மத்திய அமைச்சர் எல். முருகன் இல்லத்தில் நடைபெற்ற பொங்கல் விழா கொண்டாட்டம் இந்த ஆண்டு டெல்லியில் மிகுந்த உற்சாகத்துடனும் பாரம்பரிய முறையிலும் நடைபெற்றது. இதில் சிறப்பு விருந்தினராக பிரதமர் நரேந்திர மோடி கலந்து கொண்டது மிகப்பெரிய ஈர்ப்பாக அமைந்தது. ஆண்டுதோறும் தனது இல்லத்தில் பொங்கல் விழாவை ஏற்பாடு செய்து வரும் எல். முருகன், இந்த முறை "ஒரே பாரதம் உன்னத பாரதம்" என்ற கருப்பொருளுடன் விழாவை ஒருங்கிணைத்திருந்தார்.
வீடு முழுவதும் கரும்பு, மஞ்சள் கொத்துகள், வாழை மரங்கள், கொலம் போன்றவற்றால் அழகாக அலங்கரிக்கப்பட்டிருந்தது. தமிழகத்தின் பாரம்பரியத்தை முழுமையாக பிரதிபலிக்கும் வகையில் சிலம்பாட்டம், கரகாட்டம், தப்பாட்டம் உள்ளிட்ட கலை நிகழ்ச்சிகள் நடைபெற்றன. இசையமைப்பாளர் ஜி.வி. பிரகாஷ் இசை நிகழ்ச்சியும் சிறப்பு சேர்த்தது.
பிரதமர் மோடி வேட்டி-சட்டை அணிந்து வந்து, மண்பானையில் பொங்கல் வைத்து வழிபாடு நடத்தினார். பின்னர் கன்றுகளுக்கு உணவு அளித்து, பசுக்களைப் போற்றும் தமிழர் மரபை முழுமையாக பின்பற்றினார். இந்த நிகழ்வு மிகவும் இயல்பாகவும் உணர்ச்சிபூர்வமாகவும் அமைந்திருந்தது. விழாவில் பேசிய பிரதமர் மோடி, பொங்கல் இன்று உலகளாவிய விழாவாக மாறிவிட்டதாகக் குறிப்பிட்டார். தமிழ் சமூகமும், தமிழ் கலாச்சாரத்தை விரும்புவோரும் உலகெங்கும் உற்சாகத்துடன் கொண்டாடுவதாகவும், தானும் அதில் ஒருவராக இருப்பது பெருமையாக இருப்பதாகவும் கூறினார்.
இதையும் படிங்க: பொங்கல் வாழ்த்துக்கள்… வாழ்க தமிழ்! வாழ்க பாரதம்… தமிழில் பேசி அசத்திய பிரதமர் மோடி..!
இந்த நிகழ்ச்சியில் நடிகர்கள், முக்கிய பாஜக நிர்வாகிகள் உள்ளிட்ட பலர் கலந்து கொண்டனர். தொடர்ந்து பல்வேறு கலை நிகழ்ச்சிகள் நடைபெற்றன. இசை அமைப்பாளர் ஜி.வி. பிரகாஷ் இசை நிகழ்ச்சியை பிரதமர் மோடி உணர்வு பூர்வமாக கண்டு ரசித்தார். தொடர்ந்து பரதநாட்டியம் உள்ளிட்ட கலை நிகழ்ச்சிகளை பிரதமர் மோடி கண்டுகளித்தார்.
இதையும் படிங்க: தமிழின் தாயகமாக இந்தியா திகழ்வதில் பெருமிதம்.. பிரதமர் மோடி பொங்கல் வாழ்த்து...!