சென்னையில் நேற்று விநாயகர் சதுர்த்தியை ஒட்டி பல்வேறு பகுதிகளில் வைக்கப்பட்டிருந்த விநாயகர் சிலைகள் கடலில் கரைக்கப்பட்ட நிலையில், பட்டினப்பாக்கம் கடற்கரையில் தேங்கியுள்ள குப்பைகளை அகற்றும் பணியை மாநகராட்சி தொடங்கியுள்ளது.

விநாயகர் சதுர்த்தி பண்டிகையை ஒட்டி சென்னை மற்றும் புறநகர் பகுதிகளில் பிரதிஷ்டை செய்யப்பட்டு வழிபாடு செய்யப்பட்டு வந்த விநாயகர் சிலைகள் அனைத்தும் நேற்று சென்னை மாநகராட்சி பகுதிகளில் உள்ள கடற்கரைப் பகுதிகளில் கரைக்கப்பட்டன.

குறிப்பாக, பட்டினப்பாக்கம், நீலாங்கரை, காசிமேடு, திருவொற்றியூர் ஆகிய நான்கு இடங்களில் விநாயகர் சிலைகள் கரைக்கப்பட்டன. பல்வேறு அமைப்புகளின் சார்பில் மொத்தமாக 1,562 விநாயகர் சிலைகள் சென்னை மாநகராட்சிக்கு உட்பட்ட பகுதிகளில் கரைக்கப்பட்டதாக அறிய முடிகிறது.

இதையும் படிங்க: விநாயகர் சிலையை கரைக்கப் போன இடத்தில் சோகம்... அடுத்தடுத்து 6 கல்லூரி மாணவர்கள் நீரில் மூழ்கி பலி...!

தற்போது பட்டினப்பாக்கம் கடற்கரையில் தேங்கியுள்ள குப்பை மற்றும் கழிவுகளை அகற்றும் பணியில் மாநகராட்சி அதிகாரிகள் ஈடுபட்டு வருகின்றனர். கடற்கரைப் பகுதிகளில் பூஜைப் பொருட்கள், மாலைகள், சிலைகளின் எஞ்சிய பாகங்கள், காகிதக் கலவைகள், மரக்கட்டைகள், இரும்பு உள்ளிட்ட பல்வேறு பொருட்கள் பெருமளவில் கழிவுகளாகக் கரை ஒதுங்கியுள்ளன.

இதனைத் தொடர்ந்து, சென்னை மாநகராட்சியின் தூய்மைப் பணியாளர்கள் கழிவுகளை அகற்றும் பணியில் முழுவீச்சில் ஈடுபட்டு வருகின்றனர்.

இயற்கை நீர்நிலைகளைப் பாதுகாக்கவும், மாசு கட்டுப்பாட்டு வாரியத்தின் விதிமுறைகளின்படியும் தூய்மைப் பணிகளை மேற்கொள்ள வேண்டும் என்ற நீதிமன்ற உத்தரவின் அடிப்படையில் இந்தப் பணிகள் நடைபெற்று வருகின்றன.

கடந்த ஆண்டு 77 மெட்ரிக் டன் கழிவுகள் அகற்றப்பட்டிருந்த நிலையில், இந்த ஆண்டு சுமார் 100 டன் அளவிலான கழிவுகள் சேர வாய்ப்புள்ளதாக சென்னை மாநகராட்சி தரப்பில் பசுமைத் தீர்ப்பாயத்திற்கு தெரிவிக்கப்பட்டிருந்தது.

அதன்படி, தற்போது கழிவுகளை அகற்றும் பணியில் சென்னை மாநகராட்சி முழுவீச்சில் ஈடுபட்டு வருகிறது. ஜேசிபி இயந்திரங்கள் மற்றும் மாநகராட்சிக்குச் சொந்தமான வாகனங்களின் உதவியுடன் தூய்மைப் பணியாளர்கள் கழிவுகளை அகற்றும் பணியில் ஈடுபட்டு வருகின்றனர்.

