தமிழகத்தில் தேர்தல் களம் சூடுபிடித்து வரும் நிலையில், **பா.ஜ.**கவின் மேலிட தலைவர்களும் மத்திய அமைச்சர்களும் மாநில நிர்வாகிகளுடன் மட்டுமே ஆலோசனை நடத்திவிட்டு செல்வதால், மாவட்ட, மண்டல, பூத் அளவிலான நிர்வாகிகளும் தொண்டர்களும் கடும் அதிருப்தியில் உள்ளனர். இது கட்சியின் கீழ்மட்ட அமைப்புகளில் பெரும் விரக்தியை ஏற்படுத்தியுள்ளது.

பா.ஜ. வட்டாரங்கள் தெரிவிப்பதாவது: தே.ஜ. கூட்டணியில் அ.தி.மு.க. தலைமை வகித்தாலும், கூட்டணியை ஒருங்கிணைத்து வலுப்படுத்தியது பா.ஜ.தான். எனவே இந்த தேர்தலில் கட்சி 40 தொகுதிகளில் போட்டியிட முடிவு செய்துள்ளது. 

பிரதமர் மோடி, உள்துறை அமைச்சர் அமித் ஷா ஆகியோர் தொண்டர்களை முழு வீச்சில் களப்பணியில் ஈடுபடுமாறு அறிவுறுத்தியுள்ளனர். ஆனால் நடைமுறையில் மத்திய தலைவர்கள் தமிழகம் வந்தால் மாநில தலைமையுடன் மட்டுமே சந்திப்பு நடத்தி விடுகின்றனர்.

இதையும் படிங்க: தமிழக பாஜகவை வேவு பார்க்கும் டெல்லி SPY!! தாமரை மலராதது ஏன்? கோட்டை விடுவது யார்? அலசல்!

அவர்கள் வரும் தகவலே கீழ்மட்ட நிர்வாகிகளுக்கு சரியாக தெரிவதில்லை. மாவட்ட, மண்டல, பூத் கமிட்டி நிர்வாகிகளுக்குத்தான் அந்தந்த பகுதி மக்களின் மனநிலை, உள்ளூர் பிரச்னைகள், எதிர்க்கட்சிகளின் நிலவரம் ஆகியவை நன்கு தெரியும். 

ஆனால் டில்லியிலிருந்து வரும் தலைவர்கள் ஒரு மாவட்டத்தில் காலை, மற்றொரு மாவட்டத்தில் மாலை என்று விரைவாக சென்று விடுகின்றனர். மாவட்ட தலைவர்களுடன் மட்டுமே பேசிவிட்டு புறப்படுகின்றனர். மண்டல தலைவர்கள், பூத் கமிட்டி நிர்வாகிகள், தொண்டர்களை சந்திப்பதில்லை. இரவில் பொதுக்கூட்டத்தில் பங்கேற்பதும் அரிதாகவே நடக்கிறது.

இதனால் உண்மையான கள நிலவரத்தை மேலிட தலைவர்களால் அறிய முடிவதில்லை. மாவட்டங்களுக்கு சென்று உள்ளூர் நிர்வாகிகளை சந்தித்தால் அவர்களுக்கு அந்த பகுதியில் மதிப்பு அதிகரிக்கும். தொண்டர்களும் உற்சாகமாக பணியாற்றுவர். 

ஆனால் தற்போதைய முறையால் கீழ்மட்டத்தில் ஊக்கமின்மை ஏற்பட்டுள்ளது. தேர்தல் நெருங்கும் நிலையில் இந்த அதிருப்தி கட்சியின் வெற்றி வாய்ப்புகளை பாதிக்கலாம் என்ற அச்சம் பா.ஜ. தொண்டர்களிடையே நிலவுகிறது.

இதையும் படிங்க: ஜோதிடர் கொடுத்த ஐடியா! எடப்பாடி பழனிசாமி உற்சாகம்! அதிமுகவில் வேகமெடுக்கும் தேர்தல் பணிகள்!