ம.தி.மு.க. பொதுச் செயலாளர் வைகோ, தமிழர்களின் மொழி உரிமைப் போராட்ட வரலாற்றை நினைவுகூரும் வகையில் ஒரு முக்கிய அறிக்கையை வெளியிட்டுள்ளார். தற்போதைய மத்திய அரசின் மும்மொழிக் கொள்கையை கடுமையாக எதிர்த்த அவர், இந்தித் திணிப்பு முயற்சிகளுக்கு எதிராக தமிழ்நாடு உறுதியாக நிற்க வேண்டும் என வலியுறுத்தினார். 1938-ஆம் ஆண்டு தொடங்கிய இந்தி எதிர்ப்புப் போராட்டம் தமிழகத்தில் பெரும் எழுச்சியைப் பெற்றது. 1965-ல் இது மொழிப் புரட்சியாக வெடித்தபோது, இந்தியைத் திணிக்க முயன்ற மத்திய அரசின் நடவடிக்கைக்கு எதிர்ப்பு தெரிவித்து பல தமிழ் இளைஞர்கள் உயிர்த் தியாகம் செய்தனர்.
சிங்கத் தமிழன் சின்னச்சாமி, அரங்கநாதன், ஆசிரியர் வீரப்பன், கீரனூர் முத்து, சத்தியமங்கலம் முத்து, விராலிமலை சண்முகம், மயிலாடுதுறை சாரங்கபாணி, பீளமேடு தண்டபாணி உள்ளிட்ட தியாகிகள் நெருப்பில் பாய்ந்து தங்கள் உயிரை ஈந்தனர். மேலும் நூற்றுக்கணக்கான தமிழர்கள் போலீஸ் துப்பாக்கிச் சூட்டுக்கு பலியானார்கள். இந்த இரத்தம் தோய்ந்த போராட்டமே தமிழ்நாட்டில் தமிழ் மொழியின் தன்மானத்தைப் பாதுகாத்தது.
இந்த மக்கள் எழுச்சியின் விளைவாக 1967-ல் பேரறிஞர் அண்ணா தலைமையில் தி.மு.க. ஆட்சி அமைந்தது. கொடிய புற்றுநோயால் பாதிக்கப்பட்ட நிலையிலும், 1968-ல் தமிழ்நாடு பெயர் சூட்டு விழாவில் உணர்ச்சி பொங்கக் கண்ணீர் மல்க அண்ணா ஆற்றிய உரை வரலாற்றில் இடம்பெற்றது. “இந்திக்கு இனி எந்நாளும் தமிழ்நாட்டில் இடம் இல்லை. தமிழும் ஆங்கிலமும் மட்டுமே இங்கு நிலவும். எந்தக் கட்சி ஆட்சிக்கு வந்தாலும் இந்த நிலைப்பாட்டை மாற்ற முடியாது” என்ற அவரது தீர்க்கதரிசன அறிவிப்பை அன்று முதல் இன்று வரை தமிழகத்தில் ஆட்சி செய்த அனைத்து அரசுகளும் கடைப்பிடித்து வருகின்றன.
இதையும் படிங்க: பிச்சை போடுறேன்!! சாட்டையை சுழட்டுவேன்! வாய்விட்ட துரை வைகோ! கூண்டோடு காலியாகும் ஈரோடு மதிமுக!
எனினும், தற்போது பிரதமர் நரேந்திர மோடி தலைமையிலான மத்திய அரசு, பி.எம்.ஸ்ரீ (PM SHRI) பள்ளிகள் திட்டத்தின் மூலம் மும்மொழிக் கொள்கையை தமிழ்நாட்டில் கட்டாயப்படுத்த முயற்சிப்பதாக வைகோ குற்றம் சாட்டினார். இது இந்தித் திணிப்பின் புதிய வடிவம் என்று அவர் வலியுறுத்தினார். இத்திட்டத்தை ஏற்றுக்கொள்வது, இந்தியை எதிர்த்து உயிர் நீத்த தியாகிகளுக்கு செய்யும் பெரும் துரோகம் என எச்சரித்தார். தமிழக அரசின் அமைச்சர் ராஜ்மோகன், “பி.எம்.ஸ்ரீ திட்டத்தை ஒருபோதும் ஏற்க மாட்டோம்” என்று தெரிவித்துள்ளதை வைகோ வரவேற்றார்.
மாணவர்கள் மற்றும் இளைஞர்களிடையே பெரும் எதிர்ப்பு உள்ளதைச் சுட்டிக்காட்டிய அவர், “மக்கள் அரசாக உங்கள் அரசு பரிணமிக்க வேண்டுமானால், இந்தத் திட்டத்தை முழுமையாக நிராகரியுங்கள். தமிழ் உணர்வாளர்கள் உங்களுக்கு அரணாகத் தோள் கொடுப்பார்கள்” என்று தமிழக அரசுக்கு வேண்டுகோள் விடுத்தார். தமிழ்நாட்டின் மொழி உரிமைப் போராட்டம் சுதந்திரப் போராட்டத்துக்கு நிகரான தியாகங்களால் நிறைந்தது. இன்றும் அந்த உணர்வைப் பாதுகாக்கும் பொறுப்பு ஒவ்வொரு தமிழருக்கும் உள்ளது. மத்திய அரசின் எந்தத் திட்டமும் தமிழின் தன்மானத்தைப் பாதிக்க அனுமதிக்கக் கூடாது என்பதே தமிழக மக்களின் ஒருமித்த குரலாக ஒலிக்கிறது.
இதையும் படிங்க: திமுக பெரும்பான்மையோடு ஆட்சி அமைக்கும்..! வைகோ நம்பிக்கை..!!