2026-27ஆம் ஆண்டுக்கான நாடாளுமன்ற மதிப்பீட்டுக் குழு தலைவராக பாஜக எம்.பி.  சஞ்சய் ஜெய்ஸ்வால்-ஐ மக்களவை சபாநாயகர் ஓம் பிர்லா நியமித்துள்ளார். இன்று வெளியான இந்த அறிவிப்பு, நாடாளுமன்றத்தின் முக்கிய நிதி மற்றும் நிர்வாகக் கண்காணிப்புப் பொறுப்பை பாஜகவுக்கு வழங்கியுள்ளது. இந்த நியமனம், பல்வேறு அமைச்சகங்களின் பட்ஜெட் ஒதுக்கீடுகள், செலவினங்களின் திறன் மற்றும் பொருளாதார நிர்வாகத்தை மேம்படுத்துவதில் கவனம் செலுத்தும். 

 சஞ்சய் ஜெய்ஸ்வால், பீகார் மாநிலம் பஸ்சிம் சம்பரன் தொகுதியிலிருந்து தொடர்ந்து எம்.பி.யாக உள்ளவர். 1965ஆம் ஆண்டு பிறந்த இவர், மருத்துவர் பின்னணியைக் கொண்ட அரசியல்வாதி. 2009 முதல் பீகாரில் பாஜகவின் முக்கிய முகமாக விளங்கி வருகிறார். இந்த நியமனத்தின் மூலம், அவர் நாடாளுமன்றத்தின் முக்கிய நிலைக் குழுவின் தலைமைப் பொறுப்பை ஏற்றுள்ளார். இந்தக் குழு, 30 உறுப்பினர்களைக் கொண்டது மற்றும் லோக்சபா எம்.பி.க்களால் மட்டுமே அமைக்கப்படும். 

மதிப்பீட்டுக் குழுவின் முக்கியத்துவம் நாடாளுமன்ற மதிப்பீட்டுக் குழு, இந்திய அரசின் பட்ஜெட் மதிப்பீடுகளை ஆழமாக ஆய்வு செய்யும் முக்கிய அமைப்பு. ஒவ்வொரு அமைச்சகத்தின் செலவுத் திட்டங்கள், அவற்றின் செயல்பாட்டுத் திறன், பொருளாதாரப் பயன்பாடு ஆகியவற்றை மதிப்பீடு செய்து, அரசுக்கு பரிந்துரைகளை வழங்கும்.

இதையும் படிங்க: நாடாளுமன்றத்தின் இரு அவைகளும் தேதி குறிப்பிடாமல் ஒத்திவைப்பு..!!

இந்தக் குழு, நிர்வாக சீர்திருத்தங்கள், செலவுகளைக் குறைத்தல் மற்றும் திட்டங்களின் செயல்திறனை அதிகரித்தல் போன்றவற்றில் கவனம் செலுத்துகிறது. இது நாடாளுமன்றத்தின் நிதிக் கண்காணிப்பு அமைப்புகளில் ஒன்றாகக் கருதப்படுகிறது. 2026 மே ஒன்றாம் தேதி முதல் 2027 ஏப்ரல் 30ஆம் தேதி வரை அவர் பதவி வகிப்பார் என அதிகாரப்பூர்வமாக அறிவிக்கப்பட்டுள்ளது. மேலும், தமிழகத்தைச் சேர்ந்த தயாநிதிமாறன் மற்றும் வைத்திலிங்கம் ஆகியோர் நாடாளுமன்ற மதிப்பீட்டு குழு உறுப்பினர்களாக நியமிக்கப்பட்டுள்ளனர்.

இதையும் படிங்க: மகளிர் இட ஒதுக்கீடு..! திமுகவின் தனிநபர் மசோதா..! மக்களவையில் நோட்டீஸ்..!!