மேற்கு ஆசியாவில் ஏற்பட்ட மோதலின் காரணமாக கடந்த ஆறு மாதங்களாக நீடித்த சமையல் எரிவாயு (எல்பிஜி) சிலிண்டர் விநியோகக் கட்டுப்பாடுகள் தளர்த்தப்பட்டுள்ளன. இனி நகர்ப்புறம் மற்றும் கிராமப்புறம் என்ற வேறுபாடின்றி அனைத்து வீட்டு உபயோக நுகர்வோரும் 25 நாட்களுக்கு ஒருமுறை சிலிண்டர் மறு நிரப்பலுக்கு முன்பதிவு செய்யலாம் என மத்திய பெட்ரோலியம் மற்றும் இயற்கை எரிவாயு அமைச்சகம் உத்தரவிட்டுள்ளது.

2026 பிப்ரவரி இறுதியில் ஈரான் மீது இஸ்ரேல் மற்றும் அமெரிக்கா தொடங்கிய இராணுவ நடவடிக்கைகளால் ஹார்முஸ் ஜலசந்தி வழியான எரிபொருள் கப்பல் போக்குவரத்து பாதிக்கப்பட்டது. இந்தியா தனது எல்பிஜி தேவையில் பெரும் பகுதியை வளைகுடா நாடுகளிலிருந்து இறக்குமதி செய்வதால் விநியோக நெருக்கடி ஏற்பட்டது. 

மார்ச் மாதத்தில் தற்காலிக தேவை மேலாண்மை நடவடிக்கையாக அமைச்சகம் நகர்ப்புறங்களில் 25 நாட்கள், கிராமப்புறங்களில் 45 நாட்கள் என்ற முன்பதிவு இடைவெளியை நிர்ணயித்தது. நகரத்துடன் இணைக்கப்பட்ட பழைய கிராமப் பகுதிகளிலும் 45 நாள் விதி பொருந்தியது. இதனால் கிராமப்புற மக்கள், குறிப்பாக பிரதமர் உஜ்வாலா யோஜனா பயனாளிகள் அதிகம் சிரமப்பட்டனர்.

இதையும் படிங்க: ஓபிசி பட்டியல் விவகாரத்தில் மத்திய அரசின் விளக்கம் ஏற்புடையதல்ல: திமுக தலைவர் மு.க.ஸ்டாலின் காட்டம்!

விநியோக நிலை படிப்படியாக மேம்பட்டதையும், நிலுவையில் இருந்த மறு நிரப்பல் ஆர்டர்கள் கணிசமாக குறைந்ததையும் சுட்டிக்காட்டி, அமைச்சகம் செப். 7 தேதியிட்ட கடிதத்தில் இந்தியன் ஆயில், பாரத் பெட்ரோலியம், இந்துஸ்தான் பெட்ரோலியம் ஆகிய நிறுவனங்களின் தலைவர்களுக்கு உடனடியாக ஒரே சீரான 25 நாள் இடைவெளியை அமல்படுத்த அறிவுறுத்தியுள்ளது. 

பெட்ரோலியத் துறை இணை அமைச்சர் சுரேஷ் கோபி தனது முகநூல் பதிவில் இதை உறுதிப்படுத்தி, அமைச்சக உத்தரவு நகலையும் பகிர்ந்துள்ளார். “விநியோக அழுத்தம் காரணமாக முன்பு வேறுபட்ட காலக்கெடு விதிக்கப்பட்டது. தற்போது நிலைமை மேம்பட்டுள்ளதால் அனைவருக்கும் 25 நாட்கள் என நிர்ணயிக்கப்பட்டுள்ளது,” என அவர் தெரிவித்துள்ளார்.

இந்த முடிவு கிராமப்புறக் குடும்பங்களுக்கு பெரும் நிவாரணமாக அமையும் என்றும், அதிகப்படியான முன்பதிவு மற்றும் கருப்புச் சந்தை பிரச்சினைகளைக் குறைக்க உதவும் என்றும் அதிகார வட்டாரங்கள் தெரிவிக்கின்றன.

அரசு உள்நாட்டு உற்பத்தியை அதிகரித்தது, மாற்று நாடுகளிலிருந்து இறக்குமதியை விரிவுபடுத்தியது உள்ளிட்ட நடவடிக்கைகளால் நிலைமை சீரடைந்தது. இந்த உத்தரவு உடனடியாக அமலுக்கு வருகிறது. நுகர்வோர் தங்கள் உள்ளூர் விநியோக நிறுவனங்கள் மூலம் புதிய விதியைப் பயன்படுத்திக்கொள்ளலாம்.

இதையும் படிங்க: மேகதாது அணைக்கு மத்திய அரசு அனுமதி தரக்கூடாது! டெல்லியில் பி.ஆர். பாண்டியன் பேட்டி!