தெலுங்கானா மாநிலத்தில் வெளிநாட்டு முதலீடுகளை ஈர்க்கும் நோக்கில் மேற்கொள்ளப்பட்டு வரும் ‘ரைசிங் தெலுங்கானா’ திட்டத்தின் ஒரு பகுதியாக அமெரிக்கா செல்ல திட்டமிட்டிருந்த தனது பயணத்துக்கு மத்திய அரசு அனுமதி மறுத்துள்ளதாக முதல்வர் ரேவந்த் ரெட்டி குற்றம்சாட்டியுள்ளார். இந்த நடவடிக்கை தெலுங்கானா மக்களுக்கு இழைக்கப்பட்ட அவமானம் என்றும் அவர் தெரிவித்துள்ளார்.

தெலுங்கானாவில் முதலீடுகளை அதிகரித்து தொழில் வளர்ச்சியை ஊக்குவிக்கும் வகையில், மாநில அரசு ‘ரைசிங் தெலுங்கானா’ என்ற முதலீட்டு திட்டத்தை செயல்படுத்தி வருகிறது. இதன் ஒரு பகுதியாக வெளிநாடுகளில் உள்ள முதலீட்டாளர்கள் மற்றும் தொழில் நிறுவனங்களை சந்தித்து, தெலுங்கானாவில் முதலீடு செய்ய அழைப்பு விடுக்கும் வகையில் முதல்வர் ரேவந்த் ரெட்டி அமெரிக்கா செல்ல திட்டமிட்டிருந்தார்.

ஆனால், அவரது பயணம் அதிகாரப்பூர்வ நோக்கத்துடன் பொருந்தவில்லை என்றும், அதற்கான தேவையான தகுதிகள் பூர்த்தி செய்யப்படவில்லை என்றும் கூறி மத்திய அரசு அனுமதி மறுத்ததாக தகவல் வெளியானது. இதையடுத்து, மத்திய அரசின் முடிவு தெலுங்கானா அரசியல் வட்டாரங்களில் விவாதத்தை ஏற்படுத்தியுள்ளது.

இதையும் படிங்க: லண்டனில் இருக்கும் ரேவந்த் ரெட்டி அமெரிக்கா செல்ல தடை? மத்திய அரசு அனுமதி மறுத்ததால் பரபரப்பு!

இந்த விவகாரம் குறித்து கருத்து தெரிவித்துள்ள முதல்வர் ரேவந்த் ரெட்டி, மத்திய அரசின் நடவடிக்கையை கடுமையாக விமர்சித்துள்ளார். தெலுங்கானாவின் வளர்ச்சி மற்றும் முதலீடுகளை ஈர்ப்பதற்காக மேற்கொள்ளப்பட இருந்த பயணத்துக்கு அனுமதி மறுத்ததன் மூலம், மாநில மக்களை மத்திய அரசு அவமதித்துவிட்டதாக அவர் குற்றம்சாட்டியுள்ளார்.

இதுகுறித்து அவர் கூறுகையில், குஜராத் மாநிலத்தின் ‘2047’ திட்டத்தை முன்னெடுப்பதற்காக அந்த மாநில முதல்வர் அமெரிக்கா மற்றும் கனடா செல்ல மத்திய அரசிடம் இருந்து அனுமதி பெற்றுள்ளதாக குறிப்பிட்டார். ஆனால், தெலுங்கானா முதல்வர் அமெரிக்கா செல்லும்போது மட்டும் அனுமதி மறுக்கப்படுவதாக அவர் கேள்வி எழுப்பியுள்ளார்.

தனது பயணம் அரசியல் நோக்கம் கொண்டது அல்ல என்றும், தெலுங்கானாவுக்கான முதலீடுகளை ஈர்ப்பதே அதன் முக்கிய நோக்கம் என்றும் ரேவந்த் ரெட்டி தெரிவித்துள்ளார். வெளிநாட்டு முதலீடுகள் மாநிலத்தில் வேலைவாய்ப்பையும் தொழில் வளர்ச்சியையும் அதிகரிக்க உதவும் நிலையில், அதற்காக மேற்கொள்ளப்பட்ட பயணத்துக்கு தடை விதித்திருப்பது ஏற்றுக்கொள்ள முடியாதது என்றும் அவர் தெரிவித்துள்ளார்.

முதல்வரின் இந்த குற்றச்சாட்டுக்கு மத்திய அரசு தரப்பில் விரிவான பதில் வெளியாகாத நிலையில், மாநில அரசுக்கும் மத்திய அரசுக்கும் இடையிலான அரசியல் மோதல் மீண்டும் தீவிரமடையும் சூழல் உருவாகியுள்ளது.

இதையும் படிங்க: தெலுங்கானாவில் ரேவந்த் ரெட்டிக்கு கடிவாளம்? காங்கிரஸ் மேலிடத்தின் புதிய முடிவால் பரபரப்பு! வெடிக்கும் பூசல்?