ஆசிய நாடுகளுக்கு விற்பனை செய்யப்படும் கச்சா எண்ணெய் விலையை சவுதி அரேபியா ஆறு ஆண்டுகளில் இல்லாத அளவுக்கு குறைத்துள்ளது. இதனால் கச்சா எண்ணெயை அதிக அளவில் இறக்குமதி செய்யும் இந்தியா உள்ளிட்ட ஆசிய நாடுகளுக்கு ஓரளவு நிம்மதி கிடைக்கும் சூழல் உருவாகியுள்ளது.

சவுதி அரசுக்கு சொந்தமான அராம்கோ நிறுவனம், நவம்பர் மாதத்துக்கான கச்சா எண்ணெய் விலையை அறிவித்துள்ளது. இதில், ஆசிய நாடுகளுக்கான முக்கிய ரகமான ‘அரப் லைட்’ கச்சா எண்ணெய், ஓமன் மற்றும் துபாய் சந்தை விலையை விட பீப்பாய்க்கு சுமார் ரூ.480 குறைவாக நிர்ணயிக்கப்பட்டுள்ளது. அக்டோபர் மாத விலையுடன் ஒப்பிடும்போது, தற்போது மேலும் ரூ.288 அளவுக்கு விலை குறைக்கப்பட்டுள்ளது.

கடந்த 2020-ம் ஆண்டு ஜூன் மாதத்துக்குப் பிறகு, ஆசிய சந்தைக்கு இந்த அளவுக்கு குறைந்த விலையில் சவுதி கச்சா எண்ணெய் வழங்கப்படுவது இதுவே முதல் முறையாகும். அரப் மீடியம் மற்றும் அரப் ஹெவி ரகங்களின் விலையும் பீப்பாய்க்கு சுமார் ரூ.488 வரை குறைக்கப்பட்டுள்ளது.

இதையும் படிங்க: அமெரிக்காவில் டீசல் விலை கிடுகிடு உயர்வு! ஜெலன்ஸ்கிக்கு டிரம்ப் போட்ட அதிரடி கண்டிஷன்!

அதே நேரத்தில், வடமேற்கு ஐரோப்பா மற்றும் மத்திய தரைக்கடல் சந்தைகளுக்கான கச்சா எண்ணெய் விலையை சவுதி அரேபியா பீப்பாய்க்கு ரூ.288 வரை உயர்த்தியுள்ளது. அமெரிக்க சந்தைக்கான விலையில் எந்த மாற்றமும் செய்யப்படவில்லை.

மத்திய கிழக்கில் நிலவும் பதற்றம் மற்றும் கடல்வழி போக்குவரத்தில் ஏற்பட்டுள்ள சிக்கல்கள் காரணமாக கப்பல் சரக்கு கட்டணம் கடுமையாக உயர்ந்துள்ளது. இதனால் ஆசிய வாடிக்கையாளர்களுக்கு ஏற்பட்டுள்ள கூடுதல் செலவை சமாளிக்கவும், ஆசிய சந்தையில் தனது பங்களிப்பை பாதுகாக்கவும் சவுதி இந்த தள்ளுபடியை வழங்கியுள்ளதாக கூறப்படுகிறது.

இந்த விலை குறைப்பு இந்தியாவுக்கும் முக்கியமானதாக பார்க்கப்படுகிறது. இந்தியாவின் மொத்த கச்சா எண்ணெய் இறக்குமதியில் சுமார் 10 முதல் 18 சதவீதம் வரை சவுதி அரேபியாவின் பங்களிப்பு உள்ளது. செப்டம்பர் மாதத்தில் மட்டும் இந்தியா தினசரி சுமார் 5.17 லட்சம் பீப்பாய் கச்சா எண்ணெயை சவுதியிடம் இருந்து இறக்குமதி செய்துள்ளது.

இதற்கிடையே, ஒபெக்+ கூட்டமைப்பு நவம்பர் மாத உற்பத்தி இலக்கில் தொடர்ந்து இரண்டாவது மாதமாக எந்த மாற்றமும் செய்யவில்லை. வளைகுடா நாடுகளின் எண்ணெய் ஏற்றுமதியும் மீண்டும் அதிகரித்துள்ளதாக தகவல்கள் தெரிவிக்கின்றன. ஆனால், ஈரானின் எண்ணெய் ஏற்றுமதி கடுமையான அழுத்தத்தை எதிர்கொண்டு வருவதாக கூறப்படுகிறது.

சவுதியின் இந்த அதிரடி விலை குறைப்பு இந்தியாவுக்கு இறக்குமதி செலவில் சாதகமாக அமையலாம். ஆனால் இதன் முழு பலன் பெட்ரோல், டீசல் விலையில் உடனடியாக பிரதிபலிக்கும் என்று எதிர்பார்ப்பது அவசரமான முடிவாகும்

இதையும் படிங்க: பெண்கள் மேல கையை வைக்கவே அஞ்சி நடுங்கணும்! மகளிர் பாதுகாப்பு விவகாரத்தில் உச்ச நீதிமன்றம் அதிரடி!