குறிப்பாக, விநாயகர் சதுர்த்தியை ஒட்டி நீர்நிலைகளில் சிலைகளை கரைப்பதைத் தடுக்க உத்தரவிடக் கோரி தென்மண்டல தேசிய பசுமைத் தீர்ப்பாயத்தில் வழக்கு ஒன்று தொடரப்பட்டிருந்தது. அந்த வழக்கின் விசாரணைக்குப் பிறகு பல்வேறு வழிகாட்டுதல்கள் மற்றும் உத்தரவுகளுடன் சிலைகளை கரைக்க அனுமதி வழங்கப்பட்டது.

அந்த வகையில், தென்மண்டல தேசிய பசுமைத் தீர்ப்பாயம் பிறப்பித்த வழிகாட்டுதல்களைப் பின்பற்றி விநாயகர் சிலைகள் கடலில் கரைக்கப்பட்ட நிலையில், சிலைகளின் எஞ்சிய பாகங்கள் மற்றும் பிற பொருட்கள் கடற்கரையை ஒட்டிய பகுதிகளில் கழிவுகளாகத் தேங்கியுள்ளன.

எனவே, அவற்றை அகற்றும் பணியில் தற்போது மாநகராட்சி ஈடுபட்டு வருகிறது. தமிழ்நாடு மாசு கட்டுப்பாட்டு வாரியம், காவல்துறை மற்றும் தமிழ்நாடு கடலோர மண்டல மேலாண்மை ஆணையம் ஆகியவற்றுடன் தொடர்ந்து ஆலோசனை மேற்கொள்ளப்பட்டு, உரிய வழிகாட்டுதல்களுடன் விநாயகர் சிலைகள் கடலில் கரைக்கப்பட்டுள்ளன.

சிலைகள் கரைக்கப்பட்ட உடனேயே, நேற்று இரவு முதல் மாநகராட்சி அதிகாரிகளின் மேற்பார்வையில் தூய்மைப் பணியாளர்கள் எஞ்சியிருந்த சிலைகளின் கழிவுகளை அகற்றும் பணியில் ஈடுபட்டு வருகின்றனர்.

இன்று காலை நிலவரப்படி 70 டன்னுக்கும் மேலான கழிவுகள் அகற்றப்பட்டுள்ளதாக மாநகராட்சி தரப்பில் தெரிவிக்கப்பட்டுள்ளது. மொத்தமாக இந்த ஆண்டு சுமார் 100 டன் அளவிலான கழிவுகள் சேகரிக்கப்பட வாய்ப்புள்ளதாக ஏற்கனவே பசுமைத் தீர்ப்பாயத்திற்கு மாநகராட்சி தரப்பில் தெரிவிக்கப்பட்டிருந்தது.

கடந்த ஆண்டு 77 டன் அளவிலான கழிவுகள் சேகரிக்கப்பட்டிருந்த நிலையில், இந்த ஆண்டு சுமார் 100 டன் அளவிலான கழிவுகள் இருக்கும் என எதிர்பார்க்கப்படுகிறது. எஞ்சியுள்ள கழிவுகளையும் முழுவீச்சில் அகற்றும் பணியில் மாநகராட்சியைச் சேர்ந்த தூய்மைப் பணியாளர்கள் ஈடுபட்டு வருகின்றனர்.

மாநகராட்சியின் தூய்மைப் பணியாளர்கள் மட்டுமின்றி, சுற்றுச்சூழல் ஆர்வலர்கள், தன்னார்வலர்கள், மாணவ, மாணவிகள் என பலரும் பல்வேறு கடற்கரைப் பகுதிகளில் தேங்கியுள்ள கழிவுகளை அகற்றும் பணியில் முழுவீச்சில் ஈடுபட்டு வருகின்றனர்.

பட்டினப்பாக்கம் கடற்கரையில் தற்போது தேங்கியுள்ள கழிவுகள் முழுமையாக அகற்றப்பட்டு வருகின்றன.

இதையும் படிங்க: ஓட்டு கேட்டு வராதீங்க... தவெக வேட்பாளர்கள் மரகதம் குமரவேல், சத்தியபாமாவிற்கு தொகுதி மக்கள் கடும் எதிர்ப்பு...!