சிறுமியர் மீதான பாலியல் வன்முறை வழக்கில் கைது செய்யப்பட்டுள்ள ‘கிரானைட்’ வீரமணி தொடர்பான விசாரணையில், ரூ.100 கோடி பணப் பரிவர்த்தனை குறித்த தகவல் வெளியாகியுள்ளது.
தன் மீது சட்ட நடவடிக்கை எடுக்கப்படுவதைத் தடுக்க இடைத்தரகராகச் செயல்பட்டதாகக் கூறப்படும் ரியல் எஸ்டேட் தொழிலதிபர் பிரகாஷுக்கு இந்தப் பணம் வழங்கப்பட்டதாக போலீஸ் விசாரணையில் தெரியவந்துள்ளது. இதில் ரூ.24 கோடி அவரது வங்கிக் கணக்கில் இருந்ததாகவும், அந்தத் தொகையை முடக்கியுள்ளதாகவும் விசாரணை அதிகாரிகள் தெரிவித்துள்ளனர்.
சிறுமியர் மீதான புகார்: 8 பேர் கைது
சிறுமியர் மீதான பாலியல் வன்முறை குற்றச்சாட்டில் ‘கிரானைட்’ வீரமணி கைது செய்யப்பட்டுள்ளார். இந்த வழக்கில் அவருக்கு உடந்தையாக இருந்ததாகக் கூறப்படும் சாந்தி, அவரது கணவர் மகேந்திர சிம்ஹன் உள்ளிட்ட எட்டு பேர் கைது செய்யப்பட்டு புழல் சிறையில் அடைக்கப்பட்டுள்ளனர். இந்தக் குற்றச்சாட்டுகள் தொடர்பாக சிறப்பு புலனாய்வுப் பிரிவு அதிகாரிகள் தொடர்ந்து விசாரணை நடத்தி வருகின்றனர்.
இதையும் படிங்க: சாந்தியின் சதி வலை?! குற்றத்தை மூடி மறைக்க செய்த கேடி வேலைகள்! வீரமணி அதிர்ச்சி வாக்குமூலம்!
வீரமணியின் வங்கிக் கணக்குகள் மற்றும் பணப் பரிவர்த்தனைகளை ஆய்வு செய்தபோது, ரியல் எஸ்டேட் தொழில் செய்து வரும் பிரகாஷுக்கு ரூ.100 கோடி அனுப்பப்பட்டதாகக் கூறப்படும் தகவல் விசாரணையில் வெளிவந்துள்ளது.
ரூ.100 கோடி கைமாறியது எப்படி?
போலீசார் தெரிவித்த தகவலின்படி, வீரமணியின் மகளுக்கு நெருக்கமான நட்பு வட்டத்தில் பிரகாஷ் இருந்துள்ளார். வீரமணி மீதான குற்றச்சாட்டுகள் குறித்து அவருக்குத் தெரிந்திருந்ததாகவும், சட்ட நடவடிக்கைகளைத் தவிர்க்கும் முயற்சியில் அவர் இடைத்தரகராகச் செயல்பட்டதாகவும் விசாரணையில் கூறப்படுகிறது.
மேலும், வீரமணியின் தோழியான சாந்தி, அவருக்கு சிறுமியர் மீதுள்ள நாட்டத்தைப் பயன்படுத்தி ரூ.50 கோடிக்கு மேல் பணம் பறித்ததாகவும் போலீசார் சந்தேகிக்கின்றனர். 20-க்கும் மேற்பட்ட சிறுமியர் வீரமணிக்கு அறிமுகப்படுத்தப்பட்டதாகவும் விசாரணையில் தெரியவந்துள்ளதாகக் கூறப்படுகிறது.
சொத்துகளை விற்று பணம் கொடுத்தாரா?
வீரமணியுடன் தொடர்புடைய வீடியோக்களைக் காட்டி, அவரது சொத்தில் மூன்றில் ஒரு பங்கைத் தனது குடும்பத்தினருக்கு வழங்க வேண்டும் என்று சாந்தி மிரட்டியதாகக் கூறப்படுகிறது. இதுதொடர்பாக வீரமணியின் மகள் பிரகாஷிடம் தெரிவித்ததாகவும் போலீஸ் தரப்பில் கூறப்படுகிறது.
இதையடுத்து, சென்னை மற்றும் பெங்களூருவில் இருந்த இரண்டு சொத்துகளை விற்று வீரமணி ரூ.100 கோடியை பிரகாஷுக்கு வழங்கியதாக விசாரணை அதிகாரிகள் தெரிவித்துள்ளனர். இதில் ரூ.24 கோடி பிரகாஷின் வங்கிக் கணக்கில் இருந்ததாகவும், அந்தப் பணம் முடக்கப்பட்டுள்ளதாகவும் கூறப்படுகிறது.
வெளிநாட்டுக்கு தப்பிய பிரகாஷ்!
தற்போது பிரகாஷ் வெளிநாட்டுக்குத் தப்பிச் சென்றுள்ளதாகவும், அவரைப் பிடிக்க நடவடிக்கை எடுக்கப்பட்டு வருவதாகவும் போலீசார் தெரிவித்துள்ளனர். அவர் கைது செய்யப்பட்டால், இந்தப் பணப் பரிவர்த்தனையில் வேறு யாருக்கெல்லாம் தொடர்பு உள்ளது, காவல்துறை அதிகாரிகள் யாருக்கேனும் பணம் வழங்கப்பட்டதா என்பது உள்ளிட்ட விவரங்கள் தெரியவரும் என விசாரணை அதிகாரிகள் எதிர்பார்க்கின்றனர்.
இந்த வழக்கில் கூறப்படும் குற்றச்சாட்டுகள் அனைத்தும் விசாரணைக்கு உட்பட்டவை. பணப் பரிவர்த்தனையின் பின்னணி மற்றும் தொடர்புடைய நபர்களின் பங்கு குறித்து விசாரணை முடிவுகளும் நீதிமன்ற நடவடிக்கைகளுமே முழுமையான உண்மையை உறுதிப்படுத்தும்.
இதையும் படிங்க: கிரானைட் வீரமணி வழக்கில் அனைத்து கோணங்களிலும் விசாரணை!! உயர் நீதிமன்றத்தில் அதிர்ச்சி தகவல்!