சிட்னி: உலக அளவில் எரிபொருள் விலை உயர்வால் மக்கள் கடும் அவதியில் இருக்கும் நிலையில், ஆஸ்திரேலியாவின் விக்டோரியா மற்றும் தாஸ்மேனியா மாகாணங்கள் பொது போக்குவரத்தை இலவசமாக்கி மக்களுக்கு பெரும் நிவாரணம் அளித்துள்ளன. மேற்காசியாவில் தொடரும் போர் பதற்றத்தால் ஹார்முஸ் ஜலசந்தி மூடப்பட்டதை அடுத்து, உலக அளவில் கச்சா எண்ணெய் விநியோகம் பெரிதும் பாதிக்கப்பட்டுள்ளது.

இதனால் பல நாடுகளில் எரிபொருள் தட்டுப்பாடு ஏற்பட்டு, விலை உயர்வு காணப்படுகிறது. ஆஸ்திரேலியாவில் பெட்ரோல் விலை லிட்டருக்கு 160 ரூபாய் வரை உயர்ந்துள்ளது. இந்த உயர்வு அத்தியாவசியப் பொருட்களின் விலையையும் கணிசமாக அதிகரித்துள்ளது. பொதுமக்கள் பயணச் செலவு, அன்றாட வாழ்க்கைச் செலவு என இரட்டை அடியை சந்தித்து வருகின்றனர்.

இந்த சிரமத்தை ஓரளவு குறைக்கும் வகையில், விக்டோரியா மாகாண அரசு ஏப்ரல் முழுவதும் ரயில், டிராம் மற்றும் பஸ் உள்ளிட்ட அனைத்து பொது போக்குவரத்தையும் இலவசமாக்கியுள்ளது. இந்த அறிவிப்பு மக்களிடையே பெரும் வரவேற்பைப் பெற்றுள்ளது. தினசரி பயணிகள், மாணவர்கள், அலுவலகப் பணியாளர்கள் உள்ளிட்டோர் இந்த சலுகையால் பெரும் பலனடைவார்கள் என்று எதிர்பார்க்கப்படுகிறது.

இதையும் படிங்க: மேற்காசிய போர் பதற்றம்! அதிகரிக்கும் எரிபொருள் தட்டுப்பாடு! முதல் நாடாக அவசரநிலையை பிரகடனப்படுத்தியது பிலிப்பைன்ஸ்!

அதேபோல், தாஸ்மேனியா மாகாணத்தில் பஸ் மற்றும் படகுப் போக்குவரத்து ஜூலை 1ம் தேதி வரை இலவசமாக்கப்பட்டுள்ளது. இந்த இரு மாகாணங்களின் முடிவும், உலக அளவில் எரிபொருள் நெருக்கடி ஏற்பட்டுள்ள சூழலில், மக்கள் நலன் சார்ந்த முக்கிய நடவடிக்கையாகப் பார்க்கப்படுகிறது.

மேற்காசியப் போர் காரணமாக ஹார்முஸ் ஜலசந்தி மூடப்பட்டதால், உலகின் பெரும்பாலான எண்ணெய் கப்பல் போக்குவரத்து பாதிக்கப்பட்டுள்ளது. இதனால் பல நாடுகளில் எரிபொருள் விலை உயர்வும், தட்டுப்பாடும் தீவிரமடைந்துள்ளன. ஆஸ்திரேலியா போன்ற நாடுகள் இத்தகைய நெருக்கடியை சமாளிக்க பொது போக்குவரத்தை இலவசமாக்கும் நடவடிக்கையை எடுத்துள்ளன.

இந்த முடிவு மக்களின் பயணச் செலவை கணிசமாகக் குறைக்கும் என்பதுடன், சுற்றுச்சூழல் பாதுகாப்புக்கும் உதவும் என்று அரசு தரப்பில் தெரிவிக்கப்பட்டுள்ளது. இருப்பினும், எரிபொருள் நெருக்கடி எப்போது முடிவுக்கு வரும் என்பது குறித்து உலக நாடுகள் கவலை தெரிவித்து வருகின்றன.

ஆஸ்திரேலியாவின் இந்த நடவடிக்கை, எரிபொருள் விலை உயர்வால் பாதிக்கப்பட்டுள்ள பிற நாடுகளுக்கும் ஒரு முன்மாதிரியாக அமையும் என்று பொருளாதார வல்லுநர்கள் கருத்து தெரிவித்துள்ளனர். மக்களின் அன்றாட வாழ்க்கையை எளிதாக்கும் வகையில் அரசுகள் இத்தகைய உடனடி நிவாரண நடவடிக்கைகளை எடுப்பது வரவேற்கத்தக்கது.

இதையும் படிங்க: இதோ ஆரம்பிச்சிட்டாங்கல்ல!! பெட்ரோல் விலை உயர்வு! 95 நாடுகள் அதிரடி முடிவு!