காஞ்சிபுரம் சட்டமன்றத் தொகுதியில் அதிமுக வேட்பாளரை ஆதரித்துப் பிரம்மாண்டப் பொதுக்கூட்டத்தில் உரையாற்றிய அதிமுக பொதுச்செயலாளர் எடப்பாடி கே. பழனிசாமி, முன்னாள் முதல்வர் ஓ. பன்னீர்செல்வத்தைத் துரோகி மற்றும் திமுகவின் பி டீம் என மிகக் கடுமையான வார்த்தைகளால் விமர்சித்தார். கடந்த பிப்ரவரி மாதம் ஓ.பி.எஸ் அதிகாரப்பூர்வமாக திமுகவில் இணைந்த பிறகு, ஈ.பி.எஸ் அவரை நேரடியாக இவ்வாறு விமர்சிப்பது இதுவே முதல்முறை என்பது குறிப்பிடத்தக்கது.

கடந்த 2021 சட்டமன்றத் தேர்தல் முடிவுகள் குறித்துப் பேசிய எடப்பாடி பழனிசாமி கடந்த தேர்தலில் அதிமுக மீண்டும் ஆட்சி அமைக்க வேண்டிய அனைத்துச் சூழல்களும் இருந்தன. ஆனால், கட்சிக்குள் இருந்து கொண்டே சிலர் திமுகவின் கைக்கூலிகளாகச் செயல்பட்டு, அதிமுகவின் வெற்றியைத் தடுத்து ஆட்சியைத் தாரை வார்த்தனர்.

ஓ. பன்னீர்செல்வத்தின் அரசியல் நிலைப்பாட்டைச் சாடிய அவர் எம்.ஜி.ஆரால் தீய சக்தி என வர்ணிக்கப்பட்ட திமுகவில் இணைந்து, அதிமுகவிற்குத் துரோகம் செய்துள்ளார் ஓ.பி.எஸ். அதிமுகவில் முதலமைச்சர், நிதியமைச்சர் எனப் பெரிய, பெரிய பதவிகளை அனுபவித்த பிறகும் அவருக்கு ஆசை அடங்கவில்லை. தற்போது அவர் நேரடியாகவே திமுகவில் இணைந்துவிட்டார். இதன் மூலம் அவர் இவ்வளவு காலம் 'திமுகவின் பி டீம்' ஆகத்தான் அதிமுகவில் செயல்பட்டார் என்பது வெட்டவெளிச்சமாகியுள்ளது என ஆக்ரோஷமாகத் தெரிவித்தார்.

இதையும் படிங்க: ஸ்டாலினை புதைக்கலாம்.. என் திட்டங்களை முடியாது! எடப்பாடி பழனிசாமிக்கு முதலமைச்சர் மு.க.ஸ்டாலின் சவால்!

காஞ்சிபுரத்தின் நெசவாளர்கள் மற்றும் கட்டமைப்பு குறித்துப் பேசிய ஈ.பி.எஸ் பட்டு நகரமான காஞ்சிபுரத்தில் நெசவாளர்களின் வாழ்வாதாரத்தை மேம்படுத்த அதிமுக கொண்டு வந்த பல திட்டங்களை திமுக அரசு முடக்கிவிட்டது. திமுக ஆட்சியில் ரவுடியிசம் அதிகரித்துள்ளதால் மக்கள் அச்சத்தில் உள்ளனர் எனக் குற்றம் சாட்டினார்.

துரோகிகளுக்கும், தீய சக்திகளுக்கும் மக்கள் வரும் ஏப்ரல் 23-ஆம் தேதி தகுந்த பாடம் புகட்டுவார்கள். எம்.ஜி.ஆர் மற்றும் ஜெயலலிதாவின் உண்மைத் தொண்டர்கள் ஒருபோதும் திமுகவை ஏற்க மாட்டார்கள். இரட்டை இலை சின்னத்தின் வெற்றி தமிழகத்தின் உரிமைகளை மீட்கும் என்று கூறித் தனது உரையை நிறைவு செய்தார்.

தமிழக அரசியலில் ஓ.பி.எஸ் - ஈ.பி.எஸ் இடையேயான மோதல் தற்போது திமுக vs அதிமுக என்ற நேரடிப் போராக மாறியுள்ள நிலையில், ஈ.பி.எஸ்-ஸின் இந்தப் பேச்சு அதிமுக தொண்டர்களிடையே பெரும் பரபரப்பை ஏற்படுத்தியுள்ளது.

இதையும் படிங்க: நாட்டையே ஆள்கிறவருக்கு எவ்வளவு பவர் இருக்கும்! வில்லிவாக்கத்தில் எடப்பாடி பழனிசாமி 'பவர்ஃபுல்' பேச்சு!