தமிழக சட்டசபைத் தேர்தல் களம் சூடுபிடித்துள்ள நிலையில், தி.மு.க. 23 கட்சிகளுடன் மெகா கூட்டணியை அமைத்துள்ளது. முன்னாள் முதல்வர் ஓ.பன்னீர்செல்வமும் தனது ஆதரவாளர்களுடன் தி.மு.க.வில் இணைந்துள்ளார். இதனால் தி.மு.க. அணி மிகுந்த வலிமை பெற்றுள்ளது.

அதேநேரம், தமிழக வெற்றிக் கழகத்துடன் (த.வெ.க.) கூட்டணி அமைக்க விரும்பிய காங்கிரஸ் கட்சி, தி.மு.க. கூட்டணியை விட்டு வெளியேறவில்லை. தி.மு.க. அணியில் இந்திய யூனியன் முஸ்லிம் லீக், மனிதநேய மக்கள் கட்சி, கொ.ம.தே.க., மக்கள் நீதி மய்யம் போன்ற கட்சிகளுக்கு தலா 2 தொகுதிகள் ஒதுக்கப்பட்டுள்ளது.

கருணாஸ், தமிமுன் அன்சாரி, தனியரசு, வேல்முருகன், எஸ்.டி.பி.ஐ., ஆதி தமிழர் பேரவைக்கு தலா ஒரு தொகுதி, காங்கிரஸுக்கு 28 தொகுதிகள் உறுதி செய்யப்பட்டுள்ளன. தே.மு.தி.க.வுக்கு 8 தொகுதிகள் ஒதுக்கப்பட்டுள்ளன. ம.தி.மு.க., விசிக, சிபிஐ, சிபிஎம் ஆகியவற்றுக்கு 6 தொகுதிகள் வழங்க வாய்ப்புள்ளது.

இதையும் படிங்க: பிரதமர் மோடி மீண்டும் தமிழ்நாடு விசிட்!! மார்ச் -11-ல் திருச்சி வருகை!! பம்பரமாய் வேலை பார்க்கும் பாஜக!

இதற்கு நேரெதிராக, அ.தி.மு.க.-பாஜக கூட்டணியில் பாமக, பாஜக தவிர குறிப்பிடத்தக்க பெரிய கட்சிகள் இல்லை. 2024 லோக்சபா தேர்தலில் இருந்த தே.மு.தி.க.வை கூட்டணிக்குள் கொண்டு வர முடியவில்லை. 

த.வெ.க. காங்கிரஸுடன் சேர்ந்தால் மும்முனை போட்டி உருவாகி சிறுபான்மை ஓட்டுகள் பிரியும் என்று அ.தி.மு.க.-பாஜக கணக்கு போட்டது. ஆனால் கடந்த 5-ம் தேதி தி.மு.க.-காங்கிரஸ் கூட்டணி உறுதியானதும், தி.மு.க. அணியை எதிர்கொள்ள கூட்டணியை வலுப்படுத்த வேண்டும் என்ற முடிவுக்கு பாஜக தலைமை வந்துவிட்டது.

இதனால் த.வெ.க.வை கூட்டணியில் சேர்க்க பாஜக மீண்டும் முயற்சி மேற்கொண்டுள்ளது. அ.தி.மு.க.வுடன் கூட்டணி உருவானது முதலே ஆந்திர துணை முதல்வர் பவன் கல்யாண் உள்ளிட்ட தலைவர்கள் வாயிலாக விஜயுடன் பேச்சு நடத்தியது. ஆனால் முன்னேற்றம் இல்லை. இப்போது தி.மு.க. அணியில் அதிக கட்சிகள் இணைந்துள்ளதால், த.வெ.க.வை கொண்டு வர பாஜக தீவிர முயற்சி செய்து வருவதாக தகவல் வெளியாகியுள்ளது.

பாஜக நிர்வாகி ஒருவர் கூறுகையில், "தி.மு.க.வுக்கு எதிரான சக்திகளை ஓரணியில் திரட்ட வேண்டும் என மத்திய அமைச்சர் அமித் ஷா ஆரம்பம் முதலே வலியுறுத்தி வருகிறார். பன்னீர்செல்வம் தி.மு.க.வில் இணைந்து, தே.மு.தி.க.வும் கூட்டணியில் சேர்ந்த பின், த.வெ.க.வை சேர்க்க அமித் ஷா விரும்புகிறார்" என்றார்.

ஆனால் அ.தி.மு.க. பொதுச்செயலர் எடப்பாடி கே.பழனிசாமி அதற்கு தயங்குகிறார். "அ.தி.மு.க. தனித்து ஆட்சி அமைக்கும். நான் தான் முதல்வர்" என்று அவர் திரும்பத் திரும்ப கூறி வருகிறார். விஜய் கூட்டணியில் சேர்ந்தால் முதல்வர் வேட்பாளர் யார் என்பதில் குழப்பம் ஏற்படும் என்பதால் பழனிசாமி தயக்கம் காட்டுவதாக அந்த நிர்வாகி தெரிவித்தார்.

த.வெ.க.வுடன் பேச்சு நடப்பதால், அ.தி.மு.க. கூட்டணியில் பாமக, பாஜக உள்ளிட்ட கட்சிகளுடன் தொகுதி பங்கீட்டு பேச்சு இன்னும் தொடங்கவில்லை. 2026 தேர்தல் களத்தில் இந்த நகர்வுகள் பெரும் தாக்கத்தை ஏற்படுத்தும் என எதிர்பார்க்கப்படுகிறது.

இதையும் படிங்க: எந்த நேரத்திலும் கூட்டணி உடையலாம்! தவெகவுக்கு சிக்னல் தரும் தேசிய கட்சி!! விஜய் ரூட் வேற மாதிரி!