சென்னை கிண்டி தொழிலாளர் காலனியில் உள்ள சிட்கோ நிலத்துடன் தொடர்புடைய நீண்டகால வழக்கு ஒன்று தற்போது முக்கியத் திருப்பத்தை எட்டியுள்ளது. இந்த வழக்கில் முன்னாள் அமைச்சர் மா.சுப்பிரமணியன் மற்றும் அவரது மனைவி காஞ்சனா ஆகியோர் மீது சிறப்பு நீதிமன்றத்தில் குற்றச்சாட்டுகள் பதிவு செய்யப்பட்டுள்ளன. இந்த விவகாரம் பல ஆண்டுகளாக நீதிமன்றங்களில் நிலுவையில் இருந்து வருகிறது.

இந்த நிலம் முதன்முதலில் சிட்கோ நிறுவனத்தால் எஸ்.கே.கண்ணன் என்பவருக்கு ஒதுக்கீடு செய்யப்பட்டது. தொழிலாளர்களுக்கான குடியிருப்புத் திட்டத்தின் கீழ் வழங்கப்பட்ட இந்த இடம், பின்னர் மா.சுப்பிரமணியன் மற்றும் அவரது மனைவியின் பெயருக்கு மாற்றப்பட்டதாக குற்றச்சாட்டு எழுந்தது. அப்போது சென்னை மாநகராட்சியில் கவுன்சிலராகவும் பின்னர் மேயராகவும் பணியாற்றிய மா.சுப்பிரமணியன், தனது அதிகாரத்தை தவறாகப் பயன்படுத்தி போலி ஆவணங்களை உருவாக்கி இந்த நிலத்தை தனது மனைவி பெயருக்கு மாற்றியதாக புகார் அளிக்கப்பட்டது. 

குறிப்பாக, கண்ணனின் மகள் என காஞ்சனாவைக் காட்டும் வகையில் போலி ஆவணங்கள் தயாரிக்கப்பட்டதாகவும், அதன் அடிப்படையில் நிலம் பதிவு செய்யப்பட்டதாகவும் குற்றம் சாட்டப்பட்டது. இந்த நிலத்தில் பின்னர் மூன்று மாடிக் கட்டடம் கட்டப்பட்டதாகவும் தகவல்கள் தெரிவிக்கின்றன. சைதாப்பேட்டை பகுதியைச் சேர்ந்த பார்த்திபன் என்பவர் அளித்த புகாரின் அடிப்படையில் இந்த வழக்கு தொடங்கியது. ஆரம்பத்தில் உள்ளூர் காவல் நிலையத்தில் பதிவு செய்யப்பட்ட இந்த வழக்கு, பின்னர் சி.பி.சி.ஐ.டி.யின் விசாரணைக்கு மாற்றப்பட்டது. விசாரணை முடிவில் 2019ஆம் ஆண்டு குற்றப்பத்திரிகை தாக்கல் செய்யப்பட்டது. 

இதையும் படிங்க: ஹப்பாடா...! பொன்முடிக்கு பிறப்பிக்கப்பட்ட பிடிவாரண்ட் வாபஸ்..! முக்கிய உத்தரவு..!!

இதையடுத்து எம்.பி., எம்.எல்.ஏ.க்கள் தொடர்பான வழக்குகளை விசாரிக்கும் சிறப்பு நீதிமன்றத்தில் இந்த வழக்கு விசாரணைக்கு வந்தது. குற்றச்சாட்டுப் பதிவுக்காக மா.சுப்பிரமணியன் மற்றும் அவரது மனைவி நேரில் ஆஜராக வேண்டும் என நீதிமன்றம் உத்தரவிட்டது. பல முறை விசாரணை ஒத்திவைக்கப்பட்ட நிலையில், இறுதியில் இருவர் மீதும் குற்றச்சாட்டுகள் பதிவு செய்யப்பட்டுள்ளன. 

இதையும் படிங்க: பகீர் கிளப்பிய நாங்குநேரி கொலை வழக்கு..!! ராக்கெட் ராஜா உட்பட 11 பேர் விடுதலை..!!