ஈரான் அணு ஆயுதங்கள் தயாரிப்பதாக இஸ்ரேல் குற்றம்சாட்டியதைத் தொடர்ந்து, இரு நாடுகளுக்கு இடையே மோதல் தீவிரமடைந்தது. இஸ்ரேலின் பிரதமர் பெஞ்சமின் நெதன்யாகு, ஈரானின் அணு ஆயுதத் திட்டம் "இஸ்ரேலுக்கு அச்சுறுத்தல்" எனக் கூறி, ஜூன் 13ஆம் தேதி ஈரானின் அணு ஆயுத மையங்கள் மற்றும் இராணுவ இலக்குகளைத் தாக்கினார். இதற்கு பதிலடியாக, ஈரான் டெல் அவிவ் மற்றும் ஹைஃபாவை ஏவுகணைகளால் தாக்கியது. இதில் 28 பேர் கொல்லப்பட்டனர். 
இந்த மோதல், மத்திய கிழக்கில் பதற்றத்தை மேலும் உயர்த்தியது.

இந்த நிலையில் இஸ்ரேலுக்கு ஆதரவாக, அமெரிக்கா ஈரானின் மூன்று முக்கிய அணுசக்தி மையங்களான ஃபோர்டோ, நடான்ஸ், மற்றும் இஸ்ஃபஹான் மீது தாக்குதல் நடத்தியது. அமெரிக்க அதிபர் டொனால்ட் ட்ரம்ப், இந்தத் தாக்குதல்கள் ஈரானின் அணு ஆயுதத் திட்டத்தை “முற்றிலும் அழித்துவிட்டதாக” அறிவித்தார், ஆனால் புலனாய்வு அறிக்கைகள் இந்த மையங்கள் முழுமையாக அழிக்கப்படவில்லை என்றும், சில மாதங்களுக்கு மட்டுமே தடைபட்டுள்ளதாகவும் தெரிவிக்கின்றன.

ஈரானின் யூரேனியம் இருப்பு குறித்து பரவலான கவலைகள் எழுந்தன. இஸ்ரேல் உளவுத்துறை அதிகாரிகளின் கூற்றுப்படி, ஈரான் தாக்குதலுக்கு முன் 400 கிலோ அளவு செறிவூட்டப்பட்ட யூரேனியத்தை மறைத்து வைத்திருக்கலாம். ஆனால், இந்தத் தகவலை உறுதிப்படுத்த முடியவில்லை, மேலும் ஈரானின் அணு ஆயுதத் திட்டம் முற்றிலும் நிறுத்தப்படவில்லை என்று நிபுணர்கள் கருதுகின்றனர்.

இதையும் படிங்க: குற்றவாளி நெதன்யாகுவை ஏன் அரஸ்ட் பண்ணல? இத்தாலி, பிரான்ஸ், கிரிஸ் நாடுகளுக்கு ஐ.நா நிருபர் கேள்வி..!

பதிலடியாக, ஈரான் கத்தாரில் உள்ள அல் உதைத் விமானப்படைத் தளத்தின் மீது ஜூன் 23 அன்று ஏவுகணைத் தாக்குதல் நடத்தியது, இது மத்திய கிழக்கில் உள்ள மிகப்பெரிய அமெரிக்க இராணுவத் தளமாகும். இந்தத் தாக்குதல், அமெரிக்காவின் அணு மையத் தாக்குதலுக்கு பதிலடியாகவும், இஸ்ரேலின் தொடர் தாக்குதல்களுக்கு எதிராகவும் நடத்தப்பட்டது.

ஈரான் முன்கூட்டியே எச்சரிக்கை விடுத்ததால், தளம் முன்பே வெறுமையாக்கப்பட்டு, உயிரிழப்பு ஏதும் ஏற்படவில்லை. அமெரிக்க பாதுகாப்பு அதிகாரி ஒருவர், இந்தத் தாக்குதல் “பெரும்பாலும் குறியீட்டு ரீதியானது” என்று உறுதிப்படுத்தினார். கத்தார் இதை தனது இறையாண்மைக்கு எதிரான மீறலாகக் கண்டித்தது.

ட்ரம்ப், ஈரானின் ஏவுகணைகளை “மிகவும் பலவீனமான பதிலடி” என்று குறிப்பிட்டு, அவை அனைத்தும் வீழ்த்தப்பட்டதாகக் கூறினார். இருப்பினும், இஸ்ரேல் மற்றும் ஈரான் இரு தரப்பும் போர் நிறுத்த ஒப்பந்தத்தை மீறியதாக குற்றம்சாட்டின. ஜூன் 23 அன்று, ட்ரம்ப் இஸ்ரேல் மற்றும் ஈரான் இடையே போர் நிறுத்த ஒப்பந்தம் ஏற்பட்டதாக அறிவித்தார், இது கத்தாரின் மத்தியஸ்தத்தால் சாத்தியமானது. ஆனால், இஸ்ரேல் தொடர்ந்து தாக்குதல்களை நடத்தியதாகவும், ஈரான் “கடைசி நிமிடம்” வரை பதிலடி கொடுத்ததாகவும் தகவல்கள் தெரிவிக்கின்றன.

இந்த நிலையில் ஈரானின் ஏவுகணைகள் கத்தாரில் உள்ள விமானப்படைத்தளத்தை தாக்கியதாக அமெரிக்கா ஒப்புக்கொண்டுள்ளது. இந்த தாக்குதலில் விமானப்படைத்தளம் பாதிக்கப்பட்டதாகவும் ஆனால் உயிரிழப்பு சம்பவங்கள் எதுவும் ஏற்படவில்லை என்றும் அமெரிக்க பாதுகாப்புத்துறை செய்தித்தொடர்பாளர் இன்று தெரிவித்துள்ளார். அனைத்து ஏவுகணைகளையும் அமெரிக்கா சுட்டு வீழ்த்திவிட்டதாக அதிபர் ட்ரம்ப் தெரிவித்த நிலையில், ஈரான் விமானப்படைத்தளத்தை தாக்கியதாக செய்தித்தொடர்பாளர் ஒப்புக்கொண்டுள்ளது சர்ச்சை ஏற்படுத்தி உள்ளது.

இதையும் படிங்க: பேசி பார்ப்போம்! சரிவரலைனா மொத்தமா முடிச்சி விட்ருவோம்! ஹமாஸை எச்சரிக்கும் இஸ்ரேல்.. நெதன்யாகு வார்னிங்!