தமிழக அரசியலில் வரலாற்றுச் சிறப்புமிக்க மாற்றம் ஏற்பட்டுள்ளது. அரை நூற்றாண்டு காலமாக தொடர்ந்த திராவிடக் கட்சிகளின் ஆட்சி மரபுக்கு முற்றுப்புள்ளி வைத்திருக்கிறார் தமிழக வெற்றிக் கழகத் தலைவர் விஜய். போட்டியிட்ட முதல் சட்டமன்றத் தேர்தலிலேயே 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ளது தவெக.

மெஜாரிட்டிக்குத் தேவையான இடங்கள் கிடைக்காத நிலையில், சிறிய கட்சிகளுடன் விஜய் பேச்சுவார்த்தை நடத்தி வருகிறார். இந்தத் தேர்தலின் மிகப் பெரிய உச்சக்கட்ட நிகழ்வாக கொளத்தூர் தொகுதியில் முதலமைச்சர் மு.க.ஸ்டாலினை தவெக வேட்பாளர் வி.எஸ்.பாபு தோற்கடித்த சம்பவம் அமைந்துள்ளது. திமுக தொண்டர்கள் இந்தத் தோல்வியால் அதிர்ச்சியில் உறைந்து போயுள்ளனர்.

தோல்வியைத் தொடர்ந்து மனம் தளராத ஸ்டாலின் உடனடியாக அறிவாலயம் வந்து மூத்த தலைவர்களுடன் ஆலோசனை நடத்தினார். கூட்டணிக் கட்சித் தலைவர்கள் மற்றும் திமுக எம்.எல்.ஏ.க்களுடனும் விரைவில் பேச்சுவார்த்தை நடத்த திட்டமிட்டுள்ளார். தனது தோல்வியை பொருட்படுத்தாமல், திமுக தலைவர் என்ற முறையில் கட்சியை வலுப்படுத்தும் பணியில் தீவிரமாக இறங்கியுள்ளார்.

இதையும் படிங்க: விஜய்க்கு 41% ஓட்டு இருக்கு! தவெக 121 இடங்களை கைப்பற்றும்! முன்னாள் ஐபிஎஸ் ரவி & குழு நடத்திய கருத்துக்கணிப்பு!

“தோல்வியை ஏற்றுக்கொள்கிறோம். வெற்றி தோல்வி எல்லாம் நாங்கள் நிறைய பார்த்துவிட்டோம். மக்கள் தீர்ப்பை ஏற்கிறோம்” என்று நேற்று ஸ்டாலின் தெரிவித்தார். மேலும், “இதுவரை சிறப்பான ஆளுங்கட்சியாக இருந்தோம். இனி சிறப்பான எதிர்க்கட்சியாக செயல்படுவோம்” என்றும் அவர் கூறினார்.

சமூக ஊடகப் பக்கங்களில் தன்னை “தமிழ்நாடு முதலமைச்சர்” என்று குறிப்பிட்டிருந்ததை ஸ்டாலின் நீக்கி, “திமுக தலைவர்” என மாற்றியுள்ளார். முறைப்படி முதலமைச்சர் பதவியிலிருந்து ராஜினாமா செய்யவும் அவர் தயாராகி வருகிறார்.

இந்தத் தேர்தல் முடிவுகள் தமிழக அரசியல் வரலாற்றில் ஒரு திருப்புமுனையாகப் பார்க்கப்படுகிறது. விஜய்யின் அரசியல் வருகை திராவிடக் கட்சிகளின் நீண்டகால ஆதிக்கத்தை உடைத்தெறிந்துள்ளது. தவெக-வின் 108 இட வெற்றி புதிய தலைமுறை அரசியலின் வலிமையை நிரூபித்துள்ளது. அடுத்த அரசு யாருக்கு என்பது குறித்த எதிர்பார்ப்பு தமிழகம் முழுவதும் அதிகரித்துள்ளது.

இதையும் படிங்க: தேர்தல்ல தோத்துட்டா திமுக வேற மாதிரி ஆகிடும்! குதிரை பேரத்தில் சிக்கிக்காதீங்க! விஜய் அட்வைஸ்!