தஞ்சாவூர் மாவட்டம் கும்பகோணத்தில் தங்கும் விடுதிகள் மற்றும் அழகு நிலையங்களில் பாலியல் தொழில் நடைபெறுவதாக கிடைத்த புகாரின் அடிப்படையில் போலீசார் நடத்திய சோதனையில் 10 பெண்கள் மீட்கப்பட்ட சம்பவம் பரபரப்பை ஏற்படுத்தியுள்ளது. இந்த வழக்கில் திமுக நிர்வாகி ராஜா ரகுபதி உள்ளிட்டோர் மீது வழக்குப்பதிவு செய்யப்பட்டுள்ள நிலையில், அவர் கட்சியில் இருந்து தற்காலிகமாக நீக்கப்பட்டுள்ளார்.

கும்பகோணம் நாகேஸ்வரன் கோவில், ராமசாமி கோவில் உள்ளிட்ட பகுதிகளில் உள்ள சில தங்கும் விடுதிகள் மற்றும் அழகு நிலையங்களில் சட்டவிரோதமாக பாலியல் தொழில் நடைபெறுவதாக போலீசாருக்கு தகவல் கிடைத்ததாக கூறப்படுகிறது. இதையடுத்து கும்பகோணம் மேற்கு போலீசார் மற்றும் மகளிர் போலீசார் இணைந்து பல்வேறு இடங்களில் சோதனை மேற்கொண்டனர்.

நாகேஸ்வரன் கோவில் தெற்கு வீதியில் உள்ள தனியார் தங்கும் விடுதியில் நடத்தப்பட்ட சோதனையில் 6 பெண்களும், மற்றொரு அழகு நிலையத்தில் நடத்தப்பட்ட சோதனையில் 4 பெண்களும் மீட்கப்பட்டதாக போலீஸ் தரப்பில் தெரிவிக்கப்பட்டுள்ளது. மீட்கப்பட்ட 10 பெண்களும் திருச்சியில் உள்ள காப்பகத்தில் ஒப்படைக்கப்பட்டனர்.

இதையும் படிங்க: 2028 மார்ச் 9-ல் கும்பகோணம் மகாமகம்! ரூ.600 கோடியில் வளர்ச்சிப் பணிகள் என அமைச்சர் ரமேஷ் தகவல்!

இந்த விவகாரம் தொடர்பாக விடுதி பணியாளர்கள் மற்றும் அழகு நிலைய மேலாளர் உள்ளிட்ட 3 பேரை போலீசார் கைது செய்தனர். மேலும் சிலரை தேடி வருவதாக தெரிவிக்கப்பட்டது. இதனிடையே, சம்பந்தப்பட்ட தனியார் தங்கும் விடுதியின் உரிமையாளரும், தஞ்சாவூர் வடக்கு மாவட்ட திமுக பொறியாளர் அணி அமைப்பாளருமான ராஜா ரகுபதி உள்ளிட்டோர் மீது போலீசார் வழக்குப்பதிவு செய்து விசாரணை நடத்தி வருகின்றனர்.

இந்த நிலையில், வழக்கில் திமுக நிர்வாகியின் பெயர் இடம்பெற்றிருப்பது கட்சிக்குள் அதிர்வை ஏற்படுத்திய நிலையில், ராஜா ரகுபதியை கட்சியின் அடிப்படை உறுப்பினர் உள்ளிட்ட அனைத்து பொறுப்புகளில் இருந்தும் தற்காலிகமாக நீக்கி திமுக பொதுச்செயலாளர் துரைமுருகன் அறிவித்துள்ளதாக தெரிவிக்கப்பட்டுள்ளது.

கட்சிக்கு அவப்பெயர் ஏற்படும் வகையில் செயல்பட்டதாகக் கூறி இந்த நடவடிக்கை எடுக்கப்பட்டுள்ளதாக கட்சி தரப்பில் தெரிவிக்கப்பட்டுள்ளது. இதற்கிடையே, போலீசார் பதிவு செய்துள்ள வழக்கின் விசாரணை தொடர்ந்து நடைபெற்று வருகிறது.

கும்பகோணத்தில் ஒரே நேரத்தில் பல இடங்களில் நடத்தப்பட்ட சோதனையில் 10 பெண்கள் மீட்கப்பட்டதும், அரசியல் கட்சி நிர்வாகி ஒருவர் மீது வழக்குப்பதிவு செய்யப்பட்டு பின்னர் கட்சி நடவடிக்கை எடுக்கப்பட்டிருப்பதும் இந்த விவகாரத்தை மேலும் கவனத்துக்கு கொண்டு வந்துள்ளது. வழக்கின் அடுத்தகட்ட விசாரணையில் மேலும் தகவல்கள் வெளியாகும் என எதிர்பார்க்கப்படுகிறது.

இதையும் படிங்க: வாய் கிழிய வசனம் பேசிய முதல்வர் எங்கே.? சிங்கத்தின் படை என்னாச்சு.? உதயநிதி சரமாரி கேள்வி..!!