தூத்துக்குடி: தென் தமிழகத்தின் புகழ்பெற்ற ஆன்மிக விழாக்களில் ஒன்றான குலசேகரன்பட்டினம் முத்தாரம்மன் கோவில் தசரா திருவிழா இன்று அதிகாலை கொடியேற்றத்துடன் கோலாகலமாகத் தொடங்கியது. இதையொட்டி விரதம் மேற்கொள்ளும் பக்தர்கள் காப்பு கட்டி வழிபாட்டைத் தொடங்கினர். விழாவின் முக்கிய நிகழ்ச்சியான மகிஷா சூரசம்ஹாரம் நடைபெறும் நாளை எதிர்பார்த்து பக்தர்கள் காத்திருக்கின்றனர்.

அதிகாலையில் கொடியேற்றம்!

தூத்துக்குடி மாவட்டம் குலசேகரன்பட்டினத்தில் அமைந்துள்ள முத்தாரம்மன் கோவிலில் இன்று அதிகாலையில் கொடிப்பட்டம் வீதி உலாவாக எடுத்துச் செல்லப்பட்டு கோவிலை வந்தடைந்தது. தொடர்ந்து காலை 5 மணியளவில் கொடிமரத்தில் கொடியேற்றப்பட்டது. இதையடுத்து கொடிமர பீடத்துக்கு சிறப்பு அபிஷேகம் மற்றும் தீபாராதனை நடைபெற்றது.

இதையும் படிங்க: பூமியை நோக்கி வரும் சூரியப் புயல்! இந்தியாவுக்கு ஆபத்து? NOAA எச்சரிக்கை விடுத்த விஞ்ஞானிகள்!

விழாவையொட்டி விரதம் இருக்கும் பக்தர்கள் காப்பு கட்டிக்கொண்டனர். தசரா திருவிழாவில் காளி உள்ளிட்ட பல்வேறு தெய்வ வேடங்களை அணிந்து வழிபடும் பக்தர்களுக்கு இந்த நிகழ்வு முக்கியத்துவம் வாய்ந்ததாகும்.

தினமும் அம்மன் வீதி உலா!

திருவிழா நாட்களில் தினமும் இரவு 10 மணியளவில் முத்தாரம்மன் பல்வேறு வாகனங்களில் வெவ்வேறு திருக்கோலங்களில் எழுந்தருளி வீதி உலா வந்து பக்தர்களுக்கு அருள்பாலிக்கிறார். இதனால் விழா நாட்களில் கோவிலிலும் அதைச் சுற்றியுள்ள பகுதிகளிலும் பக்தர்கள் கூட்டம் அதிகரிக்கும் என எதிர்பார்க்கப்படுகிறது.

குலசை தசராவின் முக்கிய நிகழ்ச்சி எப்போது?

விழாவின் 10-ம் திருநாளான வரும் 20-ம் தேதி செவ்வாய்க்கிழமை நள்ளிரவு 12 மணிக்கு மகிஷா சூரசம்ஹாரம் நடைபெற உள்ளதாக அறிவிக்கப்பட்டுள்ளது. தசரா திருவிழாவின் சிகர நிகழ்ச்சியாகக் கருதப்படும் இந்த நிகழ்வைக் காண ஏராளமான பக்தர்கள் வருகை தருவார்கள் என எதிர்பார்க்கப்படுகிறது.

முன்னதாக நடைபெற்ற காளி பூஜை!

திருவிழாவுக்கு முன்னதாக நேற்று கோவிலில் காளி பூஜை நடைபெற்றது. அதிகாலையில் நடை திறக்கப்பட்டு கணபதி ஹோமம் நடத்தப்பட்டது. தொடர்ந்து விநாயகர் பூஜை, சிறப்பு அபிஷேகம், அலங்கார தீபாராதனை ஆகியவை நடைபெற்றன.

கடற்கரை சிதம்பரேஸ்வரர் கோவிலிலும் சிறப்பு அபிஷேகம் மற்றும் அலங்கார பூஜை நடைபெற்றது. 108 சங்கு பூஜை, 108 கலச பூஜைக்குப் பிறகு முத்தாரம்மனுக்கு காளி பூஜை நடத்தப்பட்டது. காளி வேடம் அணிவதற்காக விரதமிருக்கும் ஏராளமான பக்தர்கள் இதில் பங்கேற்று வழிபட்டனர்.

மதியம் அன்னபூஜையும், மாலையில் சகஸ்ரநாம அர்ச்சனை மற்றும் புஷ்பாஞ்சலியும் நடைபெற்றன. இரவில் அம்மனுக்கு காப்பு கட்டப்பட்டதைத் தொடர்ந்து கோவிலில் பக்தர்கள் கூட்டம் அதிகரித்தது. கொடியேற்றத்துடன் தொடங்கிய இந்தத் திருவிழா அடுத்தடுத்த நாட்களில் பல்வேறு ஆன்மிக நிகழ்ச்சிகளுடன் நடைபெறுகிறது.

இதையும் படிங்க: பிரதமர் மோடியின் சென்னை பயணத்தில் கவனிக்க வேண்டிய முக்கிய அம்சங்கள்! முழு விவரம்!