பாட்டாளி மக்கள் கட்சியின் நிறுவனத் தலைவர் மருத்துவர் ராமதாஸ் இன்று தனது 88ஆவது பிறந்தநாளை கொண்டாடி வருகிறார்.  தொடர்ந்து தைலாபுரம் இல்லத்திலிருந்து பாமக நிறுவனர் மருத்துவர் ராமதாஸ் மற்றும் அன்புமணி ஆகியோர் ஒரே காரில், திண்டிவனம் அடுத்த கோனேரிக்குப்பம் பகுதியில் உள்ள சரஸ்வதி கல்லூரியில் நடைபெறும் பிறந்தநாள் நிகழ்ச்சிக்குச் சென்றனர். 

இந்நிகழ்வில் கலந்துகொண்ட பாமக நிறுவனர் மருத்துவர் ராமதாஸ் மரக்கன்று காரில் இருந்தபடியே தொட்டுக் கொடுத்தார். அதனைத் தொடர்ந்து பாமக தலைவர் மருத்துவர் அன்புமணி மற்றும் சௌமியா அன்புமணி ஆகியோர் குடும்பத்துடன் மரக்கன்றுகளை நட்டு வைத்தனர். நிகழ்ச்சிக்கு பின்னர் பேசிய ராமதாஸ், அரசியல் வாழ்க்கையில் இருந்து முழுமையாக விலகுவதாக அறிவித்தார்.

“இன்று முதல் அரசியல் துறவறம் மேற்கொள்கிறேன். இனி அரசியல் பேசமாட்டேன், அரசியல் விவகாரங்களில் தலையிட மாட்டேன். பாட்டாளி மக்கள் கட்சியை இனி அன்புமணி பார்த்துக்கொள்வார். தொண்டர்கள் அனைவரும் அவருக்கு முழு ஒத்துழைப்பு அளிக்க வேண்டும்” என்று அவர் உருக்கமாகப் பேசினார். இச்செய்தியைக் கேட்ட விழாவில் கூடியிருந்த கட்சித் தொண்டர்கள் உற்சாக ஆரவாரம் செய்தனர். 

இதையும் படிங்க: #BREAKING: “அரசியலில் இருந்து விலகுகிறேன்”..! பாமகவில் தலைமுறை மாற்றம்.. ராமதாஸ் அதிரடி அறிவிப்பு..!!

ராமதாஸின் பிறந்தநாளை முன்னிட்டு பல்வேறு அரசியல் கட்சித் தலைவர்கள் வாழ்த்துகளைத் தெரிவித்து வருகின்றனர். குறிப்பாக தமிழக முதலமைச்சர் விஜய், எக்ஸ் தளத்தில் பதிவிட்டு, “பாட்டாளி மக்கள் கட்சியின் நிறுவனத் தலைவர் மருத்துவர் ராமதாஸ் அவர்களுக்கு எனது இனிய பிறந்தநாள் நல்வாழ்த்துகள். தாங்கள் நல்ல உடல்நலத்துடனும், நீண்ட ஆயுளுடனும் பல்லாண்டு வாழ உளமார வாழ்த்துகிறேன்” என்று குறிப்பிட்டுள்ளார்.

கடந்த சில மாதங்களாக தந்தை-மகன் இடையே நிலவிய கருத்து வேறுபாடுகள் சமீபத்தில் தீர்க்கப்பட்ட பின்னணியில், இந்த அறிவிப்பு கட்சியில் தலைமுறை மாற்றத்தை உறுதிப்படுத்தும் வகையில் அமைந்துள்ளது. இனி கட்சியின் அரசியல் பொறுப்புகளை அன்புமணி ராமதாஸ் முழுமையாக ஏற்று நடத்துவார் என்பதே ராமதாஸின் தெளிவான நிலைப்பாடாகும்.
 

இதையும் படிங்க: ராமதாஸ் - அன்புமணி சமாதானத்தால் பாமக சீனியர்கள் அதிருப்தி! கட்சி தாவ அருள், ஜிகே மணி திட்டம்?!