நாட்டின் பொருளாதாரம் கணிப்புகளை வென்று அசைக்க முடியாத வேகத்தில் பாய்கிறது. தேசிய புள்ளிவிபர அலுவலகம் (NSO) நேற்று வெளியிட்ட அறிக்கையின்படி, 2025-26 நிதியாண்டின் இரண்டாவது காலாண்டான ஜூலை-செப்டம்பரில் ஜி.டி.பி. வளர்ச்சி 8.2 சதவீதமாக பதிவானது. 

இது கடந்த 6 காலாண்டுகளில் அடைந்த மிக உயர்ந்த வளர்ச்சி. முந்தைய காலாண்டான ஏப்ரல்-ஜூன் மாதங்களில் 7.8 சதவீதமாக இருந்தது, கடந்த ஆண்டின் இதே காலத்தில் 5.6 சதவீதமாக இருந்தது. இந்த அபார உயர்வு, நுகர்வோர் செலவழிப்பு, தயாரிப்பு துறை, சேவை துறை ஆகியவற்றின் இணைந்த பலத்தால் ஏற்பட்டது.

அறிக்கையின் முக்கிய அம்சங்கள் கணிப்புகளைத் தாண்டியது. நுகர்வோர் செலவு (PFCE) 7.9 சதவீதம் உயர்ந்து, மொத்த வளர்ச்சியின் 57 சதவீத பங்களிப்பை அளித்தது. தயாரிப்பு துறை 9.1 சதவீதம் வளர்ச்சி கண்டது, கடந்த ஆண்டின் 7.2 சதவீதத்தை முந்தியது. சேவை துறை 9.2 சதவீதம், கட்டுமானம் 7.2 சதவீதம், விவசாயம் 3.5 சதவீதம் ஆகியவை இதில் பங்கு வகித்தன. சில்லரை விலை பணவீக்கம் 0.25 சதவீதமாக குறைந்த நிலையில், இந்த வளர்ச்சி ரிசர்வ் வங்கியின் கடன் வட்டி குறைப்புக்கு வழிவகுக்கும் என வல்லுநர்கள் கூறுகின்றனர்.

இதையும் படிங்க: ரூ.360 லட்சம் கோடியை தாண்டும் ஜி.டி.பி.,! உலக அரங்கில் கெத்து காட்டும் இந்தியா!

அமெரிக்காவின் வரிவிதிப்பு அதிகரிப்பின் தாக்கத்தை உள்நாட்டு நுகர்வு கணிசமாக தணித்தது தெரிகிறது. அதைத் தொடர்ந்து அரசின் ஜி.எஸ்.டி. குறைப்பு, நிதி ஒருங்கிணைப்பு, சீர்திருத்தங்கள் இந்த வளர்ச்சியை வேகப்படுத்தின. நடப்பு நிதியாண்டின் முதல் அரைஆண்டில் (ஏப்ரல்-செப்டம்பர்) ஜி.டி.பி. 8 சதவீதம் வளர்ச்சி கண்டது, கடந்த ஆண்டின் 6.1 சதவீதத்தை முந்தியது. இதனால், இந்தியா 2025-26 நிதியாண்டில் 4 டிரில்லியன் டாலர் பொருளாதாரத்தை கடக்கும் என தலைமை பொருளாதார ஆலோசகர் வி. அனந்த நாகேஸ்வரன் தெரிவித்தார்.

பிரதமர் நரேந்திர மோடி X-இல் (முன்னர் ட்விட்டர்) பதிவிட்டு, "இந்த 8.2 சதவீத வளர்ச்சி மிக உற்சாகமானது. இது அரசின் வளர்ச்சி ஆதரவான கொள்கைகள், சீர்திருத்தங்களை பிரதிபலிக்கிறது. இந்தியர்களின் கடின உழைப்பு, தொழில்முன்னேற்றம் இதன் சான்று. அரசு மேலும் சீர்திருத்தங்களை அறிமுகப்படுத்தி, ஒவ்வொரு குடிமகனுக்கும் வாழ்க்கை எளிமைப்படுத்தும்" என்று பெருமையுடன் கூறினார்.

நிதி அமைச்சர் நிர்மலா சீதாராமன், "பொருளாதார சீர்திருத்தங்கள், நிதி ஒருங்கிணைப்பு, நுகர்வு அதிகரிப்பு ஆகியவை ஜி.டி.பி. வளர்ச்சியை வேகப்படுத்தியுள்ளன. இது நாட்டின் நீண்டகால வளர்ச்சிக்கு அடித்தளமாகும்" என்று தெரிவித்தார். இந்த வளர்ச்சி, ரிசர்வ் வங்கியின் டிசம்பர் மானிட்டரி பாலிசி சமர்ப்பணத்துக்கு முன் வந்துள்ளது. பணவீக்கம் குறைந்த நிலையில், கடன் வட்டி குறைப்பு வாய்ப்பு உள்ளது. இந்தியாவின் இந்த அபார வளர்ச்சி, உலக பொருளாதாரத்தில் முன்னணி இடத்தை உறுதிப்படுத்துகிறது.

இதையும் படிங்க: வரியை விமர்சினம் செய்றவங்க முட்டாள்!! அமெரிக்கா மதிப்பு என்ன ஆகிறது? ட்ரம்ப் காட்டம்!