மத்திய அரசின் கடுமையான நடவடிக்கைகள் காரணமாக நக்சல்-மாவோயிஸ்ட் அமைப்புகள் பலவீனமடைந்துள்ளன. மகாராஷ்டிரா, மத்திய பிரதேசம், சத்தீஸ்கர், தெலங்கானா, மேற்கு வங்கம், ஜார்க்கண்ட், பீகார் உள்ளிட்ட மாநிலங்களில் அவற்றின் ஆதிக்கம் குறைந்துள்ளது. அடுத்த ஆண்டு மார்ச் 31-ம் தேதி வரை நாட்டை நக்சல்-மாவோயிஸ்ட் இல்லாத நிலைக்கு கொண்டுவருவதாக பிரதமர் நரேந்திர மோடியும், உள்துறை அமைச்சர் அமித் ஷாவும் உறுதியளித்துள்ளனர். 

இதன் ஒரு பகுதியாக, கடந்த ஓராண்டில் 287 நக்சல்கள் கொல்லப்பட்டனர். 1,000-க்கும் மேற்பட்டோர் கைது செய்யப்பட்டனர். கடந்த நவம்பர் 18-ம் தேதி ஆந்திரா, சத்தீஸ்கர், தெலங்கானா மாநில எல்லையில் நடந்த துப்பாக்கிச் சண்டையில் மாவோயிஸ்ட் மத்திய குழு உறுப்பினர் மத்வி ஹித்மா, அவரது மனைவி ராஜே உள்ளிட்ட ஆறு முக்கிய தலைவர்கள் கொல்லப்பட்டனர். 

இதே நேரத்தில், அரசின் மறுவாழ்வு திட்டத்தை ஏற்க மாவோயிஸ்ட் அமைப்பினர் ஒப்படை சரண் அடைத் தொடங்கியுள்ளனர். இந்திய கம்யூனிஸ்ட் மாவோயிஸ்ட் உட்பட பல அமைப்புகளைச் சேர்ந்த முக்கிய நபர்கள் ஆயுதங்களை ஒப்படைத்து சரண் அடைந்துள்ளனர். இது அமைப்புகளை மேலும் பலவீனப்படுத்தியுள்ளது.

இதையும் படிங்க: குறிச்சு வச்சுக்கோங்க!! மார்ச் 31 தான் கடைசி!! சொல்லி அடிக்கும் அமித்ஷா!! நக்சலுக்கு வார்னிங்!

இந்த சூழலில், மத்திய பிரதேசம், மகாராஷ்டிரா, சத்தீஸ்கர் மாநில முதல்வர்களுக்கு இந்திய கம்யூனிஸ்ட் மாவோயிஸ்ட் அமைப்பின் மூன்று மாநில சிறப்பு மண்டல குழுவின் செய்தித் தொடர்பாளர் ஆனந்த் என்ற பெயரில் கடிதம் ஒன்று அனுப்பியுள்ளார். 

நவம்பர் 22-ம் தேதி தேதியிடப்பட்ட இந்தக் கடிதத்தில், “நாங்கள் மாவோயிஸ்ட் இயக்க செயல்பாடுகளையும், ஆயுதப் போராட்டங்களையும் கைவிட்டு சரண் அடைய விரும்புகிறோம். மாநில அரசுகளின் மறுவாழ்வு திட்டத்தை ஏற்க விரும்புகிறோம்” என்று கூறப்பட்டுள்ளது.

கடிதத்தில் மேலும், “ஒட்டுமொத்தமாக சரண் அடைய அடுத்த ஆண்டு பிப்ரவரி 15 வரை அவகாசம் வழங்க வேண்டும். அதுவரை மூன்று மாநில அரசுகளும் நிதானத்தை கடைப்பிடித்து, எங்களுக்கு எதிரான நடவடிக்கைகளை நிறுத்த வேண்டும். போராட்டம் தொடரும் போராளிகளுக்கு இந்தத் தகவலை தெரிவிக்க, வானொலியில் சில நாட்கள் ஒலிபரப்பு செய்ய வேண்டும். ஆயுத ஒப்படைப்பு தேதி விரைவில் அறிவிக்கப்படும். மூன்று மாநிலங்களிலும் அமைதியை மீட்டெடுக்க வாய்ப்பு வழங்க வேண்டும்” என்று கோரப்பட்டுள்ளது.

மத்திய பிரதேச முதல்வர் மோகன் யாதவ், மகாராஷ்டிரா முதல்வர் தேவேந்திர ஃபட்னாவிஸ், சத்தீஸ்கர் முதல்வர் விஷ்ணு தேவ் சாய் ஆகியோருக்கு அனுப்பப்பட்ட இந்தக் கடிதத்தின் உண்மைத்தன்மையை அரசுகள் சரிபார்த்து வருகின்றன. சத்தீஸ்கர் துணை முதல்வர் விஜய் ஷர்மா, “கடிதத்தைப் பார்த்தோம். ஆனால் குறிப்பிட்ட காலக்கெடுவை ஏற்க முடியாது. கான்க்ரீட் திட்டம் தேவை” என்று கூறியுள்ளார். இந்தக் கடிதம், மாவோயிஸ்ட் அமைப்பின் உள் முடிவுக்கு வெளிப்புற அழுத்தம் அதிகரித்ததன் விளைவாக இருக்கலாம் என்று அரசியல் நிபுணர்கள் கூறுகின்றனர்.

மத்திய அரசின் ‘ஆபரேஷன் காகர்’ போன்ற நடவடிக்கைகள், நக்சல்-மாவோயிஸ்ட் இயக்கத்தை பலவீனப்படுத்தியுள்ளன. இந்தக் கடிதம், அமைதி பேச்சுவார்த்தைக்கான வாய்ப்பை உருவாக்கலாம் என்று எதிர்பார்க்கப்படுகிறது. மூன்று மாநிலங்களும் இதைப் பரிசீலித்து பதில் அளிக்கும் என்று தெரிகிறது.

இதையும் படிங்க: #BREAKING செல்லப்பிராணிகள் வளர்ப்போர் கவனத்திற்கு... ஐகோர்ட்டில் சென்னை மாநகராட்சி முக்கிய தகவல்...!