நாடு முழுவதும் மருத்துவப் படிப்புகளுக்கான மாணவர் சேர்க்கைக்கு நடைபெற்ற தேசிய தகுதித் தேர்வான NEET-இன் மறுத்தேர்வு முடிவுகள் நேற்று இரவு தேசிய தேர்வு முகமை (NTA) சார்பில் வெளியிடப்பட்டன. இந்த ஆண்டு மே 3-ம் தேதி நடைபெற்ற முதல் தேர்வில் வினாத்தாள் கசிவு புகார்கள் எழுந்ததைத் தொடர்ந்து, ராஜஸ்தான் உள்ளிட்ட பகுதிகளில் பலர் கைது செய்யப்பட்டனர். இதனால் தேர்வு ரத்து செய்யப்பட்டு, ஜூன் 21-ம் தேதி பலத்த பாதுகாப்பு ஏற்பாடுகளுடன் மறுத்தேர்வு நடத்தப்பட்டது.
மறுத்தேர்வு 13 மொழிகளில் (தமிழ், ஆங்கிலம், இந்தி உட்பட) 551 நகரங்களில் 5,440 தேர்வு மையங்களில் நடைபெற்றது. 20 லட்சத்திற்கும் மேற்பட்ட மாணவர்கள் பங்கேற்ற இந்தத் தேர்வு, முதல் தேர்வைவிட கணிசமாகக் கடினமானதாக மாணவர்கள் தெரிவித்தனர். அதிக பாதுகாப்பு நடவடிக்கைகள், கண்காணிப்பு கேமராக்கள் மற்றும் பல்வேறு விதிமுறைகளுடன் தேர்வு நடத்தப்பட்டது குறிப்பிடத்தக்கது.
முடிவுகளின்படி, 720 மதிப்பெண்களில் 715 மதிப்பெண்கள் பெற்று பஞ்சாப் மாணவர் ஆர்யன் குப்தா மற்றும் ஹரியானா மாணவர் பன்சுல் பன்சால் ஆகியோர் தேசிய அளவில் முதல் இரு இடங்களைப் பகிர்ந்து கொண்டனர். ராஜஸ்தான், பீகார், மகாராஷ்டிரா, உத்தரப் பிரதேசம் உள்ளிட்ட மாநிலங்களைச் சேர்ந்த உப்லக்ஷ்யா கோயல், ஆயுஷ் பலோடியா, குடலே ஷ்ரவாணி கிருஷ்ணா, ரியா ரஞ்சன், ஆர்யன் துபே, கீதான்ஷ் சரின், கவுரவ் சிங், மோகனிஷ் மாருதி போன்ஸ்லே, அபிலாஷ் உள்ளிட்டோர் அடுத்த சிறப்பான இடங்களைப் பிடித்துள்ளனர்.
இதையும் படிங்க: நீட் மறுதேர்வு வினாத்தாள் கசிவா..?? உண்மை என்ன? என்.டி.ஏ. விளக்கம்..!!
மொத்தம் 138 மாணவர்கள் 690 முதல் 720 மதிப்பெண்கள் வரை பெற்று சிறப்பித்துள்ளனர்.தேர்வில் 58 சதவீதம் பெண் மாணவர்கள் வெற்றி பெற்றுள்ளனர். 19 மாணவர்கள் 700 மதிப்பெண்களுக்கு மேல், 1,492 மாணவர்கள் 650க்கு மேல், 10,160 மாணவர்கள் 600க்கு மேல், மற்றும் 90,780 மாணவர்கள் 500க்கு மேல் மதிப்பெண்கள் பெற்றுள்ளனர். முதல் 17 பேர் 705 மதிப்பெண்களுக்கு மேல் பெற்று சாதனை படைத்துள்ளனர்.
தமிழகத்தின் பெருமைக்குரிய செய்தியாக, சென்னையைச் சேர்ந்த வெங்கடபதி வேலாயுதம் 705 மதிப்பெண்களுக்கு மேல் பெற்று (99.99915 சதவீதம்) அகில இந்திய அளவில் 12-வது இடத்தைப் பிடித்துள்ளார். இவருடன் தமிழகத்தைச் சேர்ந்த ஸ்ரீனிகா (AIR 27), சுடர் (AIR 45), வனிஷா சதீஷ் (AIR 51), சபரி (AIR 59), ஜெய்கிருஷ்ணா (AIR 75), சம்விதா (AIR 82), நவிதனா (AIR 88), நிகில் சிவநாதன் (AIR 92), ஜனனி ஸ்வேதா (AIR 112), ரோஹித் மேத்யூ ரவீந்திரராஜன் (AIR 115), ஜெயகிருஷ்ணா (AIR 134) உள்ளிட்ட 12 மாணவர்கள் உயர் மதிப்பெண்களுடன் சிறப்பிடம் பெற்றுள்ளனர்.
தமிழகத்தில் 307 மையங்களில் 1.42 லட்சம் மாணவர்கள் மறுத்தேர்வு எழுதினர். முதல் தேர்வில் 95 சதவீதம் பங்கேற்ற நிலையில், மறுத்தேர்வில் பங்கேற்பு 75 சதவீதமாகக் குறைந்தது. இந்த முடிவுகள் மருத்துவ இட ஒதுக்கீட்டுக்கு முக்கியமானதாக அமையும் என எதிர்பார்க்கப்படுகிறது.
இதையும் படிங்க: பார்லி., மழைக்காலத் தொடர்! ஜூலை 19-ல் அனைத்துக் கட்சி கூட்டம்... மத்திய அரசு அழைப்பு!