கோயிலில் பன்னிரண்டு ஆண்டுகளுக்கு ஒருமுறை நடைபெறும் வரலாற்றுச் சிறப்புமிக்க திருக்குடமுழுக்கு விழா பல்லாயிரக்கணக்கான பக்தர்கள் புடைசூழ இன்று காலை மிக விமரிசையாக நடைபெற்றது. இந்நிகழ்வில் சென்னை உயர் நீதிமன்றத் தலைமை நீதிபதி உள்ளிட்ட உயர் நீதிமன்ற நீதிபதிகள், அமைச்சர்கள் மற்றும் முக்கியப் பிரமுகர்கள் பலரும் கலந்துகொண்டனர். யாகசாலை மற்றும் விமானக் கோபுர பூஜைகளைத் தரிசிப்பதற்காக முக்கியப் பிரமுகர்கள் அமரும் வகையில் அமைக்கப்பட்டிருந்த வி.ஐ.பி சிறப்புப் பகுதியில் அமைச்சர் ஜெகதீஸ்வரி முன்வரிசையில் அமர்ந்திருந்தார்.

அப்போது, விழாவிற்கு வருகை தந்த சென்னை உயர் நீதிமன்றத் தலைமை நீதிபதி அவர்கள் முன்வரிசைக்குச் செல்ல வழியின்றி ஒருபுறம் நீண்ட நேரம் காத்திருக்கும் சூழல் உருவானது. இதனை கவனித்த பாதுகாப்புப் பணியில் இருந்த அரசுத் துறை அதிகாரிகள், உடனடியாக முன்வரிசையில் அமர்ந்திருந்த அமைச்சர் ஜெகதீஸ்வரியை அணுகி, "சென்னை உயர் நீதிமன்றத் தலைமை நீதிபதி அவர்கள் வந்துள்ளார்; அவர் முன்வரிசைக்கு வர வழியில்லாமல் காத்திருக்கிறார்" என்ற விபரத்தைத் தெரிவித்து, அவருக்கு உரிய வழி ஏற்படுத்திக் கொடுக்குமாறு கூறியுள்ளனர்.

இதையும் படிங்க: 17 ஆண்டுகளுக்குப் பிறகு... மீனாட்சி அம்மன் மகா குடமுழுக்கு..! தேதியை அறிவித்த கோவில் நிர்வாகம்..!!

ஆனால், உயர் நீதிமன்றத்தின் முதன்மை ஆளுமையான தலைமை நீதிபதிக்குரிய மரபு நெறிமுறைகளைக் காற்றில் பறக்கவிடும் வகையில், "அவர் தலைமை நீதிபதியாக இருந்தால் எனக்கென்ன?" என்று அமைச்சர் ஜெகதீஸ்வரி அங்கிருந்த அதிகாரிகளிடம் மிகவும் அலட்சியமான தோரணையில் முகஞ்சுழித்துப் பேசியுள்ளார். அமைச்சரின் இந்த அநாகரிகமான மற்றும் அகங்காரமான பதிலைக் கேட்டு அருகே நின்றிருந்த பிற நீதிபதிகளும், அதிகாரிகளும் பேரதிர்ச்சியிலும் திகைப்பிலும் ஆழ்ந்தனர்.

இதனையடுத்து, அமைச்சரின் போக்கைக் கண்டு வேதனையடைந்த சக நீதிபதிகளே உடனடியாக முன்வந்து தங்களுக்குள் வழி ஏற்படுத்திக் கொடுத்து, தலைமை நீதிபதியை மிகுந்த மரியாதையுடன் முன்வரிசைக்கு அழைத்துச் சென்று அமர வைத்தனர். நீதித்துறையின் உச்சப் பொறுப்பில் உள்ள தலைமை நீதிபதியையே ஓர் அமைச்சர் பொதுவெளியில் இவ்வளவு அற்பமாகவும் ஆணவத்துடனும் நடத்தியுள்ள இந்த விவகாரம், தமிழக நீதித்துறை வட்டாரத்திலும் வழக்கறிஞர்கள் மத்தியிலும் பெரும் புயலைக் கிளப்பியுள்ளதுடன், அரசு உரிய விளக்கம் அளிக்க வேண்டும் என்ற கண்டனக் குரல்களும் வலுத்து வருகின்றன.

இதையும் படிங்க: பத்திரிகையாளர்களுக்கு இலவச வீட்டுமனை பட்டா.. வீடுகள் ஒதுக்கீடு: அமைச்சர் ஜெகதீஸ்வரி கோரிக்கை!