தாராபுரம் மற்றும் மதுராந்தகம் சட்டமன்ற இடைத்தேர்தல் வாக்கு எண்ணிக்கையில் ஆளும் தமிழக வெற்றிக் கழகத்தின் வேட்பாளர்கள் தொடர்ந்து முன்னிலை பெற்று வருவது தவெக அரசுக்கு மக்கள் வழங்கியிருக்கக்கூடிய மகத்தான அங்கீகாரம் என்று உயர்கல்வித்துறை அமைச்சர் விஸ்வநாதன் தெரிவித்துள்ளார்.

மதுராந்தகம் மற்றும் தாராபுரம் சட்டமன்றத் தொகுதிகளில் பதிவான வாக்குகள் எண்ணப்பட்டு வரும் நிலையில், தொடக்கம் முதலே தமிழக வெற்றிக் கழக வேட்பாளர்கள் இரு தொகுதிகளிலும் அசைக்க முடியாத முன்னிலையைப் பெற்று வருகின்றனர். தவெகவின் வெற்றியை உறுதி செய்யும் வகையில் முன்னிலை நிலவரங்கள் வெளிவந்ததைத் தொடர்ந்து, சென்னை தலைமைச் செயலக வளாகத்தின் வெளியே உயர்கல்வித்துறை அமைச்சர் விஸ்வநாதன் பொதுமக்களுக்கும் கட்சியினருக்கும் உற்சாகமாக இனிப்புகளை வழங்கித் தனது மகிழ்ச்சியை வெளிப்படுத்தினார்.

இதனைத் தொடர்ந்து செய்தியாளர்களைச் சந்தித்த அமைச்சர் விஸ்வநாதன், "தாராபுரம் மற்றும் மதுராந்தகம் சட்டமன்ற இடைத்தேர்தல்களில் தமிழக வெற்றிக் கழக வேட்பாளர்கள் மிகப்பெரிய வாக்கு வித்தியாசத்தில் முன்னணியில் இருந்து வருவது, முதலமைச்சர் விஜய் தலைமையிலான அரசுக்குத் தமிழக மக்கள் வழங்கியுள்ள அசைக்க முடியாத நற்சான்றிதழும் அங்கீகாரமுமாகும். மதச்சார்பற்ற சமூகநீதி வெற்றிக் கூட்டணி உருவான பிறகு சந்திக்கும் முதல் தேர்தல் இதுவாகும்; இக்கூட்டணிக்கு மக்கள் தங்களது பேராதரவை அள்ளி வழங்கியுள்ளனர்" என்று தெரிவித்தார்.

இதையும் படிங்க: ”இதுக்கு பிச்சை எடுக்கலாம்...” - ஊழல் அதிகாரிகளை விட்டு விளாசிய நீதிபதிகள்... தவெக அரசுக்கு வைத்த குட்டு...!

மேலும், இந்த இடைத்தேர்தல் வெற்றி இதோடு மட்டும் நின்றுவிடாமல், அடுத்து வரவிருக்கும் உள்ளாட்சித் தேர்தல்களிலும், தொடர்ந்து வரவுள்ள நாடாளுமன்றப் பொதுத்தேர்தலிலும் மாபெரும் அதிர்வலையாக எதிரொலிக்கும்; இனிவரும் காலங்களில் தமிழகத்தில் மதச்சார்பற்ற சமூகநீதி வெற்றிக் கூட்டணிதான் மிகப்பெரிய வெற்றிகளைத் தொடர்ச்சியாகக் குவிக்கும் என்று நம்பிக்கையுடன் குறிப்பிட்டார்.

தேசிய அரசியல் குறித்துப் பேசிய அமைச்சர், வரும் 2029-ஆம் ஆண்டு நடைபெறவுள்ள நாடாளுமன்றத் தேர்தலில் ராகுல் காந்தி அவர்கள் நாட்டின் பிரதமராகப் பதவியேற்பதற்குத் தமிழக முதலமைச்சர் ச. ஜோசப் விஜய் அனைத்து வகையிலும் முழு உறுதுணையாக நிற்பார் என்று திட்டவட்டமாகத் தெரிவித்தார்.

இதையும் படிங்க: எம்ஜிஆரை போல் விஜய் மீதும் மக்களுக்கு நம்பிக்கை..! "நான் அவர்கள் வீட்டு மகள்"..! மரகதம் குமரவேல் பேட்டி..!