மேற்கு வங்கம்: மத்திய உள்துறை அமைச்சர் அமித் ஷா, காங்கிரஸ் மற்றும் திரிணமூல் காங்கிரஸ் கட்சிகள் பயங்கரவாதிகளுக்கு பிரியாணி கொடுத்து ஊக்குவித்ததாக கடுமையாகக் குற்றம் சாட்டினார். அதே நேரத்தில், பிரதமர் நரேந்திர மோடி தலைமையிலான பாஜக ஆட்சி அமைந்ததிலிருந்து பயங்கரவாதத்துக்கு எதிராக தீர்க்கமான நடவடிக்கைகள் எடுக்கப்பட்டு வருவதாகவும் பெருமிதம் தெரிவித்தார்.

மேற்கு வங்க சட்டப்பேரவைத் தேர்தலுக்கான இரண்டாம் கட்ட வாக்குப்பதிவு ஏப்ரல் 29ஆம் தேதி நடைபெறவுள்ள நிலையில், பிரசாரம் உச்சக்கட்டத்தில் உள்ளது. நாடியா மாவட்டத்தில் பாஜக வேட்பாளர்களை ஆதரித்து பிரசாரம் செய்த அமித் ஷா, “மமதா பானர்ஜியும் காங்கிரஸும் ஆட்சியில் இருந்தபோது பயங்கரவாதிகளுக்கு பிரியாணி கொடுத்து வரவேற்றனர். ஆனால் 2014ஆம் ஆண்டு மோடி ஆட்சி அமைந்ததும் நிலைமை மாறியது” என்றார்.

அவர் மேலும் கூறுகையில், “உரி தாக்குதலுக்கு சர்ஜிகல் ஸ்ட்ரைக் மூலம் பதிலடி கொடுத்தோம். புல்வாமா தாக்குதலுக்கு வான்வழித் தாக்குதல் நடத்தினோம். பஹல்காமில் சுற்றுலாப் பயணிகள் மீதான தாக்குதலுக்கு ஆபரேஷன் சிந்தூர் மூலம் பாகிஸ்தானுக்குள் நுழைந்து பயங்கரவாத முகாம்களை அழித்தோம். மோடி அரசு பயங்கரவாதம் இல்லாத இந்தியாவை உருவாக்கியுள்ளது. நக்சல் பிரச்னையிலும் நாட்டை விடுவித்துள்ளோம்” என்று தெரிவித்தார்.

இதையும் படிங்க: அடுத்த டார்கெட் டெல்லி தான்!! மேற்கு வங்க வெற்றிக்கு பின் டெல்லியை கைப்பற்றுவேன் - மம்தா!

மேற்கு வங்கத்தில் பாஜகவுக்கு வாக்கு கேட்ட அமித் ஷா, “எங்களுக்கு அதிகாரம் கொடுங்கள். எல்லை வழியாக வரும் ஊடுருவல்காரர்களை ஒவ்வொருவராக விரட்டியடிப்போம். மமதா பானர்ஜி சிறப்பு தீவிர திருத்தச் சட்டத்தை எதிர்க்கிறார். அவருக்கு ஒன்று சொல்லிக்கொள்கிறேன் – மமதாவின் காலம் முடிந்தது. மே 4ஆம் தேதி பாஜக ஆட்சி அமையும். முதல்வராக பாஜகவைச் சேர்ந்தவர் இருப்பார்” என்று உறுதியாகக் கூறினார்.

மேலும், “மே 29ஆம் தேதி மேற்கு வங்கத்தின் மகள்கள், சகோதரிகள், தாய்மார்கள் அனைவரும் வாக்குச்சாவடிக்கு வந்து தாமரைச் சின்னத்துக்கு வாக்களிக்க வேண்டும். குண்டர்கள், ரெளடிகள் மே 29ஆம் தேதி வீட்டை விட்டு வெளியே வரக்கூடாது. வந்தால் மே 5ஆம் தேதி இரக்கம் காட்டப்படாது” என்று எச்சரித்தார்.

இந்தப் பிரசார உரை மேற்கு வங்க அரசியல் வட்டாரத்தில் பெரும் பரபரப்பை ஏற்படுத்தியுள்ளது. தேர்தல் பிரசாரத்தின் இறுதிக் கட்டத்தில் அமித் ஷாவின் இந்தக் கருத்துகள் பாஜகவுக்கு ஆதரவை அதிகரிக்கும் எனக் கட்சி நம்புகிறது.

மேற்கு வங்க சட்டப்பேரவைத் தேர்தலின் இரண்டாம் கட்ட வாக்குப்பதிவுக்கு இன்னும் மூன்று நாட்களே உள்ள நிலையில், அரசியல் கட்சிகளின் பிரசாரம் முழு வீச்சில் நடைபெற்று வருகிறது.

இதையும் படிங்க: மேற்குவங்க வரலாற்றில் புதிய நல்லாட்சி சகாப்தத்தின் துவக்கம்!! அதிகமான ஓட்டுப்பதிவு குறித்து அமித் ஷா பெருமிதம்!