நாடு முழுவதும் இன்று ரக்ஷா பந்தன் திருவிழா பெரும் உற்சாகத்துடன் கொண்டாடப்பட்டு வருகிறது. சகோதர-சகோதரிகளுக்கு இடையேயான அன்பு, நம்பிக்கை மற்றும் பாதுகாப்பை வலுப்படுத்தும் இந்தப் பண்டிகை, குடும்ப உறவுகளையும் சமூக ஒற்றுமையையும் வலியுறுத்துகிறது. குடியரசுத் தலைவர் திரௌபதி முர்மு, பிரதமர் நரேந்திர மோடி, மத்திய உள்துறை அமைச்சர் அமித் ஷா உள்ளிட்ட முக்கியத் தலைவர்கள் மக்களுக்கு மனமார்ந்த வாழ்த்துக்களைத் தெரிவித்துள்ளனர்.

குடியரசுத் தலைவர் முர்மு தனது வாழ்த்துச் செய்தியில், ரக்ஷா பந்தன் இந்தியக் கலாச்சாரத்தின் இன்றியமையாத அங்கம் எனக் குறிப்பிட்டார். “நம்பிக்கையுடன் மணிக்கட்டில் கட்டப்படும் ராக்கி, பாதுகாப்பின் புனிதமான அடையாளம். ‘ரக்‌ஷே மா சலா’ என்ற மந்திரம் இந்தப் பிணைப்பு என்றென்றும் நீடிக்க வேண்டும் என்பதை உணர்த்துகிறது. ஒவ்வொரு உறவும் நம்பிக்கை, உணர்திறன், பரஸ்பர ஒத்துழைப்பு ஆகியவற்றின் அடிப்படையில் அமைந்துள்ளது. குடும்பங்களையும் சமூகங்களையும் வலுப்படுத்தி, விக்சித் பாரத் நோக்கி ஆக்கப்பூர்வமாக முன்னேறுவோம்” என்றார்.

பிரதமர் மோடி எக்ஸ் தளத்தில், “ரக்ஷா பந்தன் திருநாளில் அனைவருக்கும் நெஞ்சார்ந்த வாழ்த்துகள். இந்தப் பண்டிகை மகிழ்ச்சி, வளம், வெற்றியைக் கொண்டுவரட்டும். சகோதரத்துவத்தின் பாசம், அன்பு, பரஸ்பர நம்பிக்கை உடையாத பிணைப்பாக நீடிக்கட்டும்” என எழுதியுள்ளார். 

இதையும் படிங்க: ரூ.1 கோடி இழப்பீடு.. ஹைகோர்ட்டுக்கு போன ஆதவ்.. மு.க ஸ்டாலினுக்கு பறந்த நோட்டீஸ்!!

அமித் ஷாவும், “சகோதர-சகோதரிகளின் அசைக்க முடியாத அன்பைப் போற்றும் இந்நாளில் அமைதி, மகிழ்ச்சி, செழிப்பு அமைய வாழ்த்துகிறேன்” எனத் தெரிவித்தார். இந்தப் பண்டிகையில் பெண்கள் தங்கள் சகோதரர்களுக்கு ராக்கி கட்டி நீண்ட ஆயுளை வாழ்த்துகின்றனர்.

அன்பின் அடையாளமாகப் பரிசுகள் பரிமாறிக்கொள்ளப்படுகின்றன. உடன்பிறப்புகளுக்கு மட்டுமன்றி ஆசிரியர்கள், வீரர்கள், நண்பர்கள், தலைவர்கள் உள்ளிட்டோருக்கும் ராக்கி கட்டும் வழக்கம் பரவலாகி வருகிறது. குஜராத்தின் வதோதராவில் மாணவிகள் மரங்களுக்கும் நீர்நிலைகளுக்கும் ராக்கி கட்டி சுற்றுச்சூழல் பாதுகாப்பை வலியுறுத்தினர். 

ஜார்க்கண்டின் ஜாம்ஷெட்புரில் பழங்குடியினப் பெண்கள் மரங்களுக்கு ராக்கி கட்டினர். வாரணாசி காசி விஸ்வநாதர் கோவிலில் இறைவனுக்கு ராக்கி சமர்ப்பிக்கப்பட்டது. ராய்ப்பூர் ஜெகநாதர் கோவிலில் ஆயிரக்கணக்கான பெண்கள் பங்கேற்றனர்.

புராணங்களின்படி, கிருஷ்ணரின் கையில் காயம் ஏற்பட்டபோது திரௌபதி தன் சேலையின் ஒரு பகுதியைக் கிழித்துக் கட்டிய நிகழ்வும், இந்திராணி இந்திரனுக்கு ரக்ஷா கயிறு கட்டிய கதையும் இந்தப் பண்டிகையின் அடிப்படையாகக் கருதப்படுகின்றன. ஆரம்பத்தில் சாதாரண நூலில் கட்டப்பட்ட ராக்கி, இப்போது வண்ணமயமான டிசைன்களில் கடைகளில் விற்பனையாகி வருகிறது. 

வட இந்தியாவில் நீண்டகாலமாகப் பிரபலமான இந்த விழா தென்னிந்தியாவிலும் வேரூன்றி வருகிறது. ரக்ஷா பந்தன் அன்பையும் பாதுகாப்பையும் மட்டுமே நோக்கமாகக் கொண்டது. இந்த நன்னாளில் சகோதரத்துவ உணர்வுடன் வாழ அனைவரும் உறுதி ஏற்போம்.

இதையும் படிங்க: புழல் சிறையில் CM விஜய் அதிரடி விசிட்..!! சிறைக் கைதிகள் நிலை என்ன.? அதிகாரிகளுடன் ஆலோசனை.!!