திருநெல்வேலி மக்களின் நீண்ட காலக் கோரிக்கையை ஏற்று, அருள்மிகு நெல்லையப்பர் - காந்திமதி அம்பாள் திருக்கோயிலின் புகழ்பெற்ற வெள்ளித்தேர் பழுதுபார்க்கப்பட்டு, வரும் ஜனவரி முதல் வாரத்தில் இருந்து மீண்டும் வீதி உலா வரும் என முதலமைச்சர் மு.க. ஸ்டாலின் அவர்கள் இன்று நெல்லையில் நடைபெற்ற விழாவில் அறிவித்துள்ளார்.

நெல்லை மாவட்டம் ரெட்டியார்பட்டி மலைச்சாலையில் சுமார் 13 ஏக்கர் பரப்பளவில், ₹62 கோடி மதிப்பீட்டில் பிரம்மாண்டமாகக் கட்டப்பட்டுள்ள இந்த அருங்காட்சியகத்தை முதலமைச்சர் மு.க. ஸ்டாலின் திறந்து வைத்து, ஒவ்வொரு காட்சிக்கூடமாகச் சென்று பார்வையிட்டார். ஆதிச்சநல்லூர், சிவகளை, கொற்கை மற்றும் துலுக்கர்பட்டி ஆகிய இடங்களில் நடந்த அகழாய்வுகளில் கண்டெடுக்கப்பட்ட அரிய பொருட்களைப் பார்வையிட்ட அவர், தமிழர்களின் தொன்மையை எண்ணி நெகிழ்ச்சியடைந்தார்.

இந்த வரலாற்றுச் சிறப்புமிக்க நிகழ்வின்போது, 1965-ஆம் ஆண்டு மொழிப்போர் தியாகங்களையும், தனது தந்தை கலைஞர் கருணாநிதி அவர்கள் பாளையங்கோட்டை சிறையில் வாடிய நினைவுகளையும் முதலமைச்சர் உருக்கமாகப் பகிர்ந்துகொண்டார். "நமது தலைவர் கலைஞர் அவர்கள் இதே பாளையங்கோட்டைச் சிறையில்தான் பாதுகாப்புச் சட்டத்தின் கீழ் அடைக்கப்பட்டிருந்தார். பாம்புகளும் தேள்களும் நிறைந்த அந்தச் சிறை அறையில் இருந்துதான் அவர் கவிஞராகவும், போராளியாகவும் தமிழரின் உரிமைகளுக்காகத் தன்னைச் செதுக்கிக் கொண்டார். புதுச்சேரி கோட்டையில் அவர் ஏற்றிய அந்தத் திராவிடக் கொடிதான், நவீனத் தமிழகத்தின் உதயத்திற்கான தொடக்கப்புள்ளி," என அவர் புகழாரம் சூட்டினார்.

இதையும் படிங்க: நெல்லையில் பொருநை அருங்காட்சியகம் திறப்பு: 3000 ஆண்டுகாலத் தமிழரின் பெருமையை மீட்டெடுத்த முதலமைச்சர்! 

"நெல்லையப்பர் கோயில் வெள்ளித்தேர் பழுதடைந்து ஓடாமல் இருப்பது குறித்து மாவட்ட நிர்வாகம் மற்றும் இந்து சமய அறநிலையத் துறை கவனத்திற்குக் கொண்டு செல்லப்பட்டது. தற்போது அதன் சீரமைப்புப் பணிகள் முழுமையடைந்துள்ள நிலையில், வரும் ஜனவரி முதல் வாரத்தில் இருந்து வெள்ளித்தேர் மீண்டும் பவனி வரும் என்பதை மகிழ்ச்சியுடன் தெரிவித்துக் கொள்கிறேன்" என்று அவர் குறிப்பிட்டார்.

தொடர்ந்து பாளையங்கோட்டையில் ₹100 கோடி மதிப்பீட்டில் கட்டப்படவுள்ள காயிதே மில்லத் நினைவு நூலகத்திற்கு முதலமைச்சர் அடிக்கல் நாட்டினார். 2026-ஆம் ஆண்டிற்கான தேர்தல் வியூகங்கள் ஒருபுறம் சூடுபிடித்துள்ள நிலையில், 'பொருநை தமிழரின் பெருமை' என்ற இந்தப் பண்பாட்டுப் புரட்சி தமிழக மக்களிடையே பெரும் வரவேற்பைப் பெற்றுள்ளது. தமிழரின் கலாச்சாரம் மற்றும் நாகரிகத்தை மீட்பதே திராவிட மாடல் ஆட்சியின் பிரதான இலக்கு என்பதை இந்தத் திறப்பு விழா மீண்டும் ஒருமுறை உறுதிப்படுத்தியுள்ளது.
 

இதையும் படிங்க: களைகட்டும் கிறிஸ்துமஸ் கொண்டாட்டம்... நெல்லைக்குப் புறப்பட்ட முதல்வர் ஸ்டாலின்...!