சமூக வலைத்தளங்களில் குழந்தைகளுக்கான பாராசிட்டமால் உள்ளிட்ட திரவ மருந்துகளில் அதிக அளவு ஆல்கஹால் கலக்கப்படுவதாகப் பரவும் தவறான தகவல்கள் முற்றிலும் அடிப்படையற்றவை என்று தமிழ்நாடு சுகாதாரத்துறை தெளிவுபடுத்தியுள்ளது. இத்தகைய வதந்திகள் மக்களிடையே தேவையற்ற பீதியை ஏற்படுத்துவதால், அதிகாரப்பூர்வமாக மறுப்பு தெரிவிக்கப்பட்டுள்ளது.

மருந்துகளின் தரம் மற்றும் பாதுகாப்பை உறுதி செய்யும் வகையில் மத்திய மற்றும் மாநில மருந்து கட்டுப்பாட்டு வாரியங்கள் கடுமையான கண்காணிப்பில் செயல்படுகின்றன. குழந்தை மருந்துகள் தயாரிப்பில் பயன்படுத்தப்படும் ஒவ்வொரு பொருளும் சர்வதேச தரநிலைகளுக்கு ஏற்ப சோதனை செய்யப்பட்ட பின்னரே அனுமதிக்கப்படுகின்றன.

ஆல்கஹால் ஏன் பயன்படுத்தப்படுகிறது? குழந்தைகளுக்கான சிரப் வகை மருந்துகளில் சில மூலப்பொருட்களை சரியாகக் கரைக்கவும், மருந்து நீண்ட நாட்கள் கெடாமல் இருக்கவும் மிகக் குறைந்த அளவு ஆல்கஹால் பயன்படுத்த அனுமதிக்கப்படுகிறது. இது மருந்தின் தரத்தைப் பாதுகாக்க உதவும் ஒரு தொழில்நுட்ப நடைமுறையாகும். 60 மில்லி கொள்ளளவு கொண்ட ஒரு பாராசிட்டமால் சிரப் பாட்டிலில் வெறும் 10 சதவீதம் மட்டுமே, அதாவது 6 மில்லி ஆல்கஹால் மட்டுமே உள்ளது. இந்த அளவு உலக சுகாதார அமைப்பு உள்ளிட்ட சர்வதேச விதிமுறைகளின்படி முற்றிலும் பாதுகாப்பானது என்று சுகாதாரத் துறை விளக்கியுள்ளது.

இதையும் படிங்க: அதிரடி உத்தரவு வெளியிட்ட மின்வாரியம்: தலைமை அலுவலகத்தில் நாளை முதல் அதிகாரிகள் கட்டாய ஆஜர்..!!

பலர் மருந்துப் பாட்டில்களில் உள்ள “95% ஆல்கஹால்” என்ற குறிப்பை தவறாகப் புரிந்துகொள்கின்றனர். இது மருந்தில் 95 சதவீதம் ஆல்கஹால் உள்ளது என்று பொருளல்ல. மாறாக, மருந்து தயாரிப்பில் பயன்படுத்தப்படும் ஆல்கஹாலின் தூய்மைத் தரத்தைக் (purity) குறிக்கும் மருத்துவத் தொழில்நுட்பக் குறியீடாகும்.

வதந்தி பரப்புவோர் மீது நடவடிக்கை: மருத்துவக் குறியீடுகளை தவறாகச் சித்தரித்து பொய்யான செய்திகளைப் பரப்புபவர்கள் மீது சட்டப்படி கடுமையான நடவடிக்கை எடுக்கப்படும் என்று எச்சரிக்கை விடுக்கப்பட்டுள்ளது. பெற்றோர்கள் தங்கள் குழந்தைகளுக்கு காய்ச்சல் அல்லது உடல்நலக் குறைவு ஏற்படும் போது, மருத்துவர்களின் பரிந்துரையின்படி மட்டுமே மருந்துகளைப் பயன்படுத்துமாறு அறிவுறுத்தப்பட்டுள்ளது. போலி செய்திகளால் தேவையின்றி மருந்துகளைத் தவிர்ப்பது குழந்தைகளின் உடல்நலத்துக்கு தீங்கு விளைவிக்கும்.

தமிழ்நாடு சுகாதாரத்துறை மற்றும் மருந்து கட்டுப்பாட்டு அதிகாரிகள் தொடர்ந்து மருந்து உற்பத்தி நிறுவனங்களை ஆய்வு செய்து வருகின்றனர். எனவே, பெற்றோர்கள் முழு நம்பிக்கையுடன் மருத்துவர்களின் அறிவுரைப்படி மருந்துகளை வாங்கி பயன்படுத்தலாம் என்று தெரிவிக்கப்பட்டுள்ளது.

இதையும் படிங்க: மாநில உரிமைகளை தொட்டால் விடமாட்டோம்! புதிய சட்டங்கள் குறித்து மு.க.ஸ்டாலின் கடும் எச்சரிக்கை!