இந்தியக் கம்யூனிஸ்ட் கட்சியின் மூத்த தலைவரும், தமிழக அரசியல் களத்தின் மிக உயரிய ஆளுமையுமான தோழர் இரா. நல்லகண்ணு அவர்களின் உடல், மருத்துவமனையிலிருந்து தியாகராய நகரில் உள்ள அக்கட்சியின் மாநிலத் தலைமையகமான ‘பாலன் இல்லத்திற்கு’ இறுதி அஞ்சலிக்காகக் கொண்டு வரப்படுகிறது. எளிமையின் அடையாளமாகத் திகழ்ந்த அந்த மாபெரும் தலைவருக்குப் பொதுமக்களும், கட்சித் தொண்டர்களும் இறுதி மரியாதை செலுத்த விரிவான ஏற்பாடுகள் செய்யப்பட்டுள்ளன.

மருத்துவமனையிலிருந்து ஊர்வலமாகக் கொண்டு வரப்படும் தோழர் நல்லகண்ணுவின் உடல், தியாகராய நகர் ஜி.என். செட்டி சாலையில் உள்ள இந்தியக் கம்யூனிஸ்ட் கட்சி அலுவலகத்தில் பொதுமக்களின் அஞ்சலிக்காக வைக்கப்பட உள்ளது. அஞ்சலி செலுத்த ஆயிரக்கணக்கானோர் திரள்வார்கள் என்பதால், பாதுகாப்பு மற்றும் கூட்ட நெரிசலைக் கட்டுப்படுத்த மாநகரக் காவல் கூடுதல் ஆணையர் நரேந்திரன் நாயர் அவர்கள் இன்று தியாகராய நகர் அலுவலகத்திற்கு நேரில் வந்து ஆய்வு மேற்கொண்டார். பாதுகாப்பு வளையம் மற்றும் தடுப்புகள் அமைப்பது குறித்து அதிகாரிகளுக்கு அவர் ஆலோசனைகளை வழங்கினார்.

நல்லகண்ணுவின் மறைவுச் செய்தி கேட்டதிலிருந்து தமிழகத்தின் பல்வேறு மாவட்டங்களிலிருந்தும் கம்யூனிஸ்ட் கட்சித் தொண்டர்கள் மற்றும் பல்வேறு அரசியல் கட்சி நிர்வாகிகள் தியாகராய நகரில் குவியத் தொடங்கியுள்ளனர். பொதுமக்கள் நீண்ட வரிசையில் நின்று அஞ்சலி செலுத்த வசதியாகத் தனிப்பாதைகள் அமைக்கப்பட்டுள்ளன. முக்கியப் பிரமுகர்கள் மற்றும் அரசியல் தலைவர்கள் அஞ்சலி செலுத்தத் தனி இடங்கள் ஒதுக்கப்பட்டுள்ளன.

இதையும் படிங்க: மீண்டு வர வேண்டும் நல்லகண்ணு ஐயா! மருத்துவமனையில் வைகோ நேரில் நலம் விசாரிப்பு!

101 வயதில் மறைந்த தகைசால் தமிழர் தோழர் நல்லகண்ணுவின் உடல், இன்னும் சிறிது நேரத்தில் கட்சி அலுவலகத்தை அடையும் என எதிர்பார்க்கப்படுகிறது.

இதையும் படிங்க: நல்லகண்ணுவின் உடல்நிலை தொடர்ந்து பின்னடைவு..!! மருத்துவ நிர்வாகம் கொடுத்த அப்டேட்..!!