மத்திய அரசின் நலத்திட்டங்கள் அடித்தட்டு மக்களை முறையாகச் சென்றடைவதை உறுதி செய்யும் வகையில், மத்திய இணை அமைச்சர்கள் மற்றும் தனிப்பொறுப்புடன் கூடிய இணை அமைச்சர்கள் என 20 பேரின் துறை சார்ந்த செயல்திறன் மற்றும் களப்பணிகள் குறித்து பாரதப் பிரதமர் நரேந்திர மோடி சுமார் நான்கு மணி நேரம் மிக விரிவான தீவிர ஆய்வுக் கூட்டத்தை நடத்தியுள்ளார்.

பிரதமரின் அதிகாரப்பூர்வ இல்லத்தில் நடைபெற்ற இந்த உயர்மட்ட ஆய்வுக் கூட்டத்தில், வேளாண்மை மற்றும் விவசாயிகள் நலன், ஊரக வளர்ச்சி, பள்ளிக்கல்வி, உயர்கல்வி, சமூக நீதி மற்றும் அதிகாரமளித்தல் உள்ளிட்ட மிக முக்கியத் துறைகளைக் கவனித்து வரும் 20 மத்திய இணை அமைச்சர்கள் தங்களது விரிவான அறிக்கைகளுடன் நேரில் பங்கேற்றனர். கூட்டத்தின் போது, கடந்த காலங்களில் ஒதுக்கப்பட்ட நிதி, தொடங்கப்பட்ட புதிய திட்டங்களின் தற்போதைய கள நிலவரம், நிர்வாகச் சீர்திருத்தங்கள் மற்றும் எதிர்காலத் திட்டப் பணிகள் குறித்து அமைச்சர்கள் தயார் செய்து வைத்திருந்த விரிவான செயல்விளக்கங்களை (Presentations) பிரதமர் மோடி மிக உன்னிப்பாக ஆய்வு செய்தார்.

கூட்டத்தில் உரையாற்றிய பிரதமர் மோடி, "அரசின் திட்டங்கள் ஏட்டளவில் நின்றுவிடாமல், நிர்ணயிக்கப்பட்ட காலக்கெடுவுக்குள் முழுமையான தரத்துடனும் வெளிப்படைத்தன்மையுடனும் முடிக்கப்பட்டு எளிய மக்களுக்குக் கிடைக்க வேண்டும்" என்று திட்டவட்டமாக அறிவுறுத்தினார். மேலும், 2047-ஆம் ஆண்டிற்குள் 'வளர்ச்சியடைந்த பாரதம்' (Viksit Bharat 2047) என்ற பெருங்கனவை நனவாக்கும் நோக்கில், அமைச்சர்கள் தங்களது இலாகாக்களில் புதுமையான செயல் திட்டங்களை வகுக்க வேண்டும் என்றும் வலியுறுத்தினார்.

இதையும் படிங்க: கிராம மக்களுக்கு மத்திய அரசின் புதிய சலுகை..!! சிலிண்டர் முன்பதிவில் அதிரடி மாற்றம்..!!

குறிப்பாக, நாட்டின் இளைஞர்களுடன் அமைச்சர்கள் தொடர் நேரடித் தொடர்பில் இருக்க வேண்டும் என்றும், அரசின் திட்டங்களை வெளிப்படையாக மக்களிடம் கொண்டு சேர்க்கவும் பொதுமக்களின் உடனடிக் கருத்துகளைப் பெறவும் எக்ஸ் (X), முகநூல் (Facebook), இன்ஸ்டாகிராம் போன்ற சமூக வலைதளங்களில் அமைச்சர்கள் தீவிரமாக இயங்க வேண்டும் என்றும் பிரதமர் அறிவுரை வழங்கினார். மத்திய அமைச்சரவையில் விரைவில் அதிரடி மாற்றங்கள் அல்லது விரிவாக்கம் வரக்கூடும் என்ற அரசியல் யூகங்கள் நிலவி வரும் சூழலில், 20 இணை அமைச்சர்களின் செயல்பாடுகள் குறித்துப் பிரதமர் மோடி நேரடியாக கள ஆய்வு நடத்தியிருப்பது டெல்லி அரசியல் வட்டாரங்களில் மிகுந்த முக்கியத்துவம் வாய்ந்ததாகப் பார்க்கப்படுகிறது.

இதையும் படிங்க: ஓபிசி பட்டியல் விவகாரத்தில் மத்திய அரசின் விளக்கம் ஏற்புடையதல்ல: திமுக தலைவர் மு.க.ஸ்டாலின் காட்டம்!