சட்டமன்றத் தேர்தலுக்கு இன்னும் 9 மாதங்களே உள்ள நிலையில் தமிழகத்தில் அரசியல் களம் சூடுப்பிடித்துள்ளது. அதிமுகவும் பாஜகவும் ஏப்ரல் மாதமே கூட்டணி அறிவிப்பை வெளியிட்டுள்ளன. இந்தக் கூட்டணியில் அமமுக, ஓபிஎஸ் அணி, தமாகா, ஐஜேகே, புதிய நீதிக் கட்சி ஆகியவை உள்ளன. பாமக, தேமுதிக ஆகிய கட்சிகளையும் கூட்டணிகளை சேர்ப்பதற்கான முயற்சிகள் மேற்கொள்ளப்பட்டு வருகிறது. மேலும் தமிழக வெற்றிக் கழகமும் கூட்டணியில் இணைய வேண்டும் என வெளிப்படையாக அழைப்பு விடுக்கப்பட்டது. ஆனால், தவெக தலைமையில் தான் கூட்டணி என்றும், விஜய் தான் முதல்வர் வேட்பாளர் எனவும் அக்கட்சி அறிவித்துவிட்டது.

இதனால் தமிழகத்தில் திமுக கூட்டணி, அதிமுக - பாஜக கூட்டணி, தவெக மற்றும் நாம் தமிழர் கட்சி என நான்கு முனை போட்டி உருவாகியுள்ளது. இந்த நிலையில் எடப்பாடி பழனிசாமி மக்களைக் காப்போம், தமிழகத்தை மீட்போம் என்ற பெயரில் தற்போதே பரப்புரையைத் தொடங்கிவிட்டார். கோவை மேட்டுப்பாளையத்தில் தனது சுற்றுப் பயணத்தைத் தொடங்கியுள்ள எடப்பாடி பழனிசாமி, ஆம்னி பேருந்தில் அமர்ந்தபடி பொதுமக்களை சந்தித்து வருகிறார். இடையிடையே விவசாயிகள் சந்திப்பு, ஒவ்வொரு ஊரிலும் இறங்கி பொதுமக்களை நேரில் சந்திப்பதும் நடைபெற்று வருகிறது. எடப்பாடி பழனிசாமி நெடுந்தூர பயணம் செல்வதற்கு வசதியாக ஆம்னி பேருந்து கழிவறை, ஓய்வு அறை உள்ளிட்ட வசதிகளுடன் வடிவமைக்கப்பட்டு உள்ளது.

இதையும் படிங்க: வார்ரே வா... இபிஎஸ் சுற்றுப்பயணம் கோலாகல தொடக்கம்! ஓடோடி வந்து வாழ்த்திய நயினார் நாகேந்திரன்!

இந்த நிலையில் கோவை தேக்கம்பட்டியில் நடைபெற்ற எடப்பாடி பழனிசாமியின் சுற்றுப் பயணத்தில் பாஜக மாநிலத் தலைவர் நயினார் நாகேந்திரனும் மத்திய இணை அமைச்சர் எல்.முருகனும் கலந்துகொண்டனர். இந்த நிகழ்ச்சியில் பேசிய நயினார் நாகேந்திரன், அதிமுக பொதுச் செயலாளரும், நாளைய தமிழகத்தின் முதலமைச்சருமான எடப்பாடி பழனிசாமி அவர்களே என்று குறிப்பிட்டார். தொடர்ந்து பேசிய அவர், பிரதமர் மோடி, அமித்ஷா, நட்டா மற்றும் எடப்பாடி பழனிசாமி ஆகியோர் ஒன்றிணைந்து மக்களைக் காப்போம், தமிழகத்தை மீட்போம் என ஓரணியில் திரண்டுள்ளனர்.

எடப்பாடி பழனிசாமியின் பயணம் வெற்றிபெற பாஜகவின் வாழ்த்துகளைத் தெரிவித்துக்கொள்கிறோம். அதிமுக என்பது மாபெரும் ஜனநாயக இயக்கம். அதிமுக - பாஜக கூட்டணி இயற்கையான கூட்டணி. எங்கள் கூட்டணி 2026ஆம் ஆண்டு தமிழகத்தில் வெற்றிபெறும். தேசிய ஜனநாயகக் கூட்டணி தமிழகத்தில் ஆட்சி அமைக்கும். தமிழகம் முழுவதும் உள்ள பாஜக தொண்டர்கள் எடப்பாடி பழனிசாமி எங்கெல்லாம் செல்கிறார்களோ அங்கெல்லாம் குடைபிடித்து ஆதரவோடு இருக்க வேண்டும். இருந்தாலும் மறைந்தாலும் பேர் சொல்ல வேண்டும், இவர் போல யார் என்று ஊர் சொல்ல வேண்டும் எனப் பாடிய ஒப்பற்ற தலைவர் எம்ஜிஆர் உருவாக்கிய அதிமுக இயக்கம் 2026ல் உறுதியாக வெல்லும் என்று தெரிவித்துள்ளார்

இதையும் படிங்க: இந்த முறை BJP தான்... நெல்லையில் தரமான சம்பவம் இருக்கு! நயினார் அறிவிப்பு...