தமிழக காங்கிரஸ் கட்சியின் தலைமை பொறுப்பில் முக்கிய மாற்றம் ஏற்பட்டுள்ளது. தமிழக காங்கிரஸ் தலைவராக இருந்த செல்வப்பெருந்தகை மாற்றப்பட்ட நிலையில், புதிய மாநில தலைவராக நியமிக்கப்பட்டுள்ள மாணிக்கம் தாகூர் இன்று மாலை 4 மணிக்கு சென்னை சத்தியமூர்த்தி பவனில் நடைபெறும் நிகழ்ச்சியில் அதிகாரப்பூர்வமாக பொறுப்பேற்கிறார். இந்த நிகழ்வில் கட்சியின் முக்கிய நிர்வாகிகள், முன்னாள் தலைவர்கள் மற்றும் தொண்டர்கள் திரளாக பங்கேற்க உள்ளதாக தகவல் வெளியாகியுள்ளது.

பொறுப்பேற்பதற்கு முன்னதாக மாணிக்கம் தாகூர் வெளியிட்டுள்ள வீடியோ செய்தியில், தமிழகத்தில் காங்கிரஸ் கட்சியின் தற்போதைய அரசியல் நிலை குறித்து கருத்து தெரிவித்துள்ளார். கடந்த 59 ஆண்டுகளுக்குப் பிறகு காங்கிரஸ் கட்சிக்கு தமிழக அமைச்சரவையில் இரண்டு அமைச்சர்கள் இடம்பெற்றிருப்பது முக்கிய சாதனை என்றும், ஆட்சியில் பங்கேற்பது என்பது கட்சியின் நீண்டகால இலக்காக இருந்ததாகவும் அவர் கூறியுள்ளார்.

மேலும், முதலமைச்சர் விஜய் தலைமையில் நடைபெறும் ஆட்சியில் காங்கிரஸ் முக்கிய கூட்டணிக் கட்சியாக செயல்பட்டு வருவதாகவும், இந்த அரசியல் சூழலில் மாநில தலைவராக பொறுப்பேற்பது தனக்கு பெருமையாக இருப்பதாகவும் மாணிக்கம் தாகூர் தெரிவித்துள்ளார். கூட்டணியை வலுப்படுத்தி கட்சியை அடுத்த கட்டத்திற்கு கொண்டு செல்வதே தனது முக்கிய நோக்கம் என்றும் அவர் குறிப்பிட்டுள்ளார்.

இதையும் படிங்க: தொடர் தேர்தல் தோல்விகளின் விரக்தியே காரணம்..!! சீமான் விமர்சனங்களுக்கு மாணிக்கம் தாகூர் பதிலடி..!!

அடுத்த பொதுத் தேர்தலை இலக்காகக் கொண்டு தமிழகத்தில் காங்கிரஸ் அமைப்பை மேலும் பலப்படுத்தும் பணிகள் மேற்கொள்ளப்படும் என்றும் மாணிக்கம் தாகூர் தெரிவித்துள்ளார். குறிப்பாக, காங்கிரஸ் மூத்த தலைவர் ராகுல் காந்தியை நாட்டின் பிரதமராகக் காண வேண்டும் என்பதே தனது அடுத்த இலக்கு என்றும், அதற்காக தமிழகத்தில் உள்ள 40 நாடாளுமன்றத் தொகுதிகளிலும் கூட்டணி வெற்றி பெற வேண்டும் என்றும் அவர் வலியுறுத்தியுள்ளார்.

மாணிக்கம் தாகூரின் இந்த கருத்துகள் தமிழக அரசியல் வட்டாரத்தில் கவனத்தை ஈர்த்துள்ளன. புதிய மாநில தலைவராக அவர் பொறுப்பேற்ற பிறகு காங்கிரஸ் கட்சியின் அமைப்பு, கூட்டணி அரசியல் மற்றும் வரவிருக்கும் தேர்தலுக்கான வியூகங்களில் என்னென்ன மாற்றங்கள் ஏற்படுகின்றன என்பது அரசியல் ரீதியாக முக்கியத்துவம் வாய்ந்ததாக பார்க்கப்படுகிறது. அவரது தலைமையில் தமிழக காங்கிரஸ் எந்த திசையில் பயணிக்கப் போகிறது என்பதையும் அரசியல் பார்வையாளர்கள் உன்னிப்பாக கவனித்து வருகின்றனர்.

இதையும் படிங்க: "காங்கிரஸ் அமைச்சரவையில் அமர மாணிக்கம் தாகூரே காரணம்!" - அமைச்சர் விஸ்வநாதன் புகழாரம்!